2 SAMUEL 9:1-8

 

JAMITA MINGGU XVI DUNG TRINITATIS

Minggu, 27 September 2020

Evangelium : 2 Samuel 9 : 1 – 8 

Topik            : Marasi Ni Roha Tu Angka Na Martihas

Angka dongan na hinaholongan di bagasan Tuhan Jesus Kristus..!!

I.           “Pucuk dicinta, ulam pun tiba!” Sada pandohan na jotjot binege ditongatonga ni parngoluanta siganup ari. Sada pandohan na manggombarhon: Sasahalak na dapotan na sinangkapan ni rohana naung leleng pinaimana. Nunga leleng paimahon, nunga godang na nialaman jala balga panghirimonna mandapothon i. Di sada tingki, ro ma na sinangkapan i. Gabe las situtu do rohana.

 

              Songon i nang raja David, di naung leleng ibana dibagasan pangalelean ni si Saul. Dilele si David ala mangiburu si Saul marnida ibana jala naung godang pangulaon ni si Saul na maralo tu lomo ni roha ni TUHAN i. Gabe diunsat ma Tondi ni TUHAN i sian ibana.

 

              Ndang holan na diunsat Tondi ni TUHAN i sian si Saul, alai gabe marujung ma ngoluna dibagasan parporangan. Ndung mate ibana, bangkit ma si David gabe raja di Israel. Disi ma “puncak” haluaon naung leleng pinaima si David.

 

              Molo tapatudos di ngolunta on, hira na malua ma hita sian parmaraan manang ancaman tu ngolunta. Malua sian parmaraan jala malua sian sangkap ni na jat. Ndang adong be na mambahen susa pingkiran jala boi mangulahon ulaonta dibagasan dame dohot las ni roha. Jala tamba do angka las ni roha isarana na dapotan angka hadumaon, parkarejoan na dumenggan jala angka hagabeon.

 

 

Angka dongan na hinaholongan di bagasan Tuhan Jesus Kristus..!!

II.       Di haluaon naung jinalo ni si David, adong do “kesempatan” di ibana laho “balas dendam” tu pambahenan ni si Saul saleleng mangolu ibana. Boi do dirimpashon ibana saluhut angka pomparanna asa unang adong na marbalik laho mangalo ibana gabe sahalak raja.

 

              Alai, disi do hasurungan ni si David songon halak naung miniahan jala na mabiar tu TUHAN i. Diingot ibana dope na miniahan ni TUHAN i do si Saul, pola rupani sahat tu dua hali dipalua ibana si Saul. Jala ndung mate pe si Saul ndang adong be “dendam” di ibana.

 

              Sada situasi na cukup menarik taringot tu si David: Dialo si Saul do ibana, alai, maraleale do ibana tu anak ni si Saul, i ma si Jonatan. Hira na so diloas ibana do “hosom” maringanan di rohana, ala naung diisi “holong ni roha.” Diingot ibana do holong paralealeanna tu si Jonatan, laos i do na mambahen ibana ndang olo pasudahon sude pomparan ni si Saul.

 

              Dilului ibana do, “atik tung adong dope ulaning jolma tadingtadingan ni Raja Saul, asa dibahen ibana asi ni roha tusi.” Dipatuduhon ibana do “holong na marparbue” na boi manaluhon nasa hosom na sian portibi on. Alani holongna i ma gabe hira na “berbalas budi” ibana alani si Jonatan, ndang na gabe “balas dendam” alani si Saul.

 

              Denggan jala uli do disirangkhon raja David na laho “sipillitonna”: “asi ni roha” maradophon “hansit ni roha.” Dipillit ibana do “asi ni roha” na dijangkon dibagasan rohana, jala i do songon panandaionna di “Karakter ni TUHAN i” na dihangoluhon ibana. So alani gogona ibana dipillit TUHAN i gabe sahalak raja, alai holan ala “asi ni roha” sambing do.

 

              Disungkun raja David ma sada naposo isi ni bagas ni si Saul nahinan na margoar si Siba taringot tu “jolma tadingtadingan ni raja Saul.” Ndung dipaboa si Siba tu ibana adong sahalak tadingtadingan ni Raja Saul, i ma si Mepiboset, disuru ibana ma suruanna mangalap si Mepiboset sian bagas ni si Makir anak ni si Ammiel di Lodebar. Ndung i pajumpang ma ibana dohot si Mepiboset.

 

              Hira na so tagamon ni rohana mida si Mepiboset. Diida si David ma ibana na pangpang patna duansa. Alai na pangpang pe patna duansa so sian tingki sorang ibana songon i. Alai, songon na binaritahon di 2 Samuel 4:4, na dihindat parorotna ibana laho maporus hian, hape hapogan nasida laho maporus, gabe madabu ibana laos pangpang.

 

              Secara manusiawi adong hira dua respon na gabe kemungkinan tubu di roha marnida si Mepiboset:

a.  Diparhatobanhon si Mepiboset. Sude alani pangalaho ni ompungna si Saul. Jala di kondisi fisik ni Mepiboset, boi do ulahonon ni raja David i songon pelampiasan ni ibana saleleng dilele si Saul.

b. Tubu asi ni roha mida si Mepiboset. Rasa simpati seolah-olah menjadi sebuah perasaan yang tidak bisa hilang dari pribadi-pribadi manusia. Hira molo jumpang di hita angka na ringkot urupan, sai tarsunggul do roha laho mangurupi. Boi do i tubu di roha ni raja David hatiha i marnida fisik ni si Mepiboset.

