YEREMIA 29:1-7 / JEREMIA 29:1-7 (SERMON)

SERMON EVANGELIUM 

MINGGU XXIII NDUNG TRINITATIS

HKBP RESSORT KUTACANE

Di Ari Sabtu, 14 November 2020

Turpuk:    Jeremia 29 : 1 – 7 

Topik :      Patulushon  Hadumaon

                 (Mewujudkan  Kesejahteraan  Bersama)

I.              Patujolo

Jeremia ima sahalak na tarjou gabe panurirang di taon 626 sM. Mangula do ibana di pangujungi partingkian harajaon Asyur sahat tu harajaon Babel na manggomgomi Israel, sahat tu hinamago ni Jerusalem taon 586 sM. Dipillit jala dipabangkit do panurirang Jeremia laho manurirangi di tongatonga ni bangso Juda na tongon hona rimasan ni Jahowa (Heber: YHWH). Ganjang do panurirangon ni si Jeremia di bangso i pola mamolus partingkian ni pigapiga raja na manggomgomi bangso i. Jala mansai dokdok do ulaon na pinasahat tu panurirang Jeremia, ai nunga sandok bangso i manundalhon Debata ni Israel.

Nuaeng masuk ma hita tu na masa di turpuk Evangelium sadari on. Di taon 601 sM, mangalo (memberontak) do raja Yoyakim tu harajaon ni Babilon, alai talu ma nasida jala mate ma si Yoyakim maradophon Babilon i. Dung i digantihon anakna ma si Yoyakim na margoar si Yoyakin na manguluhon bangso i. Borat situtu do na niadopan ni si Yoyakin hatiha ala pemberontakan ni amana si Yoyakim. Pola dohot ibana tarbuang tu Babilon raphon dohot maribu halak bangso Israel.

Dung masa i, dipasahat ma panggomgomion ni Jerusalem tu si Zedekia, na gabe “boneka” ni bangso Babilon. Mangalehon panurirangion ma si Jeremia dungkon na masa i, asa unduk bangsona tu panggomgomi ni Babilon ala i do na hinalomohon ni Debata (27:1-11).  Alai, dung ditariashon panurirang Jeremia Hata ni Jahowa tu bangso i, gabe dihasogohon bangso i do si Jeremia, termasuk ma horong ni angka sintua ni bangso i songon i nang angka malim.

Dihara angka malim do saluhut bangso Israel asa marmusu dompak si Jeremia ala hata panurirangon napinasahatna. Jotjot do ibana dipaburuburu, diancam jala sahat tu na dihurungkon jala pola do martahi bangso i naeng mangonggop hosanna. Sandok tung sireherehean do si Jeremia dibahen bangso i ala hata panurirangonna tu bangso i.

Boasa dialo angka sintua ni bangso i nang dohot angka malim si Jeremia? Ala bangkit sahalak “nabi nasionalis” na margoar Hananya na mandok: di bagasan dua taon talu do halak Babilon tu bangso i. Alai, ro ma hata ni Jahowa tu si Jeremia, na patigorhon saluhutna, hata gabus do na pinasahat ni si Hananya dompak Debata ni Israel, ndang tutu na nidokna i. Ingkon mate do uhumon ni Debata si Hananya ala hata gabus na mamboan goar ni Debata.

Hape, tung pe songon i panurirangon ni si Jeremia, ndang mambahen raja Zedekia gabe porsea tu ibana. Gabe dohot do raja Zedekia padomuhon dirina tu angka horong na naeng mangalo Babilon. Jala di taon 587 sM, talu ma Jerusalem tu Babilon, gabe dohot ma si Zedekia tarbuang tu Babilon.

Dung masa i, dilehon ma dua dalan sipilliton ni si Jeremia: dohot tu habuangan di Babilon manang hot dope di Jerusalem? Dipillit si Jeremia ma asa hot ibana di Jerusalem jala dipabangkit ma ibana gabe panggomgomi (Gubernur) di Jerusalem. Jala tongtong dope ibana marsoara laho manurirangi bangsona marhite surat na tinongos tu Babilon. Surat on ma na gabe turpuk Evangelium di hita di bagasan Minggu XXIII Dung Trinitatis.

