SERMON EVANGELIUM PARJAMITA 2:4-11 / PENGKHOTBAH 2:4-11

 

SERMON EVANGELIUM MINGGU XIV NDUNG TRINITATIS

  Turpuk           : Parjamita 2 : 4 – 11 

  Topik              : Sisoada  Do  Hagiot  Ni  Portibi  On

                           (Kenikmatan  Duniawi  Adalah  Kesia-Siaan)

 

I.             Patujolo

Buku Parjamita on disurathon di abad 3 sM. Sian buku Parjamita on digombarhon: na masa do “krisis hikmat” di partingkian i. Tanda do sian na tarsurat di buku on na naeng mangajari jala mangalehon poda tu angka panjaha ni buku on, asa diboto dia do na boi sihirimon di ngolu ni portibi on. Molo tajaha di Parjamita 1:1, dibahen do disi  “On ma panghataion ni parjamita, anak ni si David, raja di Jerusalem.” Hira na diboan do hita di pangantusion na raja Salomo do na manurathon buku on, jala hira na tutu do ala targoar do raja Salomo sahalak na bisuk jala marhapistaran. Hape, na dipangke do goar i asa tung godang jolma na manjaha buku on. Sasintongna, ndang si Salomo raja ni Israel i na manurathon buku on, alai sahalak jolma “parjamita” na “bergumul” taringot tu habisuhon dohot hapistaran di abad 5-3 sM.

Hatiha i, adong do sada pangajarion taringot tu Theodisi Ortodox, na mandok jonok do Debata tu angka jolma. Mereka menganggap bahwa moralitas masyarakat adalah moralitas Allah. Oleh sebab itu, orang yang patut memperoleh kesejahteraan pun mengalami sejahtera dan orang yang patut dihukum pun mendapatkan hukumannya. Hape hatiha i masa do angka na mangulahon “ketidakadilan,” gabe ro ma angka parungkilon di angka jolma na marsitutu di haporseaonna tu Debata. Parungkilon na diadopi nasida diantusi saluhutna alani dosa dohot pangalaosion ni nasida tu Debata.

I do na dialo buku Parjamita on. Diarahon do angka panjaha asa mangantusi Debata ndang holan Debata na jonok, alai dohot do Debata na dao. “Debata na dao” lapatanna: marasing do jolma tu Debata jala ingkon mabiar do jolma maradophon Debata. Ndang Debata ianggo jolma, ndang pingkiran ni jolma pingkiran ni Debata jala ndang sangkap ni jolma ianggo sangkap ni Debata.  

Pamingkirion na kritis i do na naeng idaonta sian saluhut buku Parjamita on. Lumobi di turpukta on na dibahen judul, “Laho Salpu do Hajagaron dohot Hamoraon.” Tapaihutihut ma hatorangan ni turpuk sian Bindu 2:4-11 on.

 

 

II.         Hatorangan Ni Turpuk

        Ayat 4-6:Pabalgaon Angka Hapadean&Paulihon Angka Bagas Bolon

        Sai diuji Parjamita on do laho mangalului las ni roha sian portibi on. Dipabalga ibana ma angka hapadean asa tung dapotanna angka hinauli ni angka pangulaanna. Dijalo ibana do pangomoan ni ulaonna, gabe dipauli ma bagasna. Bagas i do gabe simbol naung hasea jala marhite bagas i do idaon ni jolma hamoraonna maradophon na asing.

        Tutu do dimulana asa dipajongjong bagas manang undungundung ni sasahalak asa adong parmiananna, ndang hona udan, alogo dohot las ni ari. Alai, lam lumeleng gabe sada ukuran do di jolma “balga” dohot “haulion” ni bagas i songon identitas nampunasa bagas i. I do rupani sahat tu partingkian on, hataridaan ni naung leleng mangula manang naung bekerja keras sai dipataridahon do marhite bagasna. I do na mambahen jolma lam hasea (berhasil) ibana, lam dipauli bagasna.

          

        Jala ndang holan bagasna na dipauli, na dohot do muse dipataridahon Parjamita on hamoraonna marhite na mamungka angka porlak anggur. Sada identitas ni jolma namora do hatiha i angka nampunasa porlak anggur jala somal do goaron “tuan” tu angka nampunasa porlak anggur. Jala goaron angka na tarpasupasu jolma nampunasa porlak anggur (pat: 1 Musa 27:28 mandok, “Sai dilehon Debata ma tu ho nambur na sian banua ginjang, dohot tano na marmiak, asa godang emem dohot anggur.”).

