PODA 4:1-9/AMSAL 4:1-9

EPISTEL MINGGU V NDUNG TRINITATIS

Minggu, 12 Juli 2020

TURPUK: PODA 4 : 1 - 9

Topik: Ringkoti Ma Gumuruhon Pangantusion

               (Cintailah Pendidikan)

Huria ni Tuhanta na hinaholongan di bagasan Tuhan Jesus Kristus!

Ise ma na so olo dapotan bisuk di ngoluna? Pos roha, sude do hita manghalomohon asa gabe jolma na bisuk. Ala lomo rohanta gabe sahalak na bisuk, sai ringkot do hita mangalului angka parbinotoan na boi pahembanghon “kemampuan” dohot “talenta.” Tapaihutihut ma “semangat” ni angka natoras di na laho pasingkolahon angka ianangkhonna. “Maradu marutang” ma angka natoras asa timbo parsingkolaan ni ianangkhonna. Jala i do na gabe hamoraon ni angka natoras, i ma molo hasea jala sukses angka ianangkhonna.

Ndang holan angka ianangkhon, dohot do angka naung gabe natoras, angka naung magodang ianangkhonna, godang dope na manguduti parsingkolaanna. Mauas do angka jolma tu parbinotooan di tongatonga ni “pendidikan formal” dohot “pendidikan no-formal.” Dison ma taida hinaringkot ni “Pendidikan” di ngolu ni jolma, ndang adong na “merasa puas” tu angka parbinotoan.

“Pendidikan” (Latin: ‘Educare’; Inggris: ‘Education’) borhat sian hata ‘e’ na marlapatan “haruar” dohot ‘ducare’ na marlapatan: “manogunogu,” “mangarahon” dohot “manguluhon.” “Pendidikan” manang “Gumuruhon pangantusion” na marlapatan “sangkap di na laho manogunogu jolma haruar sian haotoon dohot keterbelakangan pengetahuan, parbinotoaan jala pamingkirion.” Marhite hata on do ringkot di roha ni Par-Poda asa “haruar jolma sian haotoon” gabe jolma na marbisuk jala marpangantusion.

Di partingkian nuaeng adong tolu (3) na ringkot sieahon laho gumuruhon pangantusion:

a. IQ / Kecerdasan Intelektual

Dipatupa angka “Lembaga Pemerintah,” “Swasta” dohot “Gareja” fasilitas laho mangajari di angka ilmu pengetahuan. Jala ndang holan di “lembaga,” alai dohot do angka natoras mangurupi jala mangajari angka ianangkhonna. Ringkot ma dieahi asa lam marbisuk jala lam tamba angka parbinotoan ni jolma.

b. EQ / Kecerdasan Emosional

Jumolo do angka natoras gabe guru di angka ianangkhonna marhite panghataion dohot parulaon. Contoh: Molo parmuruk do natorasna baoa, tanpa disadari boi do i mangajari ianangkhonna gabe parmuruk. Alai molo lambok do natorasna (baoa nang boru), i do parjolo mangajari angka ianangkhon asa lambok manghatai dohot na mangula.

c. SQ / Kecerdasan Spiritual

Dipatupa angka “Gareja” laho mangajari di angka na ringkot di partondion. Jala ndang holan di “gareja,” alai dohot do angka natoras mangurupi jala mangajari angka ianangkhonna. Contoh: Bangkol do angka natoras mandok asa ringgas ianangkhonna martangiang dohot marminggu, hape natorasna sandiri “hurang” do haringgasonna di na laho martangiang dohot marminggu. Alai, molo sian dakdanak nunga diida natorasna ringgas martangiang jala marminggu huhut manjaha Bibel/Alkitab, i do na mangonjar angka ianangkhon mangantusi taringot tu partondion, lumobi ma gabe dakdanak na mabiar mida Tuhanta.

I do angka parbinotoan manang pendidikan na ingkon dieahi angka ianangkhon. Alai, songon dia do asa tarpatupa songon i? Dipaandar turpuk on do dalan laho mandapothon parbinotoan na tolu i:

1. Sai Ditangihon Angka Ianangkhon Ma Pangajarion Ni Angka Natoras

Di partingkianta nuaeng taida lam godang do angka dakdanak naung mamangke handphone (Android). Alani pamangkean ni handphone i boi do angka dakdanak ndang mamintor mangalusi molo dijou natorasna. Jala nunga godang angka natoras na holsoan alani pangalaho ni dakdanak di partingkianta nuaeng on. Ndang pola talului jala tauhumi ise na sala, alai na ringkot: “tapature ma tu na denggan tu joloan ni ari on.”

