5 MUSA 18:9-14 / ULANGAN 18:9-14

JAMITA MINGGU XII DUNG TRINITATIS

Minggu, 30 Agustus 2020

Evangelium :  5 Musa 18 : 9 – 14 

Topik            :  Monang Maradophon Huaso Hagolapon

                          (Menang Atas Kuasa Kegelapan  / Occultisme)

Angka dongan na hinaholongan di bagasan Tuhan Jesus Kristus..!      

I.           Konteks 5 Musa i ma di na paingothon bangso Israel asa mulak tu dalan Debata. Boasa ingkon mulak? Ala naung godang haramunon na niulahon marhite angka pangalaho ni nasida. Jala marhite buku 5 Musa on, dipaingot asa unang dihalupahon naung marpadan do bangso i tu Debata na paluahon nasida sian habuangan Misir.

 

              I do songon pamuhai ni turpuk on na mandok, “.....ndang jadi ho marsiajar mangulahon maniru biasbias na niulahon ni angka bangso on/bangso na na mananda Debata” (........ maka janganlah engkau belajar berlaku sesuai dengan kekejian yang dilakukan bangsa-bangsa itu).  Dipaingot ala naung diusehon nasida padanna tu Debata. Jala “gabe” biasbias (kekejian) di Debata angka pangalaho ni nasida.

 

              Laos i do na masa di bangso i hatiha i songon na didok di turpuk on “ai dipabali do saluhutna” angka na mangosehon padanna tu Debata. Jadi dipaingot asa mulak nasida tu dalan ni Debata jala digotaphon ma nasa ihotihot ni huaso angka debata ganaganaan dohot angka hagiot ni portibi on.

 

              Pangidoan ni panurat asa “direformasi total” saluhutna angka pangalaho nasida. Anggiat marhite hamubaon ni roha i, balga asi ni roha ni Debata tu nasida, gabe bangso na bolon muse bangso na pinilit ni Debata, i ma bangso Israel i.

Angka dongan na hinaholongan di bagasan Tuhan Jesus Kristus..!      

II.       Sian konteks ni turpuk i, taarahon muse tu topik ni Minggu na manungguli taringot tu “Okultisme.” Okultisme borhat sian hata Latin na mandok “Occult” na marlapatan: buni manang rahasia manang tersembunyi. Dipahantus ma tu pangantusion, occult i ma nasa pangantusion na buni na marharoroan sian portibi on.

 

              Gabe songon na tartuju tu pangantusion na negatif ala adong do hata “isme” disi. Yang menjadi sebuah “penormaan,” “pengagungan” dan “menjadi sebuah sistem.” Alani hata “isme” on do asa gabe tartuju tu “parsigantungan na sala.” Boasa sala? Ala gabe marsigantung tu nasa huaso ni portibi. Jala dipahantus di topik ni Minggu na mambahen pangantusion tu “hagolapon.”

 

              Boasa ma adong hata “hagolapon” dohot “haholomon”? Hagolapon manang haholomon naeng mangalehon pangantusion manang tartuju tu “portibi.” Boasa? Taingot ma panompaon na dipatupa Tuhanta. Ai holom do parjolo portibi on ala ndang adong dope panondang, isarana: mataniari, bulan, bintang dna. Identitas awal dari dunia adalah gelap. Songon i do haporseaon ni jolma, molo ndang marsinondang Tuhan i marhite hataNa di roha ni jolma marsasahalak, ai holom do pamingkirion, panghataion nang parulaonna.

 

              Adong pandohan na mandok taringot tu hagolapon manang haholomon, “Lam dipatiur jolma, lam dipaholom Tuhan i.” Boasa songon i? Tung so lomo roha ni Tuhan i jolma marsigantung tu angka na tinompa na asing (huaso sian portibi). Marhasurungan do jolma ditompa Tuhan i, alani i dipangido asa tongtong marsigantung jolma i tu Tuhan i.

 

 

Angka dongan na hinaholongan di bagasan Tuhan Jesus Kristus..!      

III.  Manat hita di ngolu ni haporseaonta naung mananda Tuhan Jesus Kristus, i ma Tuhan na ro tu portibi on: patandahon diriNa jala paluahon jolma sian haholomon ni portibi. Taida ma di turpuk on adong 8 point ulaon na so dihalomohon ni Tuhanta sian pangulaan ni jolma:

1.  Sahalak na pabolushon anakna manang boruna sian api (mempersembahkan anaknya laki-laki atau perempuan sebagai korban dalam api)

2.  Mangarunding / Pangarunding (petenung)

3.  Sijujur ari (peramal)

4.  Sitabasi ulok (penelaah)

5.  Parsibalik mata (penyihir)

6.  Sibahen panutupi (pemantera)

7.  Partondung / martondung (bertanya kepada arwah)

8.  Manungkun begu ni na mate (meminta petunjuk kepada orang mati)

 

              Ndang pola talului sadasada sian 8 point i angka dia na niulahon ni jolma sinuaeng on. Jala ndang adong dalan ni jolma na manguhumi jolma na mangulahon na sisongon i. Tung jambar ni Tuhan i do saluhutna.

 

              Alai na ringkot idaonta sian i, i ma motivasi ni jolma mangulahon nasa ulaonna di portibi on. Jolo borhat ma hita songon na tarsurat di 2 Korint 11:14, “Ndang pola longang roha disi, ai nang sibolis i dipasumansuman do ibana songon suruan hatiuron” (Hal itu tidak usah mengherankan, sebab Iblis pun menyamar sebagai malaikat Terang).

  

              Manat hita di ulaon ni sibolis na boi “memanipulasi” jolma mangulahon siulaonna. Isarana songon on: hata “datu” manang “dukun” nuaeng nunga identik tu ilmu supranatural. Alai boha di partingkian nuaeng na nidokna “paranormal” manang “orang pintar.” Aha do parasinganna? Holan taringot tu hata dohot bahasa do na marasing disi. Ulaonna sarupa do. Alai, jolma na laho tu “orang pintar” manang “paranormal” seolah-olah lebih “modern” manang “berkelas,” gabe ndang buni be. Jala tapaihutihut di acara televisi, nunga lam godang angka paranormal na mambahen acarana di televisi.

 

              Saulak na i dohononhu, manat di hamajuon ni zaman nuaeng. Boi sajo hamajuon ni teknologi mambahen hita gabe “lam holom” di parrohaon. Lam dipangke hamajuon i laho mamunu jolma, laho manangko, laho gabe inganan parsigantungan ni jolma. Manat!!

 

              Alani i, marhite turpuk on dipaingot tu hita asa tongtong satia di parsigantunganta tu Tuhan Jesus. Ala nasa “marduahon” Tuhan i di ngoluna, nunga diulahon ibana dosa pangalangkupon. Alai songon halak na porsea jala naung mananda TUHAN i marhite Jesus Kristus, tusi ma hita tongtong marsigantung jala pasahathon ngolu. Ala diparmonang Tuhan Jesus do saluhut angka na mian di Ibana. Amen.

 

Syalom..!!

 

Tuhan Jesus mamasumasu hita..!!

 

Pdt. Ferdinand Fernando Silaen