 

II.           Hatorangan Ni Turpuk

Ayat 1-3: Surat Tongosan Ni Si Jeremia

Dipataridahon si Jeremia do dirina songon halak na pinillit ni Jahowa. Nang pe songon i na masa, ndang gabe sumurut Jeremia laho manghatindanghon Hata ni Jahowa. Diulahon ibana do parsuruon i di bagasan unduk ni roha dohot pangoloion na tangkas. Diarahon si Jeremia marhite surat on tu bangso i asa mangantusi dalan ni Debata marhite na ingkon mangundukhon diri tu Babilon. Sada dalan do i asa unang mangasahon diri bangso i tu gogona, alai ingkon unduk ma tu nasa na sinangkapan ni Debata tu ngolu ni bangso i.

Songon i nang di hita angka siihuthon ni Kristus. Taboto jala tahilala do parngoluan na itabolus sahat tu tingki on. Ragam ni angka na masa, lumobi pandemi Covid-19 na so marnasalpu sahat tu sadari on. Maol, parir jala dokdok do na tataon nuaeng. Jala sahat tu nuaeng, adong dope deba halak Kristen na patupahon parmingguan di tongatonga ni bagasna be. So holan i, na dohot do marhorhon tu angka ngolu perekonomian ni bangsonta sahat tu hita. Ditamba muse angka cuaca ekstrem na mambahen angka pangula tumatangis mangadopi angka arga ni suansuanan na so songon na somal jala hasil na so songon angka taontaon na salpu.

Alani i ma, ro hata ni Tuhanta on na laho mangapuli rohanta jala manungguli hita di ngolu ni haporseaonta. Ringkot tahangoluhon, ndang adong sangkap ni Tuhan i laho manadinghon hita. Lam dilehon do tu hita nasa dalan na ummuli asa boi idaonta holong ni rohaNa tu hita. Tangi ma hita di soaraNa na ro tu dirinta.

Ayat 4: TUHAN Na Marhuaso Jala Marholong Ni Roha Tu BangsoNa

Hata ni Jahowa Zebaot do na sinurathon ni si Jeremia di isi ni surat on tu bangsona. Dipatuduhon Jahowa Zebaot, na ingkon parmuduonna dope bangsoNa jala ndang olo ditadinghon Ibana bangso i. Molo so parduli be Ibana tu bangsoNa, ndang pola pasahatonNa hata on tu angka bangso na tarbuang i marhite si Jeremia.

Dison ma dipataridahon hadirion ni Jahowa Zebaot tu angka bangso na pinilitNa. Tung tarbuang pe nasida, sude ala pangalaho ni nasida na so olo mangundukhon hataNa. Pola dialo nasida na masa i, hape i do na hinalomohon ni Debata tu nasida. Saluhutna bangso i ingkon unduk do tu Jahowa jala mulak ma nasida gabe marpangoloion tu Debatanasida.

Haundukhon tu na Manompa hita, i do na parjolo ingkon peoponta di nasa ni ngolunta songon halak na porsea. Naeng ma saluhut na taula i hombar tu lomo ni rohaNa sambing. Olo do nian hira na maralo na sinangkapan ni rohanta sian na sinangkapan ni Tuhanta. Alai, sian i do sasintongna naeng dipatuduhon Tuhanta tu hita, so adong na boi mangalo na piningkiran ni Tuhan i. Jala saluhut na sinangkapanNa, ingkon marujung do tu haulion, lumobi gabe pasangaphon Ibana di tongatonga ni portibi on. I do na patuduhon holong ni rohaNa tu hita angka jolma.

Ayat 5: Pauli Inganmu

Sada bagabaga na pinasahat ni Jahowa tu bangsoNa hatiha i. Sian hata on, dipataridahon panarihon na naeng lehonon ni Jahowa tu bangsoNa. Ndang diloas angka bangsoNa haraparon. Didok asa “dipauli nasida bagasna” asa tung boi nasida maringanan jala manguduti parngoluonna.

Jala didok asa dipungka nasida angka porlak, disi do naeng dipasahat pasupasuNa tu angka bangsoNa, asa tarpasupasu tano na niinganan ni nasida. Gabe marparbue ma tu hangoluan nasida siapari marhite sipanganon na naeng panganon ni nasida laho manguduti parngoluonna.

Songon i nang hita na manghilala dope pasupasu na nilehon ni Tuhanta di ngolunta. Molo hot hita di hataNa jala mangolu di bagasan panghirimon tu Ibana, sai pasupasuonNa do nasa na taula. Gabe mangalehon parbue na denggan ma i di ngolunta.

