LUKAS 6:39-42
Minggu, 12 Juli 2020
Evangelium : LUKAS 6 : 39 - 42
Topik : Ringkoti Ma Gumuruhon Pangantusion
(Cintailah Pendidikan)
Angka dongan na hinaholongan di bagasan Tuhan Jesus Kristus..!!
I. Ise Tuhan na tinandamuna? Sian sungkunsungkun on, naeng mangarahon hita di panandaonta tu Tuhan na tasomba saleleng naung gabe halak Kristen hita.
Molo tajaha turpuk on, olo do mamintor tabahen sada inti i ma taringot tu “Unang Manguhumi,” jala judul na binahen ni Lembaga Alkitab Indonesia (LAI), tangkas didok “Hal Menghakimi.” Gabe olo dibahen jolma jamita on songon na “pasombu tagas” manang na “mangalo alonta marhite hata na tarsurat di Bibelta.”
Asa tangkas hita mangantusi jamita on, ringkot do hita masuk tu situasi ni panurat ni turpuk on, i ma si LUKAS, sahalak dokter na gabe “Sisean dohot Aleale ni si Paulus.” Sai diarahon na tarsurat di turpuk laho “Mangalehon Semangat tu angka na pogos dohot na so mardihadiha.”
Marhite jamita on naeng ondol tu hita taringot tu “Panandaonta tu Tuhan Jesus,” dohot “Parngoluon Ni Halak Kristen” di tongatonga ni portibi on na mangadopi ragam na masa. Manang songon dia pe profesi, latar belakang dohot inganan ni halak Kristen, ingkon sada do pangantusion di pangajarion ni Tuhan Jesus.
Angka dongan na hinaholongan di bagasan Tuhan Jesus Kristus..!!
II. Diarahon topik ni Minggunta asa “Ringkoti Ma Gumuruhon Pangantusion” (Cintailah Pendidikan). Pangantusion manang Pendidikan na songon dia do molo tapaumbuk tu turpukta sadari on, hape songon na so adong manghonai taringot tu “pangantusion” manang “parbinotoan?”
“Gumuruhon Pangantusion” manang “Pendidikan” borhat sian hata Latin “EDUCARE” (Inggris: Education): “E”na marlapatan “haruar” dohot ‘ducare’ na marlapatan “manogunogu,” “mangarahon” dohot “manguluhon.” Jadi, “Pendidikan” manang “Gumuruhon pangantusion” na marlapatan “sangkap di na laho manogunogu jolma haruar sian haotoon dohot keterbelakangan pengetahuan, parbinotoaan jala pamingkirion.”
Jala i do na naeng boanon ni jamita sadari on, sada parsiajaran na sian Tuhanta Jesus asa lam tangkas hita mangantusi ise Tuhan Jesus na tasomba jala songon dia do parngoluonta songon halak Kristen. Alani i, masuk ma hita tu situasi hatiha i asa tangkas hita mangantusi pangajarion ni Tuhan Jesus tu angka siihuthonNa. Adong dua point na boi boanonta marhite jamita sadari on:
1. TANGKAS MA HITA MANANDA TUHAN JESUS
Dung sae marjamita Tuhan Jesus di dolok, diuduti Ibana ma mangalehon pangajarion tu angka na mangihuthon Ibana di bona ni dolok. Dibuhai do pangajarionNa tu halak na “terpinggirkan” jala “ter-marginal-kan,” (dipasisi) na so dianggap angka natorop alani hapogoson. I do rupani, dibuhai ma pangajarion i di bindu 6 ayat 20 na mangalehon hagogoon tu sisean dohot halak siihuthon ni Jesus hatiha i na tongon “dipadao” sian ha-Jahudi-on, alai mauas di angka pangatusion taringot tu na mar-Tuhan.
Dibahen Tuhan Jesus do “Hata Martua Ma Hamu” laho mangalehon gogo tu sisean, tung pe diadopi angka hamaolon. Jala tung pe godang angka na mangelaela, sai haholongi ma musum, i do na nidok Tuhan Jesus tu angka na mangihuthon Ibana.
