LUKAS 14:12-14

 

EPISTEL MINGGU XVI DUNG TRINITATIS

Minggu, 27 September 2020

Epistel          : Lukas 14 : 12 –14 

Topik           : Marasi Ni Roha Tu Angka Na Martihas

                        (Kepedulian Terhadap Disabilitas)

Angka dongan na hinaholongan di bagasan Tuhan Jesus Kristus..!!

    Aha do lapatan ni “burju” jala songon dia do pangantusionta tu halak na didokna “burju?” Mamintor ro do alusta, “burju” i ma na mangulahon angka na denggan jala olo mangurupi halak na hasusaan. Molo adong dongan na hea mangurupi manang na mangalehon na ringkot di hita, tadok do tu nasida “mauliate ma di haburjuonmi, olo diurupi ho di tingki susa ahu.” I do pangantusion na umum di hita taringot tu burju manang haburjuan ni sasahalak jolma.

 

        Di ngolunta on pe jotjot dipodai angka natorasta manang angka natuatua tu hita songon on: “burju ma ho tu halak, asa burju halak tu ho!”  Lapatanna disi, sada dalan do haburjuon i mangeahi angka na denggan sian donganta. Sala do i? Alusna: Ndang sala i! Alai, sipata parngoluan on ndang sude songon teori na didok i. Godang dope angka na denggan i na so marbalos angka na denggan. Jala jut do roha molo hea taurupi sasahalak, hape mamintor dihalupahon do hita di tingki ro hasusaan.

 

        Hira i do na jotjot masa di portibi on. Alai, songon dia do molo maradophon tu ngolu ni partondion. Boi do pasohoonta angka haburjuon dohot angka na denggan molo ndang marbalos angka haburjuon dohot angka na denggan? Songon dia do sasintongna na hinalomohon ni Tuhanta Jesus?

 

      Dipasahat Tuhan Jesus sada umpama di tingki rap marsipanganon Ibana di bagas ni sada sintua ni halak Parise, “Jumpa dibahen ho pesta manang haroan, unang ma pio tusi angka alealem, manang hahaanggim, manang hulahulam, manang hombar bagasmu pe, angka na gabe, asa unang nasida muse mamio ho, gabe dibalos i tu ho.” Na diorai Tuhan Jesus do hita mamio angka aleale, hahaanggi, hulahula manang hombar bagasta? Ndang na diorai Tuhan Jesus hita mamio nasida. Asa dapot lapatana, tauduti ayat 13.

       “Alai jumpa mambuat sipanganon ho, pio ma angka na pogos, angka na martihas, na pangpang dohot na mapitung.” Dibahen Tuhan Jesus rekomendasi di ayat 13 on. Hira naeng tersirat do pandohan “tagonan” angka na pogos, na martihas, na pangpang dohot na mapitung sian na didok di ayat 12 i na dipio laho marsipanganon. Gabe sungkunsungkun do roha, na “rumingkot” ma nasida jouonta laho rap marsipanganon sian angka keluarganta sandiri?

 

        Di ayat 14 ma tujuan ni panghataion ni Tuhan Jesus i, i ma na nidokNa, “Jadi martua ma ho disi, ai ndang tarbalos nasida i tu ho; alai marbalos do i tu ho sogot di haheheon ni angka partigor.” Dia do lapatan ni i?

 

1.   Las Do Roha Na Manjalo, Alai Martua Do Na Mangalehon!

Songon pangidoan torop ni jolma, molo dipasahat na denggan, marbalos na denggan ma i tu ibana. Sian pangidoan i, borhat ma hita tu na masa di umpama ni Tuhan Jesus sahat tu partingkianta nuaeng on. Molo adong tajou angka keluarga di na rap marsipanganon, sai hira adong do sian angka na ro i mandok, “Mauliate ma di sipanganon na tabo jala aek sitiotio naung dipatupa hamu tu hami. Ndang tarbalos hami saluhutna. Marsingkat ma i gabe las ni roha di hamu.” Jala somal do alus sian nampunasa ulaon i songon on, “........Tangianghon hamu ma hami.”

 

Secara tidak langsung, manusia tetap memiliki keinginan untuk diperlakukan manusia yang lain dengan baik, karena dia sudah melakukan yang baik. Holan didok pe “tangianghon hamu ma hami,” secara tidak langsung dihirim nasida sian angka na ro i sude manangianghon nasida. Dijalo nampunasa ulaon i ma tangiang sian saluhut na ro i. Las roha ni nampunasa ulaon i.

 

Alai, adong do di ginjang ni las ni roha na hinirim ni jolma i. Aha ma i? Martua! I ma pangajarion ni Tuhan Jesus di umpama on. Songon pandohan on, “Belajarlah untuk menjadi kaya, bukan terus hidup di dalam kemiskinan. Cara belajar untuk menjadi kaya sangatlah sederhana, teruslah memberi, bukan menerima.” Umbuk do tu umpama ni Tuhan Jesus di turpuk on. Hamoraon (kekayaan) na nidokna disi ndang hamoraon ni arta, alai hamoran di roha. Godang pe arta, timbo pe pangkat molo so martua ngoluna, hira na marisuang do saluhutna na adong di ibana. Alani i didok, martua do jolma angka na mangalehon so dapotan balos sian donganna, ala marbalos do sogot di haheheon ni angka partigor.

 

2.  Ringkot Do Gabe Halak Na Burju, Alai Rumingkot Gabe Halak Na Tigor!

   Ndang adong na sala molo didok halak hita “burju” manang tadok halak na asing “burju.” Ringkot do i di ngolunta, jala songon na tarsurat di Pangungkapon 2:10c, “Sai burju ma ho rasirasa mate; ndung i lehononHu ma tu ho tumpal hangoluan i.” Songon di tingki mamio angka aleale, hahaanggi, hulahula manang hombar bagasta pe alani burju ni rohanta do i, ndang alani sangkap na jahat tu nasida.

 

   Alasan  ni Tuhan Jesus mandok hata “unang ma pio tusi,” naeng paboahon adong do sada pangalaho di ginjang ni pangalaho na burju. Pangalaho na songon dia do i? I ma pangalaho na Tigor manang Partigor! Songon dia do parasingan ni na burju dohot na tigor? Molo burju sai manghirim do angka haburjuon gabe balos tu ibana. Alai molo tigor, dibalos manang so dibalos jolma pe angka ulaonna na denggan, tongtong do ibana mangulahon na denggan, ala mangolu ibana dibagasan hatigoran.

 

   Songon Tuhan Jesus na mangalehon diriNa humophop hita di hau pinarsilang, di na laho manesa dosa ni saluhut jolma. Tung pe godang na menyiksa Ibana hatiha i, ndang na gabe dipaso Ibana parsuruan ni Ama i tu Ibana. Tongtong Ibana patuduhon haroroNa tu portibi on di na laho manesa dosa ni angka jolma.

 

   Songon i ma parngoluan ni angka siihuthon ni Kristus. Songon anak ni Tuhan i hita, laos songon i patuduhononta tu angka donganta saluhut angka ulaonta. Molo tung pe ndang adong balos na denggan sian angka donganta di ulaonta na denggan i, sai marbalos do i di haheheon ni angka partigor. Jala holan angka halak partigor do na dapotan hangoluan saleleng ni lelengna naung pinarade ni Tuhan Jesus. Amen.

Syalom..!!

Tuhan Jesus mamasumasu hita..!!

Pdt. Ferdinand Fernando Silaen