1 KORINT 3:10-17



EPISTEL MINGGU XXI DUNG TRINITATIS

Minggu, 30 Oktober 2020

Epistel         : 1 Korint 3 : 10 – 17 

Topik           : Haimbaruon Ni Partondion

(Revolusi Spiritualitas)


Angka dongan na hinaholongan di bagasan Tuhan Jesus Kristus..!! 

Di na laho pajongjonghon sada bagas manang bangunan na permanen, ringkot do manatap tu naumotikna 10-20 taon tu jolo. Boasa? Asa unang marisuang bangunan i alani kondisi alam, pembangunan infrastruktur na jonok tu bangunan i dohot renovasi haduan tu bangunan manang bagas i. Jala na rumingkot diparrohaon, i ma ojahan ni sada bagas manang bangunan i. Ingkon bagas jala kokoh do ojahan i asa hot hajongjongan ni sada bangunan tung pe tu pigapiga taon na ro mangadopi perubahan kondisi alam, pembangunan infrastruktur na jonok tusi jala naeng patupaon renovasi.

Songon i ma nang jamita di partangianganta sadari on. Di na mangadopi hamaolon dohot parungkilon huria na adong di Korint, dipaingot si Paulus do nasida marhite turpuk on. Masa do hatiha i angka parbolatbolatan di tongatonga ni huria i alani angka pangiburuon dohot parsalisian. Adong na mandok dirina, “ahu do sisean ni si Paulus,” “ahu do sisean ni si Apolos.” Ndang holan i na ingkon adopan nasida, nunga godang na mamboan poda haliluon na mandok, “ndang holan Kristus na boi paluahon jolma, adong do hagogoon na sian portibi on.”

I do alana dipaingot si Paulus huria i asa marningot hadirion ni nasida jala tudia do nasida marojahan, asa boi nasida mulak dibagasan hasadaon ni roha jala margogo mangadopi angka na mamboan poda haliluon i. Diboan si Paulus umpama taringot tu pande bagas na bisuk na pajongjonghon bagas, i ma huria i. Alani i, tapaihutihut ma di bagasan tolu point na hupatupa hami laho mangurupi hita mangantusi turpuk on:

1.           Holan Ala Asi Ni Roha (Ay.10)


Dung manaek Tuhan Jesus tu banua ginjang, dipasaorhon do Tondi Parbadia tu angka sisean dohot tu ganup angka na porsea, i do na tahaporseai mula hajongjongan ni huria di tongatonga ni portibi on. Tondi Parbadia do na mangajari angka sisean dohot angka na porsea sahat tu partingkian nuaeng on asa tongtong mamboan barita na uli sian Tuhan Jesus tu sude jolma di portibi on. Laos barita na uli i do na gabe barita haluaon tu angka jolma, ise na porsea jala tardidi, i do na dapotan haluaon (Mark. 16:16).

 

So adong gogo ni jolma laho mamaritahon i molo so Tondi Parbadia na mangajari jala margogoihon. Jala ndang holan tu angka pangula ni huria rajuman na ingkon mamboan barita na uli, saluhut jolma naung porsea tu Jesus ingkon mamaritahon barita na uli i tu liat portibi on.

 

I do na paingothon hita angka naung manjalo asi ni roha na sian Kristus, na pasidohot do hita mamaritahon barita na uli di tongatonga ni parngoluonta. Songon hita huria na pinajongjong di tano Batak, tahamauliatehon angka missionaris sahat tu pangula ni huria naung hea mangula di tongatonga ni hurianta. Ndada hagogoon dohot bisuk nasida na patupahon i saluhutna, alai Tondi Parbadia do na manjou jala mangajari nasida, tarparsaulihon do hita di barita haluaon. Ndang na hajolmaon ni na mamboan barita na uli i na naeng jungjungonta, alai haporseaon nasida do na ingkon tiruonta jala ulahononta di ganup angka ulaonta siganup ari. I do tugas di hita di na laho pauliulihon huria ni Tuhan Jesus.