“Ise do Ibana na barani mandok hata sisongon i? Holan Tuhan i sandiri Silehon Hatuaon dohot Hagogoon do na boi paposhon roha pola didok hata i. Disi do dipapatar Tuhan Jesus “karakter” ni Ibana, na dohot do “manaon na hansit.” Ro gabe jolma tu portibi on, di na laho “paluahon jolma sian uhum alani dosa.” Gabe rupa hatoban do Ibana holan naeng patuduhon “Asi ni RohaNa” (6:36b).
Songon i do nang hita, ndang mungkin ahu Kristen, so jolo hutanda ise Kristus i. Ringgas pe hita martangiang dohot marminggu molo so adong parasinirohaon di hita, ndang dope patuduhon naung mananda Jesus songon Tuhanta. Songon i pe baliksa, so boi dohononhu “polin ha-Kristenonhu” molo holan marasi roha, hape “parsombaon” dohot “pamujion” di Tuhan Jesus di bagasan tangiang dohot parmingguan, losok ahu mangulahon.
I do pamuhai pangajarion ni Tuhan Jesus di bona ni dolok i. Unang ganggu be hita di “Keilahian ni Jesus.” Ai Ibana do Tuhan, Ibana do Raja, Ibana do Sintua ni Malim jala Ibana do Guru. Molo naung tangkas i di rohanta, ndang adong be tingkinta “na bolong” na so patupahon parsaoran dohot Tuhanta i. Marhite i ma, lam marsiajar hita mananda ganup ari Tuhanta di bagasan parngoluonta.
2. TANGKAS HITA MANGGURUHON PARNGOLUON SONGON HALAK SIIHUTHON NI KRISTUS
On do na godang halak “menafsir,” songon dia do sintongna gabe halak Kristen jala songon dia do parngoluon ni halak Kristen na hinalomohon ni Tuhan Jesus. Diajari Tuhan Jesus do hita marhite umpama naung pinasahat ni Tuhan Jesus di turpukta sadari on.
a. Tumiru Kristus Ma Pangalahonta (Ay.39-40)
Songon dia do marroha sisean manang ruhut na pinangido Tuhanta tu hita?
- Sioloi Ajar
Hea ahu laho tu Panti Karya Hepata HKBP. Marsarito ma ahu tu sahalak na gabe “anggota” di Hepata i. Secara fisik, ndang boi nasida marnida manang didok ma mapitung. Hape tingki dipapatar ibana pardalanan ni ngoluna, mansai tarsonggot do ahu. Didok ibana, holang do bagasna sian “Panti Karya Hepata” i jala inantana pe tong do sarupa dohot ibana (red: mapitung).
Boi do nasida patupahon ulaonna songon jolma na boi marnida. Ai dipatupa nasida (na saripe) do ulaon “kerajinan tangan” jala na mambahen ahu lam tarsonggot, ai dohot do ibana “mangula” jala boi do “dipaias bagasna,” hape so boi marnida.
Jadi molo tapaumbuk na masa i tu turpuk on, gabe hira na so “nyata” i. Didok Tuhan Jesus di umpamaNa, “Tung tartogu na mapitung ma donganna na mapitung di dalan? Nda rap targodung ma nasida duansa?” Hape na huida, na boi do masitogutoguan na mapitung i (na saripe di Hepata). Dia do na naeng didok Tuhan Jesus i?
Taringot tu “na laho mangantusi” jala “marsiajar” di partondion do hape na naeng didok Tuhanta i. Hurang pe secara fisik manang sian perekonomian, na so gabe pangambat do i di na laho mangantusi dalan ni Tuhan i na ingkon siulahononta. Kuncina: Olo marsiajar!
Unang dipangasahon hapistaran, parbinotoan, gogo dohot pingkiran laho mangihuthon Tuhan Jesus. Gabe “sioloi ajar” angka siihuthon ni Kristus. Molo sisean, bah sisean ma! Molo siihuthon bah siihuthon ma! Na marlapatan disi: Taboto ingananta jala taboto siulahononta.
