DANIEL 6:1-15

EPISTEL MINGGU XXII DUNG TRINITATIS

Minggu, 08 November 2020

Epistel: Daniel 6 : 1 – 15 

Topik  : Parsidohotan Ni Halak Kristen Di Politik

             (Tanggung Jawab Orang Kristen Dalam Politik) 

Angka dongan na hinaholongan di bagasan Tuhan Jesus Kristus..!!

Hira na bangkol do molo di huria disungguli taringot tu “POLITIK,” lumobi ma molo di na manangihon jamita, olo do hira na asing pangantusionta (mengarah kepada hal negatif). Diarahon topik ni Minggunta hita asa parsidohot angka siihuthon ni Kristus di “Politik.” Asa tigor pangantusionta tu topik ni Minggu na umbuk tu jamita partangianganta sadari on, jumolo ma taambolonghon surasura pangantusion na suman tu angka ulaon na negatif di perpolitikan na masa di luatta dohot di negaranta jala borhat hita sian dasor manang pangantusion na sintong.

 

“Politik” borhat sian hata Belanda: “politiek” dohot hata Inggris “politics” na ro sian pangantusion ni halak Gorik “ta politika” na marhadomuan tu “warga negara.” Jadi, sian etimologi ni hata i, dapot ma pangantusion ni “politik,” i ma sada parbinotoan na marhadomuan tu warga negara na manghamham wilayah kekuasaan, ideologi dohot kesejahteraan masyarakat.

 

Sahalak na bisuk na margoar Aristoteles mambahen sada pandangan klasik taringot tu Politik, hira songon on ma: “Politik digunakan masyarakat untuk mencapai kebaikan bersama yang dianggap memiliki nilai moral yang lebih tinggi daripada kepentingan swasta. Kepentingan umum tersebut berupa keadilan, kebenaran dan kebahagiaan.” Tontu molo borhat hita sian pangantusion na mandasor disi, hira so adong pangantusion na sala jala maralo tu ngolu ni haporseaon halak Kristen. Boasa?

a.      Na dohot do halak Kristen songon bagian ni “warga negara.”

b.     Na dohot do halak Kristen mamboan “pengaruh” tu bangsa dohot negara asa lam dumengganna kesejahteraan, kemakmuran, kebenaran dohot keadilan.

 

Jala songon hadirion ni halak Kristen di tongatonga ni negaranta, dilehon do tu ganup warga negara, i ma hak politik di na laho mamillit angka panggomgomi, ambil bagian dalam perpolitikan, mangalehon soara marhite angka Dewan Perwakilan Rakyat jala pajongjonghon hatigoran di bangsonta songon ulaon na pinasahat ni Tuhanta Jesus di hita angka siihuthonNa.

 

Alani i, marhite jamita di partangianganta sadari on, taida ma angka na ringkot ulahononta songon halak Kristen dohot warga masyarakat di bangsonta:

1.      Halak Kristen Na Haposan

Dipatuduhon turpuk on ma tu hita sahalak na margoar Darius, i ma sahalak raja na marhuaso di Madai. Dipabangkit ibana ma saratus dua pulu induk na mamarenta di harajaon i jala dipabangkit tolu halak sintua nasida. Sian na tolu sintua i, sahalak ma na margoar Daniel, na ingkon unduk angka induk harajaon i tu nasida.

 

Marhasurungan do si Daniel sian angka na di toru ni raja Darius hatiha i ala martondi na sumurung do ibana (memiliki roh yang luar biasa). Ala marhasurungan si Daniel sian angka na asing, tung pe sahalak sian pigapiga halak Jahudi na dohot tarbuang do ibana, disangkapi roha ni raja i ma pabangkithon ibana bahen palumean ni sandok harajaonna i.

 

Ala holong ni roha ni raja i tu si Daniel jala asa unang saut sangkap ni raja tu si Daniel, gabe mangalului sindir (mencari alasan dakwaan) angka sintua dohot angka induk i dompak Daniel taringot tu panggomgomina. Alai, ndang adong sindir (dakwaan) jumpang nasida manang hajahaton nanggo sada, ai haposan do ibana, ndang adong jumpang sala, manang hajahaton nanggo sada di ibana.

 

Sada tiruan na mansai arga do na boi idaonta sian si Daniel. Ndang adong tarsurat di Bibelta on boi dapotan jabatan na timbo ibana alani:

a.      Nepotisme. So adong “hubungan darah” ni si Daniel dohot raja i, ai sahalak na dohot tarbuang do ibana disi.

b.     Penyogokan. So adong arta nang hepeng na dipasahat ibana tu raja hatiha i asa dapotan jabatan na timbo ibana, ai na tulus do ibana mangulahon angka parenta ni raja (loyalitas kepada pimpinan).

c.      Mambuat roha. Daniel bukanlah sosok yang munafik (baik di hadapan raja, tetapi menusuk di belakangnya). Dao do ibana sian i.