 

              Sian dua parrohaon i, roha na paduahon i do na tubu di roha ni raja David. Dipatandahon ibana do dirina songon jolma parasi roha jala naposo na biar mida Tuanna, i ma TUHAN i. Dipatuduhon ibana ma parasi ni rohaon tu si Mepiboset.

              Marhite pangalaho dohot panghataion lumobi karakter  ni raja David, dapotonta do dua mutiha na arga na boi boanonta di parngoluonta siganup ari. Angka dia ma i?

1.  Unang Ho Mabiar, Ai Ingkon BahenonHu Tu Ho Asi Ni Roha

 

              Sada pandohan ni raja David tu si Mepiboset di tingki naung pajumpang ibana dohot si Mepiboset. Dirajumi si Mepiboset do dirina songon jolma na so tama maradophon si David, pola sahat tu na manungkap ibana laos marsomba di tingki pajumpang dohot si David.

 

              Didok si David ma tu si Mepiboset, “Unang ho mabiar, ai ingkon bahenonhu tu ho asi ni roha.” Dipatuduhon si David do parbue ni holongna hian tu si Jonatan, ama ni si Mepiboset. Dipatuduhon parasinirohaonna sahat tu anak ni si Jonatan i.

 

              Na masa i paingothon hita tu haroro ni Tuhan Jesus tu portibi on. Na ro do Ibana manopot jala mangalului angka jolma na “martihas” (mardosa), holan manghophop jolma asa unang mate alani dosa na binahen ni angka omputta sahat tu dirinta. Ndang diingot Tuhan Jesus be angka pangalaho ni jolma na mambahen arsak di roha ni Tuhan i.

 

              Dipatuduhon Tuhan Jesus na Parasiroha Bolon do Ibana, pola dilehon diriNa humophop angka jolma. Jala ndang jolma na mangalului Tuhanna, Tuhan i sandiri do na mangalului jolma.

 

              Sian pangalaho ni Mepiboset i, boi do buatonta sada sitiruon. Dirajumi ibana do dirina “martihas” secara fisik, pola manungkap ibana tu si David. Dipatuduhon ibana do dirina songon jolma na gale maradophon raja i. Ndang adong pangaloan di ibana, alai dipatuduhon do haunduhonna.

              I do na ingkon dihangoluhon hita angka jolma na “martihas sian partondion,” na gale jala na gok dosa. Ingkon manungkap jala marsomba do hita maradophon Tuhanta Jesus. Manolsoli angka hagaleon ni partondionta jala mangido asa unang tarrimas Tuhanta mida hita alani angka dosa ni angka ompunta nang natorasta sahat tu hita.

 

              Asa dilehon Tuhan Jesus tu hita hasesaan ni dosa. Unang tarrimas Ibana mida hita. Tasolsoli marhite parsombaonta tu Ibana, asa lehononNa tu hita hasesaan ni dosa, asa malua hita sian uhum alani dosanta.

 

              Jala dipatuduhon si David do muse karakter ni Kristus songon halak na satia mangihuthon na nidok ni Tuhanna jala ala naung jumolo ibana manjalo asi ni roha sian Tuhan i. Gabe mangolu do parasinirohaon di ibana. Jala i do na nidokna naung digohi Tondi ni Tuhan i ibana. Dijalo ibana do si Mepiboset.

 

              Marhite pangalaho na marasi roha maradophon donganna jolma, boi do lam tangkas hita manghangoluhon parasinirohaon i, jumolo taida songon dia sasintongna ngolu na gok parasi ni rohaon i:

a.  Parasiroha, ima pangalaho ndang holan teori.

b.Parasiroha, ima kenyataan ndang maya.

c.   Parasiroha, ima na marparbue ndang na hohom.

d.Parasiroha, ima na pangoluhon ndang na pamatehon.

e.  Parasiroha, ima na mambalos angka na so denggan marhite angka na denggan.

f.   Parasiroha, ima na mambalos angka na denggan marhite angka na denggan.

 

              Marhite i ma asa tongtong mangolu karakter ni Kristus i di hita angka siihutononNa, songon na tarsurat di Lukas 6:36, “Gabe parasiroha ma hamu, songon Amamuna, Parasiroha i.”

2.  Ingkon Tongtong Ho Sapanganan Dohot Ahu

              Diuduti si David do panghataionna marhite hata, “...ingkon tongtong ho sapanganan dohot ahu.” Dipatuduhon ibana do parbue ni asi ni rohana tu si Mepiboset. Hata “sapanganan” boi do idaonta:

a.  Adong tanggung jawab secara jasmani

b. Dirajumi gabe sada keluarga

 

              Bagas do pandohan na pinasahat si David tu si Mepiboset. Laos disungguli do hita marhite pandohan i di haroro ni Tuhan Jesus. Ndang holan dipalua Ibana hita, alai na dohot do hita diramoti jala diparmudumudu ibana mandalani parngoluanta di portibi on.

 

              Tuhan Yesus bertanggung jawab atas kehidupan umat yang setia dan mau bergantung kepadaNya. Dia tidak hanya menyelamatkan tetapi juga memberikan kehidupan secara jasmani dan rohani kepada orang-orang yang percaya. I do balga asi ni roha ni Tuhan i tu hita angka jolma.

 

              Laos diain ma hita gabe anakhonNa, na dohot gabe panean di harajaon naung pinaradeNa tu angka ianangkhonNa. I do na paingothon hita asa tongtong satia mangihuthon Ibana jala manghangoluhon angka karakter naung diajarhon tu hita marhite na marasi roha tu angka dongan jolma. Margogo ma hita mangulahon hataNa ditongatonga parngoluanta siganup ari. Amen.

 

Syalom..!!

 

Tuhan Jesus mamasumasu hita..!!

 

Pdt. Ferdinand Fernando Silaen