Imamat 19:9-18/3 Musa 19:9-18

EPISTEL MINGGU VII DUNG TRINITATIS

Minggu, 26 Juli 2020

Turpuk : Imamat 19 : 9 – 18 / 3 Musa 19 : 9 – 18  

Topik     : Holong I Do Patik Na Imbaru 

                 (Kasih Sebagai Perintah Baru)

Angka dongan na hinaholongan di bagasan Tuhan Jesus Kristus..!!

I. Di na masa pandemi Covid-19 na taadopi pigapiga bulan parpudi on, godang do na pinatupa ni pamarenta asa unang lam rarat sahit i di negaranta. Sada sian sosososo ni pamarentanta i ma na nidok “Physical Distancing” manang “Menjaga Jarak Fisik” sahalak tu halak na asing. Marhite sosososo i, gabe lam dao ma angka parsaoran na “berskala besar.” Boi dohonon lam dao ma “secara fisik” hita tu angka donganta.

 Contoh sederhana na masa di hita nuaeng, sai tapasiding do “kontak fisik” tu donganta marhite na masijalangan. Hape budaya di hita, lumobi di halak Batak, masijalangan i do na patuduhon “etika kesopanan” dohot “etika parjumpangan” na niajarhon sian angka natorasta. Sada pangalaho na denggan i boi dohonon gabe “korban” ni na masa on. Marpanghorhon do i di angka parsaoranta dohot donganta na asing, lumobi di angka inganan naung godang “kasus positif Covid-19.”  

 Na masa on boi gabe sada “ujian” di ngolu ni parsaoranta dohot ngolu ni partondionta. Alani “Physical Distancing” boi do mambahen jolma gabe ndang perduli be tu angka donganna. Jala manguji holongta tu angka donganta, na boi mambahen lam moru holong tu angka donganta na asing.

II. Marhite turpuk on, dipaingot tu hita asa unang moru holongta tu angka donganta tudos tu dirinta sandiri. Jumolo borhat ma hita sian hadirionta songon Huria ni Tuhanta na ingkon mangolu di bagasan habadiaon jala ingkon badia do hita saluhutna (3 Musa 19:2). Tutu hira na maol do pandohan “ingkon badia” hita molo tapahusorhusor di bagasan rohanta. Hira na so boi hita badia ala jotjot hita madabu di bagasan dosa.

 Alai, tutu do na pinangido ni turpuk on tu hita asa saluhut bangsoNa mangolu di bagasan habadiaon. Jala tujuan ni bindu 19 on i ma di na laho manogunogu jala mangajari asa saluhut angka na porsea mangolu hombar tu lomo ni roha ni Tuhan i di angka ragam ni na masa. Tung pe di habuangan Babel nasida hatiha i. Alai, ala naung marsangkap do TUHAN i laho paluahon nasida, dipangido marhite turpuk on asa tung dihangoluhon nasida habadiaon i. Jala dung haruar nasida sian habuangan i, pangajarion i gabe dasor ni ngolunasida di parngoluonna naimbaru, songon jolma naung dipalua.

 Hira songon dia do habadiaon na pinangido ni Tuhanta tu hita marhite hataNa di bagasan partangianganta sadari on? On ma na naeng dipasahat tu hita:

1. Huria Na Badia Mangaramoti Donganna Na Pogos

 Huria, i ma daging ni Kristus (1 Kor.12:27) jala Kristus do Ulu ni huria i (Ep.1:22). Molo tarajumi dirinta on huria, na pamatang ni Kristus do hape hita on. Jala ala badia do Kristus, i do asa dipangido hita mangolu di bagasan habadiaon. Ini bukan pilihan, tetapi ini keharusan!! Borhat sian hadirionta songon daging ni Kristus jala ingkon badia do ngolunta, naeng mangalehon pangantusion tu hita:

 Habadiaon na pinangido sian hita, jumolo pasidingkhon roha na egois, yang hanya mementingkan diri sendiri. I do na niajarhon tu hita asa “taparsoada dirinta (menyangkal diri).”

