YAKOBUS 5:1-6 / JAKOBUS 5:1-6

EPISTEL MINGGU XXIII DUNG TRINITATIS

Jumat, 13 November 2020

Epistel: Jakobus 5 : 1 – 6 

Topik  : Patulushon  Hadumaon (Mewujudkan  Kesejahteraan  Bersama)

Angka dongan na hinaholongan di bagasan Tuhan Jesus Kristus..!!

Songgot situtu do roha molo manjaha ayat 1 di turpuk jamita partangiangan sadari on. Lumobi molo tardok jala didok na manjaha turpuk on masuk tu horong halak na mora. Sai hira na mardosa jala manaon jea do halak na mamora. Di horong na asing, gabe mabiar do halak na marsangkap laho gabe mamora. Na tutu do, na so dihalomohon Tuhanta Jesus, halak gabe na mora? Tapaihutihut ma alus na naeng dipasahat turpuk on tu hita.

Surat Jakobus ima sada pangajarion dohot poda taringot tu ngolu ni haporseaon (ngolu partondion) ni halak Kristen. Diondolhon do di surat Jakobus on mangarajumi angka pangunjunan na masa i gabe las ni roha jala na manguji haporseaon huhut marbenget ni roha. Molo didok pangunjunan na marlapatan do i di Bahasa Indonesia “ujian” tu haporseaon. Jala surat on laho patoguhon pangajarion ha-Kristenon di na manghangoluhon ngolu ni angka na porsea. Inti ni pangajarion ni surat on laho mangarahon parngoluon ni angka naung mananda Tuhan Jesus di bagasan haporseaon marhite na mangolu dohot na mangula di bagasan pangajarion ni Ibana na sintong.

Godang do na manguji haporseaon ni halak Kristen sian na jolo sahat tu nuaeng. Lumobi di partingkianta nuaeng on, di na rap hita mangadopi pandemi Covid-19, laos ditamba muse panghilalaan ni angka dongan   na martani di angka arga ni eme, jagung, cokelat, dna jala arga ni hasil panen turun sian na somal, ditamba angka dongan na berprofesi na asing. Tontu godang do dibagasan taon 2020 on na marungkil di angka perekonomian, tamba ni parungkilon sian Covid-19. Laos i do sipata mambahen deba angka dongan gabe gale di angka parsaoran dohot Tuhan i, alani hinaringkot na mangalului hangoluan siapari.

Hagaleon dibagasan haporseaon ala na mangalului na ringkot di ngolu siapari, i do masa di tongatonga ni halak Kristen hatiha i. Lam godang halak Kristen na lam gale parsitutuonna na marsomba tu Tuhan Jesus. Diida apostel Jakobus do godang halak Kristen hatiha i na parjolo situtu mangalului arta ni portibi sian arta na so olo salpu i. Sude tingkina holan papungu arta na sian portibi jala marhaposan nasida tu arta i, na mambahen gabe lam ditadinghon Kristus i di ngoluna. 

Godang naung papunguhon artana hatiha i gabe lam mamora nasida, hape ditutup do simalolong nasida marnida angka dongan na pogos jala na susa mangalului hangoluan siapari. Hira artana i holan na ringkot di ibana, sai marnahurang, sai marnahurang di ngoluna. Hape, molo dibagasan sada parpunguan ni halak na porsea, ringkot situtu do roha na marpanarihon di ngolu ni angka donganna na ringkot siurupan. Di na masa hatiha i jala dipaumbuk tu partingkianta nuaeng, dia do na naeng dohonon ni jamita on tu hita halak na mangihuthon Tuhan Jesus?

1.   Tumatangis Jala Mangangguhi Do Ujungna Jolma Na Holan Mangharinghothon Arta Ni Portibi

Adong pandohan na mandok, “Hira na manginum aek laut do hamoraon i.” Taboto do dai ni aek laut na ansim, na sai tong mambaen mauas. Songon i do molo taringot arta na sian portibi, sai na marnahurang jala lam mauas do baenonna. I do rupani, ala diboto Tuhanta i do ujungna molo holan mangharingkhothon arta portibi gabe ndang olo puas, gabe diarahon do hita asa unang jumolo mambahen “hamoraon” gabe tujuan ni ngolu.

Jala sude na sian portibi, ala hadirionna ingkon salpu, songon i do nang arta sian portibi, na lao salpu do sude. Alani i, dipaingot tu hita, asa unang hita “disalpuhon” alani arta sian portibi. Unang masa ditongatonga parpunguan ni halak Kristen, angka na berkeluarga jala na bertetangga, marbada holan alani arta. Olo do sega parsaoran jala sega holong ni roha alani arta i. I do na nidok, gabe tumatangis jala mangangguhi do ujungna jolma na holan mangharingkothon arta di ngoluna.

Naeng dohonon disi, ia arta i ma pasupasu na nilehon ni Tuhanta tu angka jolma. Laos i do dalanna jolma na dapotan arta i, gabe mabaor ma pasupasu na sahat tu ibana, tu angka donganna na ringkot urupan. Sada dalan do binahen ni Tuhanta asa dohot dapotan pasupasu angka donganta na asing. Asa unang olo hita tumatangis jala mangangguhi di pudian ni ari, unang tabahen prioritas ni ngolunta holan mangalului arta ni portibi. Alai, taharingkothon ma mangolu jala mangula di hata ni Tuhanta.

 

2.   Pangke Tingkim Papunguhon Arta Na So Olo Salpu I

On ma na rumingkot idaonta sian jamita on. Ai tingki i do sasintongna arta na umarga jala parjolo dipasahat Tuhanta tu angka jolma. Songon dia do pangkeon ni jolma tingki na jempek di portibi on, laos i do gabe dalanna mangarade di hangoluan sogot naung pinarade Tuhan Jesus. Status sosial (na mora, na pogos) na binahen ni jolma di portibi on, ndang marlapatan i di banua ginjang. So alani hamoraon manang hapogoson dalan laho sahat tu surgo hasonangan i. Lapatanna, mamora nang pogos pe hita saleleng mangolu di portibi on, mangulahon na hinalomohonNa do na ringkot ulahononta.

Hira onom Minggu nari nama bolusonta taon 2020 on. Sahat do hita tu ujung ni taon 2020 on manang daong? Binsan boi dope hita marhosa, ringkot ma lam tapajonok dirinta tu Ibana jala ringkot di hita laho marnida jala mangurupi hasusaan ni angka donganta. Jala molo tung pe sahat hita tu taon 2021, ndang taboto, atik na hita do muse ringkot urupon ni jolma manang daong?

Alani i, binsan mangolu dope hita, di partangiangan parpudi di taon 2020 on, rade ma hita paubahon dirinta tu na dumengganna. Tapangido hadumaon (kesejahteraan) tu dirinta nang tu donganta. Molo dilehon tu hita, laos hita ma pangkeon ni Tuhanta laho mangalehon hadumaon tu angka donganta. Tu banua ginjang do na tinuju ni halak na porsea di Tuhan Jesus. Alani i, lam marsitutu ma hita di na mangulahon hata ni Tuhan i di ngolunta. I do ngolu ni halak na porsea na mangulahon hatigoran na hinalomohon Tuhanta Jesus. Amen. 

Syalom..!!

Tuhan Jesus mamasumasu hita..!!

Pdt. Ferdinand Fernando Silaen