“Sai tangihon ma, hamu ale angka anaha, pangajarion ni sada ama, jala ringkoti hamu ma gumuruhon pangantusion.” Sada parenta do tu angka ianangkhon asa unang leas manangihon, mangoloi jala mangulahon poda dohot pangajarion ni angka natoras. Adong hata na bisuk mandok: “Sude jolma na mangolu di portibi on, hea do gabe dakdanak. Alai, ndang sude jolma di portibi on boi gabe natoras.” Sian hata i naeng mandok, marhasurungan do angka natoras maradophon angka ianangkhon, ala jumolo do natoras manghilala songon dia gabe ianangkhon.

I do na ingkon lohot di roha ni angka ianangkhon. Jumolo do angka natorasta mangadopi pardalanan ni ngolu on jala godang parsiarajaran naung nidapot ni angka natorasta. Marhite angka na nialaman (pengalaman) ni angka natoras i do boi gabe poda na uli tu angka ianangkhon.

2. Burju Mangalului (Tekun)

Roha na ringgas do na mangonjar sasahalak laho gumuruhon pangantusion. Molo sanga adong “losok ni roha,” ndang adong be dalan di na laho mangalului parbinotoan. Songon didok hata na bisuk di tingki marsingkola “Rajin pangkal pandai, malas pangkal bodoh.” 

Menarik do na didok di ayat 7, “Parmulaan ni hapistaran, on do: Tuhori hapistaran i, jala tuhorhon sandok na niomom tumuhor pangantusion. Naeng dohonon disi, “unang mangholit hita di na laho gumuruhon pangantusion.” Unang dibilangbilangi sadia suda artanta manang “harugianta” di na laho mangeahi hapistaran, lumobi ma pendidikan ni ianangkhonta. Ummarga do hapistaran dohot habisuhon i sian arta ni portibi. Jala “ndang dao habisuhon sian nasa pangomoan.”

3. Ringgas Ma Angka Natoras Mamodahon Jala Mangajari Angka Ianangkhonna 

Guru na parjolo tu angka ianangkhon, i ma natorasna sandiri. Natoras do na jumolo ingkon mangajari angka ianangkhonna. Lumobi ma mangajari di panghataion, etika dohot partondion. Disi ma na ingkon manat angka natoras laho mangajari angka ianangkhonna, ala ingkon “berposisi” gabe tiruan do natoras di na laho mangajari ianangkhonna. 

Unang ala parkarejoan, gabe ndang adong tingki ni natoras di na laho mangajari ianangkhonna. Asa boi ditangihon angka ianangkhon pangajarion ni natoras, jumolo ma dibahen dirina gabe tiruan tu angka ianangkhonna. “Jangan pernah tuntut anak menjadi orang yang berhasil, kalau orang tua tidak melakukan tanggung jawab sebagai seorang Guru besar di tengah-tengah keluarga!”

Molo naung taulahon i saluhutna, adong ma panghorhonna hombar na pinaandar ni  Poda bindu 4 on, dia ma i?

1. Asa Mangolu (Ayat 4)

“Emas, kemana pun dibuang akan tetaplah emas.” Angka jolma naung marbisuk jala marhapistaran, dapotan “ngolu pardagingon” jala “ngolu partondion” do di angka ulaonna. Ndang mura ibana diealaela portibi on, alai marsihohot do ibana di parbinotoan dohot haporseaonna di bagasan Tuhan Jesus.

2. Asa Diramoti Jala Dijaga (Ayat 6)

Habisuhon dohot hapistaran i do na mangaramoti jala manjaga ngolunta asa unang “madabu” tu haotoon ni portibi on dohot di pangaelaelaon ni sibolis. Boi do i gabe “pagar” di hita asa binoto dia do ulaon na denggan dohot ulaon na so denggan. Jala marhite i do boi diramoti dirinta asa dao sian angka parmaraan ni daging dohot parmaraan ni partondion.

3. Asa Dipatimbul, Marmulia Jala Dapotan Tumpal Na Jagar Situtu (Ayat 9)

“Kacamata” ni portibi on: Jolma na sangap diida do sian hasurunganna sian na asing, lumobi ma molo didok jolma na pistar. Ndang pola marlojong mangalului hasangapon, ai na ro do hasangapon molo godang parbinotoan ni sasahalak. Suang songon i di ngolu ni partondion: dipatimbul, marmulia jala dapotan tumpal na jagar situtu (mahkota yang indah) do sahalak na dapotan bisuk sian Tuhanta, mangolu di bagasan haporseaonna di Tuhan Jesus. Tapangke ma tingkinta gumuruhon pangantusion sian ilmu pengetahuan, lumobi sian partondion, ai i do na hinalomohon ni Tuhanta. Di ginjang ni i, taingot ma hata ni Tuhanta na mandok, “Biar mida Jahowa do parmulaan ni parbinotoan, alai anggo halak na oto manoisi hapistaran dohot pangajaran.” (Poda 1:7). Amen.

Tuhan Jesus mamasumasu hita saluhutna!!

Pdt. Ferdinand Fernando Silaen.