 

2.    Jesus Kristus Do Ojahan Ni Huria (Ay.11-15)

Ndang haru singkop (sempurna) huria i, molo so Kristus i sandiri na pasingkophon. I do rajumanta di ngolu ni partondionta. Tapatupa pe angka program ni huria marhite Punguan Kategorial (ASM, Remaja, Naposobulung, Ina, Ama, Lansia) manang program pembangunan, ndang haru singkop molo so di bagasan pamujian tu Tuhan Jesus. I do rupani marnida angka barita na masa, godang angka parsalisian di tongatonga ni huria alani pembangunan dohot angka program ni huria. Ringkot do sulingkiton parsitutuon dohot tujuan ni program i asa diboto aha do sialana gabe tubu angka parsalisian. 

Tupa angka program na marragam di ganup huria laho pahembanghon huria i. Taida jala rimangonta ma angka program naung hea taulahon di tongatonga ni huria, songon dia do saleleng on motivasi di hita laho mangulahon i:

a.      Pembangunan: Fisik ni huria i do na rumingkot pinauli manang partondion ni huria i?

b.     Parende/Koor: Haulion ni soara parende i do na rumingkot pinauli manang haulion di na mamuji Kristus, Raja ni huria i?

c.      Ngolu ni partondion: Habadiaon na holan di bagas joro na pinauli manang habadiaon di ngolu ganup ari?

d.     Parmingguan: Parsombaon na holan manjalo pasupasu do na rumingkot manang parsombaon ala naung gabe habaoran ni pasupasu?

Lumobi di partingkianta nuaeng on di masa Pandemi Covid-19, hira na tertunda sude nasa program naung ditotophon di Rapot Huria taon 2020. Jala boi dohonon maol dope hita patupaon Natal Kategorial songon na somal di bulan Desember 2020. Na masa i, boi do gabe alasan asa gale haporseaonta? I do na digombarhon si Paulus di ayat 12, asa molo dipauli di atas ojahan i sian: “sere, perak, batu na arga” manang “hau, lamlam dohot durame.” Tontu marasingasing do “ketahanan” parhorhon ni i. Jala oloonta do pandapot na mandok holan sian “sere, perak dohot batu na arga” do na boi manahan di api, ndang matutung hona api. Baliksa, hau, lamlam dohot durame, i do na mura tutungon ni api.

Songon i ma nang hita huria maradophon na masa on. Molo ro ujian (api) di masa Pandemi Covid-19 on ndang na mambahen gale haporseaonta, naeng ma lam tasulingkiti haporseaonta jala lam marsiajar hita di na masa on. Ndang boi tutungon ni na masa haporseaonta, ala sintong do hita saleleng on pauliulihon haporseaonta di bagasan huria i.

Aut sura pe ndang boi patupaon ni huria angka Natal Kategorial (ASM, Remaja-Naposobulung, Ina dohot Ama) di taon 2020, ndang na gabe padaohon hita sian Tuhan Jesus. Gabe lam ingotonta do na masa on, na mangajari jala paingothon hita asa tongtong marojahan di haporseaon na sintong. Tung songon dia pe na masa, hot ma hita di bagasan Tuhan Jesus Kristus.

 

3.    Tondi Ni Tuhan I Ma Na Mian Di Bagasan Halak Na Porsea (Ay.16-17)


Mulak ma hita di bagasan parsombaon jala haporseaon na sintong tu Tuhan Jesus. Ai didok do hita bagas joro ni Tuhan i jala na mian do Tondi Parbadia di ganup angka na porsea. Na dipapungu Tondi Parbadia do hita saluhutna, i do rupani asa martahan huria i sahat tu partingkian nuaeng on. So ala gogo ni pangula nang ruas asa hot hajongjongan ni huria, alai Kristus i sandiri do naung gabe ojahan di hita huriaNa. Alani i, lam tapauli ma ngolu ni partondionta, hot ma di bagasan Kristus jala sada hita huriaNa asa jaloonta tumpal hangoluan naung pinaradeNa tu hita. Amen.

 

Salam sehat !!

 

Syalom.

 

Tuhan Jesus mamasumasu.

 

Pdt. Ferdinand Fernando Silaen.