Unang sanga lupa hita di na mandok mauliate tu Ibana di sude pangaramotionNa. Lumobi di luatta molo naung sidung hita manggotil angka suansuanan. Saluhutna na sian Ibana do i. Molo boi dope hita manggotil sian tano na pinasahatNa laho taula, disi do dipatangkas Tuhanta, na holong do Ibana tu hita jala disarihon do ngolunta. Unang lupa hita tu Ibana.

Ayat 6: Marhasohotan Jala Marpinompar Ma Hamu

Ndang tubu di roha ni Jahowa asa suda bangsoNa. Alai, dipangido Ibana asa tung muba roha ni nasida, gabe marpangoloion tu Ibana. Marhite ayat on dipataridahon Ibana holongNa tu bangsoNa asa marpinompar, asa unang salpu bangso i, tung pe di bagasan habuangan. Disuru do nasida asa tumubuhon anak dohot boru, asa lam martamba bilangan ni bangsoNa.

Songon i nang di hita nuaeng, ndang lomo roha ni Tuhan Jesus asa mate hita di bagasan dosanta. Alai, na lomo do rohaNa asa tung lam dipaimbaru dirinta raphon dohot angka keluarga. Marpinompar dison, ndang fokus tu kuantitas alai tu kualitas ni haporseaon. Tung mansai las do roha ni Tuhanta, asa lam godang bilangan ni angka na porsea tu Ibana. Jumolo ma tapataridahon sian tongatonga ni keluarganta. Asa boanonta nasida mananda jala mangantusi Tuhan Jesus di ngolu ni haporseaonna. Asa mardalan nasida di dalan lomo ni roha ni Tuhan i.

Ayat 7: Ringkoti Jala Tangianghon Huta Ingananmu   

“Jangan pernah mengajari matahari untuk bersinar. Tetapi belajarlah kepada matahari bagaimana bersinar untuk memberi manfaat kepada yang lain.” Sada pandohan na mamboan hita tu pangantusion taringot tu hadirionta songon jolma na tinompa. So pola ajaranta mataniari i asa mangulahon songon na pinasahat ni na Manompa ibana. Hita do na gabe marsiajar, mataniari pe ditompa asa gabe pasupasu tu angka na tinompa na asing. Lam ma hita angka jolma na ingkon mangalehon hatiuron jala gabe habaoran ni angka pasupasu di ngolu ni angka tinompa na asing.

Dilehon do tu hita angka tugas asa tung unduk tu na manompa hita jala manghaholongi angka na humaliang hita. Songon na didok di ayat 7 on, “ringkoti jala tangianghon.” Sada dalan do i asa dohot humaliangta tarpasupasu marhite angka pangulaon dohot tangiangta. Ndang na gabe hita na “manegai” angka parsaoran dohot situasi alam na adong di ingananta nuaeng. 

Manang didia pe hita maringanan, songon bangso na tarbuang di turpuk on, pangkeon ni Tuhan i dope asa dapotan nasida manang ingananta i pasupasu na sian Ibana. Alani i, rade ma hita mangalehon na dumenggan tu angka humaliangta jala manangianghon nasida. Ai lehononNa do hasonangan tu hita rap dohot nasida.

III.        Sipahusorhusoron

Hata ni Tuhanta na itabege ingkon patubu panolsolion. Muba sian na ganggu di huaso ni Tuhan tu pos ni roha di hagogoonNa jala marhataridaan di parange na denggan. Parange na denggan i do pataridahon halak porsea jala olo manangihon Hata ni Tuhan i. Na mangula do hataNa paingothon hita asa marhamubaon marhite ragam ni na masa. Aut boha do naung sorop tu hita sahit hatangkangon, ginjang ni roha ni bangso Israel, na manghaginjangkon hasurunganna, hape ndang diparangehon lomo ni roha ni Tuhan i. 

Molo masa angka na masa, ndang sae holan arsakhonon, alai ingkon pangkeon i pasolhot diri tu Tuhan i. Nasa peristiwa na terjadi ingkon hilalaonta i songon tanda-tanda na paingothon hita mangulahon lomo ni rohaNa. Holan marhite na pasolhot dirinta tu Tuhan i do boi botoonta lomo ni roha ni Tuhan i, i do joujou tu angka na manangihon soaraNa. Amen.

Salam sehat !!

 

Syalom.

 

Tuhan Jesus mamasumasu.

 

Pdt. Ferdinand Fernando Silaen.