1 MUSA 37:23-30 / KEJADIAN 37:23-30

 

EPISTEL MINGGU XIII DUNG TRINITATIS

Minggu, 06 September 2020

Epistel : 1 Musa 37 : 23 – 30 

Topik   : Ndang  Jadi  Manjeheheon  Dongan  Jolma

               (Manusia  Tidak  Untuk  Diperjual - Belikan)

Angka dongan na hinaholongan di bagasan Tuhan Jesus Kristus..!!

I.           “Dinamika kehidupan seseorang menjadi sebuah rahasia besar yang hanya diketahui oleh si Pemilik Kehidupan.” Pandohan na naeng paingothon hita ditongatonga ni pardalanan ni ngolunta. Tontu ndang holan hamaolon na itabolus, dohot do jumpa angka na sininta ni roha. Ndang holan parsahiton na itabolus, dohot do hahipason. Ndang holan na bernit jumpangonta, dohot do ragam angka las ni roha. I do pardalanan ni ngolu ni jolma saleleng mangolu ibana di portibi on. Jala jamita di partangianganta sadari on, sada turpuk “dinamika hidup” ni Josep na hea mamolus parungkilon di ngoluna andorang so sahat ibana gabe sada panggomgomi di Misir.

 

              Sian haetehonna mansai las do roha ni si Josep ala humolong do holong roha ni amana si Jakob tu ibana sian tu angka hahaanggina (1 Musa 37:3). Boasa humolong roha ni si Josep tu ibana sian angka hahaanggina? Borhat ma sian holong ni roha ni si Jakob tu dainang pangintubu ni si Josep, i ma si Rahel. Pola ingkon sampulu opat taon “perjuangan” ni si Jakob asa gabe dongansaripena si Rahel. Alani i, ndung tubu si Josep, pola do didok si Jakob, “Nunga didaek Debata haurahonhu (Allah telah menghapuskan aibku)” (1 Musa 30:23). Jala ala holongan roha ni si Jakob tu si Josep asa di angka anakna sasudena, dibahen di si Josep sada baju sampuborna na ganjang/jubah yang mahaindah (1 Musa 30:3).

 

              Alai, songon “dua sisi mata uang,” molo adong las ni roha, rade ma jolma na ingkon mangadopi angka na mambahen susa rohana. Jala i do parngoluan, mansai sogo do roha ni sibolis mamereng jolma na mangolu di bagasan las ni roha dohot dame. Ro ma sibolis manggugai pingkiran ni angka hahana, tubu ma pangiburuon di roha ni angka hahana mida si Josep. Jala lam tamba pangiburuon i, ala naung piga hali marnipi si Josep. Patut do botoonta, di masa kuno mansai mararga do parnipion ni sasahalak jolma, jala dihaporseai ingkon adong do lapatan ni nipi sasahalak jolma. I do na diantusi angka haha ni si Josep. Sian sude parnipian ni Josep, naeng mandok: na jongjong do haduan si Josep gabe sahalak uluan di angka hahana jala ingkon marsomba do sude angka hahana tu si Josep.

              Tulus ni roha jala holong ni roha ni si Josep tu angka hahana ndang mambahen gabe mago pangiburuon ni angka hahana. Lam marsigorgor do hosom di angka hahana mida ibana. I do rupani di tingki jumpangon ni si Josep angka hahana na marmahan angka birubiru di lambung ni Sikhem, gabe kesempatan ma di angka hahana laho mamunu ibana. Alai, ala didok si Ruben (buhabaju ni si Jakob), unang pola bunuon nasida ibana, gabe didabu nasida ma si Josep tu sada godung (sumur) na so marisi aek.

              Dung i mamolus ma halak Ismael na ro sian Gilead rap dohot untonasida na laho tuat tu tano Misir. Ro ma hata ni si Juda, “Aha ma labanta molo itabunu angginta i, jala itaporso mudarna i. Beta, itagadis ma ibana tu halak Ismael an, asa unang mangonai tangan hita tu ibana, ai angginta jala sibukta ibana” (ayat 26-27). Ditangihon angka hahaanggina ma si Juda, laos dienet nasida ma si Josep sian godung i tu ginjang, jala digadis si Josep arga dua pulu ribu rupia tu halak Ismael, diboan ma ibana tu tano Misir (ayat 28).

II.       I do na godang masa ditongatonga parngoluon ni jolma, mansai jotjot do disegai sibolis parrohaon ni jolma, tidak terkecuali di angka na marhahamaranggi. Alani i, adong do pigapiga pangajarion na ringkot antusanta jala ulahononta  ditongatonga ni ngolu Hakristenonta marhite jamita partangianganta sadari on.