Komentar

Posting Komentar

Postingan populer dari blog ini

MAZMUR 85:9-14

Gambar
TULISAN KHOTBAH MINGGU ADVENT  II Minggu, 06 Desember 2020 Evangelium :  Mazmur 85 : 9 – 14 Topik            :  Keselamatan Dari Tuhan Sudah Dekat                          (Nunga Jonok Haluaon I) Saudara-saudari yang terkasih di dalam Tuhan Yesus Kristus..!! I.     PENDAHULUAN Pada umumnya, setiap orang yang mengalami kegelisahan hidup oleh karena pergumulan, penyakit yang diderita, kesulitan perekonomian dan berbagai permasalahan yang membuat hidupnya sangat terbeban, pasti akan mencari solusi agar kegelisahan itu secepatnya berlalu. Berbagai cara akan dilakukan agar seseorang itu mendapatkan ketenangan. Tentu tidak satu atau dua kali saja seseorang mengalami kegelisahan di dalam hidupnya. Dan hal yang sudah pasti juga, dia sudah tahu kepada siapa dia akan “bercerita” dan mencari solusi. Bisa kepada kerabat, saudara, keluarga atau kepada orang lain yang dapat dipercaya. Secara khusus kepada orang-orang yang percaya, dia pasti sudah tahu kepada siapa pertama kali
Baca selengkapnya

KEHIDUPAN DI DALAM JANJI TUHAN (KEJADIAN 9:8-17)

Gambar
  TULISAN KHOTBAH MINGGU INVOCAVIT “Bila Ia Berseru Kepada-Ku, Aku Akan Menjawab” ( Mazmur 91 : 15a ) Minggu, 21 Februari 2021 Evangelium     :  KEJADIAN 9 : 8 – 17 Topik Minggu :  Janji Dan Kuasa Allah   Saudara-saudari yang terkasih di dalam Tuhan Yesus Kristus..!!   I.               PENDAHULUAN Teks di dalam perikop ini berasal dari sumber P ( Priest , kaum Imamat). Secara keseluruhan di dalam sumber P dan secara khusus di dalam teks ini dituturkan tentang sejarah keselamatan Israel. Dalam peristiwa mengenai air bah, secara terperinci penulis dari sumber P memaparkan bagaimana detail dari peristiwa, tokoh dan beberapa objek di dalam sebuah kesimpulan tentang “Kuasa TUHAN atas bumi dan semesta.” Secara penulisan, cerita mengenai air bah tetap mengarah kepada suatu Subjek yang tidak dapat diganggu gugat, yaitu TUHAN yang transenden (agung, berkuasa). Ketika “pusat” dari pemberitaan itu telah didapatkan, maka secara tidak langsung tulisan ini juga menyiratkan bagaim
Baca selengkapnya

YOHANES 3:14-21 / JOHANNES 3:14-21

Gambar
PANURATAN NI JAMITA PESTA NATAL II Sabtu, 26 Desember 2020 Evangelium : Johannes 3 : 14 - 21 Topik              : Holong Ni Debata Na Paluahon                           (Kasih Allah Yang Menyelamatkan) Angka dongan na hinaholongan di bagasan Tuhan Jesus Kristus..!! I.          PATUJOLO Buku Evangelium Johannes disurathon sahalak Sintua na sian huria Epesus na margoar Johannes. Disurathon evangelium on hira di taon 100 M. Molo jinaha sude buku Evangelium Johannes, dipatandahon do nasida “hira” na jonok tu masa ni Tuhan Jesus di tingki manghobasi gabe Jolma di portibi on. Hape sasintongna, na tarboan do ibana di “ pokok-pokok fikiran ” ni si Johannes, sisean ni Tuhan Jesus. Sada situasi na masa na diadopi halak Kristen di tingki panuratan ni Evangelium Johannes, i ma paraloan sian horong Gnostik (Gorik). Alani i, “ pola bahasa ” na sinurathon ni buku Johannes on mamangke hata filosofis songon na masa hatiha i, di na laho mangalo tantangan na ro sian horong Gnostik
Baca selengkapnya