             

        Hira suman do tu angka jolma na partingkian nuaeng on. So holan bagas na pinauli, alai dohot do angka investasi marhite tano na tinuhor na patuduhon hamoraonna. I do rupani adong pandohan, “Ai mamora do halak an sahat tu sundut papituhon, ai bidang do tanona.” Holan tano na bidang i pe na adong di sahalak jolma, nunga boi didok ibana sahalak na mora, lam ma molo disuan angka suansuanan na boi mangalehon pangomoan di ibana.

         

        Asa singkop dihilala Parparjamita on di porlakna i, dibahen ibana do muse angka tobat laho mamornohi hau suanan angka na rugun martumburi. Nunga dibahen ibana porlak i laho gabe penghasilan di ibana. I do asa dibahen ibana angka tobat i. Marhite tobat i gabe lam lomak ma tano di porlakna, na marhorhon di suansuananna na torus marparbue.

          Jonok do tu sistem pertanian di partingkian nuaeng on. Molo dibahen jolma angka tobat di jonok ni porlakna, lam bagak ma kesuburan  ni tano di porlakna i. Jala sian tobat i do muse gabe inganan ni dengke na boi allangon manang gadison laho manamba hadumaonna.

        

        Ayat 7-8: Pamorahon Diri Marhite Arta Ni Portibi

       Dung bidang tano dohot porlak ni Parjamita i, ringkot dihilala ibana na boi gabe parkarejo na patureturehon porlakna i. Ala masa dope hatiha i “panggadison angka hatoban,” gabe “dituhor” ibana ma hatoban i gabe parkarejo di ibana. Molo tung sorang pe dakdanak sian hatoban i, gabe tamba ma naposona laho karejo tu ibana. Songon halak namora na adong di Padan na Robi, i ma Abraham dohot si Job na dohot do manuhor angka hatoban laho mangula di nasida. Jala angka namora do hatiha i na boi manuhor angka hatoban baoa nang boruboru.

                 

        Asa so pola tadok hata “hatoban” di partingkianta nuaeng, hupatudos ma pangantusion i tu angka pangurupi manang parkarejo di sasahalak jolma. Molo adong perusahaan manang lapangan kerja di sahalak jolma manang di sada komunitas, tardok do nampunasa i manang pemilik saham terbesar, i ma jolma na mamora. Ala godang do artana, gabe dipungka ibana parkarejoan na ringkot adong parkarejo disi, laos ibana do manggaji angka parkarejona i. Lam balga usaha ni ibana, lam ringkot do godang angka parkarejo na karejo di ibana. Dohonon ma ibana sahalak “bos” na boi pamasukkon manang memecat parkarejo na karejo tu ibana.

        

       Didok Parjamita on do muse adong artana na asing, i ma angka punguan lombu, birubiru, perak, sere, arta na arga sian raja angka na pulik luat, dipillit angka parende baoa dohot boruboru, angka parinaan tuanlaen mansai torop. Las ma rohana mida angka arta na adong di ibana. Sonang jala ribur ma rohana.

      

     Songon i do sifat ni jolma secara umum, na so hea puas di angka na adong di ibana. Di partingkian nuaeng pe hira songon on do pamingkirion ni jolma: “Tingki sepeda do na adong di ibana, sai naeng tuhoronna ma sepeda motor. Ndung adong sepeda motor di ibana, sae naeng tuhoronna do mobil. Ndung adong mobilna, naeng do tambaonna manang gantionna tu mobil na mewah muse.” Torus ma lam ditambai angka na mambahen puas rohana.

        Ayat 9-10: Hasangapon Ni Portibi Huhut Marbisuk

   Manghilala do ibana marhite angka arta naung bilanganna, gabe dihatindanghon ibana ma dirina songon jolma naumorra sian saluhut angka na jumolo sian ibana di Jerusalem. Jala alani hamoraon dohot artana, gabe didok ibana ma dirina jolma na tumimbul sian saluhutna jolma naung jumolo sian ibana di Jerusalem. Laos hot do habisuhon di ibana na manambai angka hamoraonna.