 

Ndang adong pangalaho na maralo tu rumang ni partondion na niulahon ibana songon sahalak jolma biasa. Tutu na dipasahat TUHAN (Heber: YHWH) i do tu ibana habisuhon ala holong roha ni TUHAN i mida ibana na unduk jala ndang marpangalaho na maralo tu ruhut manang patik, na so hinalomohon ni TUHAN i. Jala disi do hasurungan ni si Daniel, ndang dipangke ibana asi ni roha na sian TUHAN i laho manggohi hagiot ni portibi on. Dipangke ibana do saluhutna dibagasan hatigoran dohot hasintongan. Alani i ma, gabe jolma na haposan do ibana di adopan ni raja Darius hatiha i.

 

I do na ingkon ulahononhon ni angka siihuthon ni Kristus di ngoluna. Dilehon Tuhan Jesus do tu hita asi ni roha hombar tu ulaonta ganup. Songon warga negara Indonesia, sai adong do di tongatonga ni ruas ni huria na gabe warga masyarakat biasa jala na gabe perwakilan ni masyarakat di tongatonga ni pamarenta. Lumobi di partingkian na naeng ro, i ma na disangkapi pamarenta di bulan Desember taon 2020 di na laho “Pemilihan Kepala Daerah,” horas dipaingot jamita on ma di hita asa unang taulahon:

1.     Sogok-Menyogok Laho Mambuat Soara Sian Masyarakat, marhite money politic, na mangulahon manang na manjalo. Ai maralo do tu Tuhanta nasa na mangalehon sisip dohot na manjalo sisip. Sotung tarrimas Tuhanta di angka pangalaho na sisongon i.

2.     Ndang Bertanggung-Jawab Marhite Na Mangulahon Gabus Di Angka “Janji-Janji Politik.” Molo disangkapi laho patureturehon luatta nang negaranta on, ingot ma di angka tanggung jawab di na laho pauliulihon luat nang bangsonta. Songon na tarsurat di Jeremia 29:7, “Ringkoti hamu huhut hasonangan ni huta habuanganmuna na Hubahen i, jala tangianghon hamu nasida tu Jahowa, ai molo marhasonangan huta i, marhasonangan ma dohot hamu.”

 

Alani, songon dia pe na gabe tugas dohot kewajiban di hita, na ingkon lohot do di hadirionta songon jolma na haposan, ndang mauas di hepeng nang sinamot, ndang mamangke cara na so tingkos laho mangalului huaso dohot mangulahon ketidakadilan di tongatonga ni bangsonta.

 

Molo sintong, tigor jala haposan hita di adopan ni dongan jolma, gabe dalan ma i patuduhon huaso dohot pasupasu na dilehon Tuhanta tu hita. Asa molo songon i ulaonta, na dohot do hita manjamitahon barita na uli di tongatonga ni negaranta. Jala molo didok hita halak na porsea, na dohot do hita gabe halak na dihaporseai/dihaposi donganta jolma.

 

2.      Halak Kristen Na Mabiar Maradophon Tuhan Jesus

Tangkas do idaonta sian turpuk on, boasa tung lomo roha ni TUHAN i mida si Daniel, marhorhon ma i tu na lomo roha ni raja Darius tu ibana, sude alani haunduhon jala hasatiaonna tu TUHAN i. Ndang dilaosi ibana Patik i, jala ndang dipasiding ibana ngolu ni haporseaonna ndung dijalo jabatan na timbo. Jala tangkas idaonta di turpuk on, ndang diloas TUHAN i angka naposoNa na satia tu Ibana masuk tu bagasan pangunjunan, sai dipalua do sian i.

 

Sada sipaingot do tu hita di partingkian nuaeng on. Tung mansai torop do jolma nuaeng ala marsangkap naeng dapotan jabatan, gabe dipasiding manang dihalupahon Tuhan Jesus. Na mansai lungun idaon, molo adong sian tongatonga ni angka partohonan di huria na gabe mangharingkoti mangalului huaso, gabe dipasiding ma ulaonna songon naposo ni Tuhan i.

 

Songon si Daniel na mangharingkoti ngolu ni partondionna sian huaso na adong di ibana, i do na gabe tiruan di hita. Tung pe adopanna panguhuman laho manguji haporseaonna jala haundukhonna tu TUHAN i, ditiop ibana do gomos haporseaonna tu Ibana. Songon i nang hita, gomos ma maniop haporseaonta dohot angka ulaonta di tongatonga ni huria ni Tuhan i. Unang adong na gabe manimbil jala manadinghon haporseaonna dohot ulaonna di tongatonga ni huria laho mangalului hasangapon jala jabatan na adong di tongatonga ni negara on. Alai, tongtong ma gomos di bagasan hasatiaon jala haundukhon tu Tuhanta Jesus, Raja ni Huria i. Amen.

 

Syalom..!!

Tuhan Jesus mamasumasu hita..!!

Pdt. Ferdinand Fernando Silaen