 

1.       Sangkap Haluaon Do Na Pinatupa Ni TUHAN I Di Ngolu Ni Jolma Na Porsea

Sian mulana sahat tu ujung ni partingkian di portibi on, ndang adong boi huaso ni sibolis manaluhon huaso ni TUHAN-ta. Boi do jaloonta na masa di portibi on: nasa hajahaton na pinatupa ni jolma, sude alani hagaleon ni jolma manangihon hata ni sibolis. I do rupani na masa di turpuk on, sai jumpangon ni jolma do na sisongon i di partingkianta nuaeng. Catatan kejahatan (terkhusus: pembunuhan) bisa dilakukan seseorang kepada saudara kandungnya ataupun kepada anak kandungnya ataupun kepada orang tua kandungnya ataupun kepada istrinya ataupun kepada suaminya. I do hagaleon ni jolma na pinangke ni sibolis laho manggugai parhahamaranggion ni jolma.

 

Tung hamatean i do na pinangasahon ni sibolis padaohon jolma sian TUHAN i. Kekuatan terbesar iblis menghancurkan iman manusia adalah dengan menakuti-nakuti melalui ancaman kematian. Jala mura do jolma dipengaruhi molo ro ancaman kematian tu dirina. Hape sasintongna songon angka anak ni Tuhan i hita, pola be habiaranta hamatean i. Na ingkon bolusonta do nasa hamatean ala marhite hamatean do hita boi rap dohot Kristus di harajaonNa. Jala na jotjot lupa jolma, naung ditaluhon Tuhanta Jesus do hamatean. Alani i, nasa na mate dibagasan Kristus ingkon paheheonNa muse dibagasan haheheon ni Kristus. 

Hamatean i do na mamparbuehon angka hosom, elat, teal dohot late ni roha. Nasa na mangulahon manang manghangoluhon hosom, elat, teal dohot late ni roha, disi do sasintongna ibana na diihot sibolis ala hamatean i do harajaon ni sibolis, ndang hangoluan. Tutu do ndang adong huaso ni sibolis mambuat hosa ni jolma, alai marhuaso do sibolis manggugai pingkiran ni jolma asa ro hamatean tu rohana dohot tu ngoluna. Lapatanna: dipangke do hagaleon ni jolma i mambolongkon hangoluan naung jinalo sian Kristus asa ndang dapotan ibana disi.

 

Alani i, sai tapadao ma i saluhutna. Tatiop ma Tuhan Jesus di ngolunta. Ala, saluhut halak na marsangkap na roa jala na jahat binahen pengaruh ni sibolis, sai dipabalik Tuhanta do i gabe sangkap na uli jala sangkap las ni roha. I do ujungna si Josep na gabe sada panggomgomi na balga ditongatonga luat Misir, tung pe disangkapi angka hahana laho mamunu ibana. Alai, dipabalik TUHAN i do gabe angka nauli jala gabe las ni roha.

 

2. Padao Ma Nasa Hosom, Tahangoluhon Ma Holong Ni Roha Tu Dongan Jolma

Ai arga do jolma ditobus Tuhanta Jesus, na so tarasam argana. I do na ingkon tahangoluhon di parngoluonta songon halak Kristen. Molo nunga taargahon dirinta songon jolma naung ditobus, lohot do di rohanta di na manghaholongi dirinta sandiri. Gabe ndang adong alasan di hita na so mangargahon parngoluonta di portibi on. Jala so holan dirinta na arga di adopan ni Tuhanta, dohot do ngolu ni donganta jolma na asing. Songon i do argana hita ditobus, songon i do nang donganta ditobus Tuhanta sian uhum alani dosa.

  

Unang masa panolsolion di hita di pudian ni ari. Songon si Ruben di turpukta on. Ndung na so niidana be anggina si Josep di godung i, disansani  ma angka ulosna (dikoyakkannyalah bajunya) huhut manolsoli. Dung i didok ibana ma, “Ndang be disi dakdanak i, tu dia nama ahu?” So tarsolsolan angka pangalaho na dirajai tahi ni sibolis. So adong na denggan na niarahon sibolis tu ngolu ni jolma.

 

Alani i, sandok molo tubu nasa hosom di rohanta maradophon donganta, lumobi maradophon keluarga, tibu ma taambolonghon sian rohanta. Lam leleng tapasombu, lam balga do panghorhon ni i, jala ndang denggan parhorhonna i di ngolunta. Arga pe hita alani holong ni Kristus tu hita. Jala alani holong ni Kristus na tahangoluhon di rohanta, gabe arga ma hita diadopan ni donganta lumobi diadopan ni Tuhanta. Alani i, tahangoluhon ma roha na masihaholongan sama hita jolma. Amen.

Syalom..!!

Tuhan Jesus mamasumasu hita..!!

Pdt. Ferdinand Fernando Silaen