- Marserep ni roha
Dung i diuduti Tuhan Jesus di ayat 40, “Ndada sumurung sisean sian guruna. Naung sun denggan do ganup, molo doshon guruna.” Satimbotimbona parbinotoan ni sisean, so boi tumimbo sian guruna, ala guruna do na mangajari ibana. Samalomalona jala sasintongsintongna ulaonta songon halak Kristen, na so boi tapatutoru Tuhan Jesus.
Songon Tuhan Jesus na patutoru diriNa, songon i do nang pangalahonta siganup ari. Adong hata na bisuk mandok, “Rendahkanlah dirimu serendah-rendahnya, supaya tidak ada lagi yang mampu merendahkanmu, selain daripada Tuhan yang akan meninggikanmu.” Nunga jumolo Tuhan Jesus patuduhon hasereponNa, laos songon i do siulahononta.
b. Mananda Diri (Ay.41-42)
Dung tatanda Tuhan Jesus, jala mangolu hita di bagasan roha na sioloi ajar dohot di bagasan haserepon ni roha, tangkas ma taboto hadirionta. Tatanda dirinta na gok dosa, tatanda do dirinta na gale, tatanda do dirinta na so boi singkop mangula nasa ulaonta, laos disi do pasahatonta parngoluonta tu Tuhanta Jesus.
Unang “tapabangkit” dirinta gabe sahalak panguhum. Tangkas, molo manguhumi donganta jolma, laos disi do songgop “ginjang ni roha.” Tadok sumintong hita sian donganta i, tadok umbadia hita sian donganta i, tadok ummoraan ahu sian donganta i, tadok ummalo ahu sian donganta i, tadok umpistar ahu sian donganta i.
Tatap jala tangkas jumolo manulingkiti dirinta. Nunga ture pangalahongku? Nunga denggan parsihohotanhu? Jala molo sahat sada ulaon di hita songon kepala keluarga, ina di tongatonga ni keluarga, dakdanak di tongatonga ni keluarga, Sintua di tongatonga ni Lingkungan, Pandita di sada huria, jala warga negara di tongatonga ni bangsonta, taida aha na boi bahenonhu jumolo laho paturehon, so holan mandok sala tu donganhu.
Lumobi di masa Pandemi Covid-19 on, tangkas ingkon ondolhononhu tu hita: “Unang adong na mandok Covid-19 on ULAON KONSPIRASI manang POLITIK ni angka Pamarenta.” Tutu do adong Covid-19 on di portibi on. Jala molo tung pe di Kabupaten Aceh Tenggara didok “zona hijau” dope ala so adong dope kasus. Hot ma hita di pencegahan.
Unang adong hita mandok “ndang sahat tu hutanami Covid” i? Covid-na ndang sahat, alai “panghorhon ni Covid” nunga rap hita manghilala. Taida ma arga ni suansuananta molo tagadis nuaeng tu tokke, lam turun do argana. Hape arga bibit dohot pupuk nunga lam arga. Ndang alani Covid i? Ndang manghorhon Covid i?
Bereng angka ianangkhonta naung leleng na so masuk Singkola. Taingot parmingguanta naung piga bulan dipatupa di tongatonga ni bagasta. So alani Covid i? Jala hutatap hami, justru gabe martamba do angka na “sepele” jala “marginjang ni roha.” Ndung niae, sinolsolan ma sude jala tadok ma pamarenta na sala.
Unang adong panolsolion di pudi. Tumagon do parpudi dohononta “Mauliate Tuhan” ala so sahat virus i tu hutanami, maradophon molo naung adong na hona, “ndang adong lapatanna hita manolsoli.” Aha naung hubahen di pandemi on? Aha kontribusi na hupatupa tu negara on? Holan “jaga kesehatan,” “jaga jarak” “pinangke masker” jala “pinadao sian keramaian.”
Holan i pe taulahon, nunga dohot hita mangurupi pamarenta dohot para medis di bangsonta. Tapareahi ma dirinta tu na dumenggan asa jaloonta dame dohot las ni roha sian Tuhanta. I do na patuduhon naung dapot hita pangantusion jala habisuhon na sian Tuhanta Jesus. Amen.
Selamat ari Minggu tu hita saluhutna !!
Tuhan Jesus mamasumasu hita!!
Syalom..!!
Pdt. Ferdinand Fernando Silaen
Komentar
Posting Komentar