 Di ayat 9-10 turpuk on tangkas disoarahan asa nasa na adong di dirinta, so holan hita nampunasa, dohot do halak na ringkot siurupon (na pogos) nampunasa. Boasa? Ala dipasupasu pe hita asa gabe pasupasu tu liat portibi on. Jangan pernah katakan bahwa harta yang kita miliki saat ini adalah mutlak milik kita sendiri. Alai, na dibahen Tuhanta do hita gabe habaoran ni pasupasu tu angka donganta na asing. Hita do dipangke Tuhan i mangalusi angka tangiang ni donganta na mangido pangurupion tu Ibana. Ise na nidok halak na pogos di turpuk on? I ma angka na so adong tano di ibana laho mangula jala manggotil sian i, angka halak dagang (orang asing) na tinggal di hutanta, angka ina na mabalu dohot angka dakdanak na so adong be natorasna (yatim, piatu).

 

 Marhite ayat 11-14 diarahon asa sude hita marpangalaho dohot manghatahon na sintong jala na so olo papeolhon uhum (jujur dan berlaku adil). Dang boi hita manangko, margabus, masipaotootoan, manolon na tutu marhitehite Goar ni Tuhan i (bersumpah dusta demi nama Tuhan),  mangarupaon dongan (memeras sesama manusia), mandoboon ugasan ni dongan (merampas harta sesama), ndang jadi pogoonta upa ni halak pangula (menahan upah), mambura halak na nengel (mengutuki orang tuli), jala mambahen partuktuhan di dongan  na mapitung (menjadi batu sandungan bagi orang buta). Baliksa, mangolu ma haholongon i di hita, taurupi ma angka donganta.

 

 Di ayat 15 dipertegas tu hita asa mangolu di bagasan hatigoran dohot hasintongan. Ingkon sadalan do holong dohot hasintongan. Boi do ala holan holong na adong di hita, gabe mago hasintongan. Baliksa, olo do ala holan hasintongan na tapatuduhon, mago ma holong sian hita. Alai, molo sala didok sala, molo sintong dok ma sintong, dang jadi hita papeolhon uhum, memutar balikkan fakta jala marnida bohi asa dapotan pangomoan hita sian i. Sadalan ma holong dohot hasintongan.

 Roha pangoloion i do na dipangido Ibana tu hita, ala Jesus Kristus na manguluhon hita, rade ma hita mangoloi songon pamatangNa hita. I do na patuduhon habadiaonta. Panghaholongion tu angka donganta na ringkot siurupon patuduhon hita na tutu diparenta jala mangoloi pangidoan ni Tuhanta Jesus. Asa saluhut na mangulahon hataNa marhite na manghaholongi donganna, i do na mambahen gabe dohot hita diparbadia Kristus.

2. Huria Na Badia Manghangoluhon Holong Na Sian Tuhan Jesus

 Ala holong do na niajarhon ni Tuhanta laho pasingkophon saluhut Patik i, i do na gabe hangoluanta. Mangulahon saluhutna Patik ni Tuhanta, ndang boi pasingkophon saluhutna na pinangidoNa tu hita. Alai, molo tasuan holong na sian Tuhanta, secara tidak langsung na mangulahon Patik ni Tuhanta do hita. Isarana: Boi do hita saleleng mangolu ndang hea mamunu jolma, alai belum tentu alani holong hita mangulahon i. Baliksa, molo holong do na mangolu di hita, pasti ndang hea hita mamunu jolma.

 Holong i do na manjaga pangalahonta dohot panghataionta. Na so jadi do jolma na manghangoluhon holong di rohana gabe mangalap manaruhon hata manghata donganta, ala boi do i gabe patubu parbadaan. Jala ringkot hita pasidinghon nasa hosom sian rohanta, alai ingkon mangalehon sipasingot do hita tu angka donganta asa unang manean dosa hita alani ibana. Ala sian tanganta do tungguhonon ni Tuhan i mudar ni pardosa/parjahat i molo tapasombu ibana mate di bagasan hajahatonna. (Hesekiel 3:18).

III. Dipangido Tuhan Jesus, Tuhanta i do hita asa tongtong mangolu di habadiaon, tung pe maol adopanta na masa on. Tapapos rohanta, dipalua Tuhanta do hita sian na masa on. Alani i, tapasomal ma mangolu di habadiaon na sian Tuhanta Jesus Kristus, lumobi ma manghaholongi angka donganta tudos tu dirinta sandiri, ala naung dipatuduhon Tuhan Jesus sada tiruan, i ma manghaholongi hita, pola mate Ibana di hau pinarsilang laho humophop hita pardosa on. Asa molo naung dipalua hita sian na masa on, nunga tahangoluhon ngolu na hombar tu lomo ni roha ni Tuhan i.  Amen.

 

Syalom..!!

Tuhan Jesus mamasumasu hita..!!

Pdt. Ferdinand Fernando Silaen