       

    Dung diula ibana saluhutna, dapotanna ma angka jambar hombar tu pangulaan na niulana. Mansai las situtu do pardagingonna mida na adong di ibana hatiha i. Pola didok ibana, “Manang sadia pe na pinangido ni matangku ndang huontohi, ndang hutiopi rohangku mangolooloi nasa lomona.” Tung loja do ibana mandapothon saluhutna i, disi ma dipapuas ibana marhite arta na adong di ibana. Boi tuhoronna nasa na pinangido ni dagingna asa marganda las ni rohana. Didai ibana ma nasa parbue saluhut ulaonna, i do sasadasa keberhasilan sian sude na niula ibana saleleng mangolu di portibi on.

   

      Hira i do umum na pinarsinta ni roha ni jolma di portibi on: mamora, marbisuk, dipasangap jolma, marhagabeon jala ingkon sonang mandalani ngoluna. I do nilului torop ni jolma di portibi on, ndang mardia imbar songon naung dilului Parjamita on. Loja mangula, loja marsiajar, loja marpingkir, gabe olo do manghalupahon ngolu partondionna, alani naung sonang ngoluna di portibi on. Unang ndung matua, ndung marsahitsahit pe luluonna Tuhan i.

      Ayat 11: Tung Salpu Do I Saluhutna

      Hira naung dapot do panimpuli ni turpuk on sian ayat parpudi. Jala holan pinungka pe buku Parjamita on, hira mamintor dipasahat ibana do panimpuli ni buku on, i ma “Tung na laho salpu do luhutna” (Parjamita 1:2). Marhusor do ianggo portibi on, so adong huaso ni jolma laho pasohon angka parhusoron di portibi on. Umbagas sian i marhite pamingkirion ni Parjamita on, i ma: “Ngolu ni jolma ndang boi tongtong di bagasan keberhasilan, ingkon adopan do angka  hamaolon ni ngolu, tung pe marsihohot di bagasan haporseaon dohot parsombaon tu Debata.” Ngolu na mardalan di bagasan angka las ni roha ni portibi on, ndang boi manesa nasa haporsuhon dohot hamaolon na dipasahat portibi on. Alai tung pe songon i, hinatabo ni parngoluan di portibi on, i ma sasadasa na boi gabe pengalaman na boi tangkupon ni jolma. Kenikmatan hidup itu masih bisa dirubah menjadi keberhasilan yang dengannya manusia bisa menyelamatkan keberadaan hidupnya dari kesia-siaan total.

    

       Di pangajarion ni Parjamita on tangkas do tarida “Konsep Predestinasi,” na marlapatan: Saluhutna naung ditontuhon Debata, lumobi umur ni jolma. Aha naung dibahen dohot disangkapi Debata, ndang boi digugai jolma. Jadi molo boluson ni  jolma angka las ni roha dohot haporsuhon, sude do marujung di hamatean. Jala molo tung pe dibahen Debata ujian tu angka jolma, ndang na ujian moral na dipasahat, alai asa pataridahon tu jolma na sian tano do ibana jala ingkon mulak tu tano do saluhutna. Ndang adong na hot di hasiangan on, laho salpu do saluhutna jala mangeahi alogo sambing do disi.

 

III.     Sipahusorhusoron

    “Pengalaman adalah guru terbaik.” Borhat sian pandohan i do boi pahusorhusoronta turpuk on gabe sada jamita na mangolu na ingkon dihangoluhon. Sian na nialaman ni panurat ni buku Parjamita on, tangkas do ondolonna “tung laho salpu do saluhutna na di hasiangan on.” Pandohan i ndang na mambahen hita gabe losok mulaulaonta, alai gabe lam marningot di na manghangoluhon angka ulaonta. Marsitutu mangula ulaonta dibagasan Tuhan Jesus asa tung gabe pasupasu saluhut ulaonta i. Taingot ma endetta, “Raphon Tuhan Jesus i, pungka ulaonmu.” Nasa na mamungka ulaon dibagasan Tuhan Jesus huhut dibagasan roha na biar mida Ibana, tarpasupasu do ibana jala gabe pasupasu di angka donganna na asing, ndang marisuang angka ulaonna ala mangula laho pasangaphon Tuhan i marhite angka ulaonna. Tabahen ma ngolunta dohot nasa ulaonta gabe sada ibadah na mangolu na hinalomohon ni Tuhan i.

Pdt. Ferdinand Fernando Silaen