MANGOLU DI HAKRISTENON NA SINTONG (MATEUS 22 : 37 - 40 )

PANURATAN JAMITA PARTANGIANGAN

MINGGU OKULI

“Sai Tong Do Mangaranapi Matangku Dompak Jahowa”

( Psalmen 25 : 15a )

Epistel :  MATEUS 22 : 37 – 40 

Angka dongan na hinaholongan di bagasan Tuhan Jesus Kristus..!!

I.              PAMUHAI

Molo nirimangan di taon na salpu, sanga do mardalan pigapiga Minggu Partangiangan, jala na so tinagam gabe hira na adong “mangambati” hita patupahon partangiangan marhite pandemi Covid-19 na so marnasalpu dope. Ndang adong na managam jala so sihirimon na sisongon i masa di tongatonga ni huria.

Nuaeng, tolhas hita manguduti partangiangan di taon naimbaru. Tontu sai adong do parasingan sian taontaon na parpudi. 

“Martamba” manang “moru” manang “hot” do songon taontaon parpudi, di tingki so ro dope pandemi Covid-19 tu portibi on??

Lapatanna, ndung tabolus jala di na so marujung dope pandemi on,

“Adong do panghorhonna tu ngolu ni haporseaonta??”

“Panghorhon na NEGATIF manang POSITIF??”

“Aha do panghorhon pandemi Covid-19 di ngolu ni haporseaonhu??”

 

-  Lam masihol do rohangku tu Tuhan i manang ndang??

-  Lam ringgas do ahu martangiang tu Tuhan i manang ndang??

-  Lam jonok do diringku tu Tuhan i manang ndang??

Sungkunsungkun i ringkot gabe dasor di hita ndung tahilala pandonganion ni Tuhan Jesus di ngolunta sahat tu sadari on..!! Jala ndang holan alani pandemi on, dohot do angka SUNGKUNSUNGKUN na asing marhite angka hamaolon na ro tu hita: “Tahilala dope naung diramoti jala didongani Tuhan Jesus hita mandalani ngolunta on?”

Jala i do na gabe pamuhai di na mangantusi hata ni TUHANta sadari on, na gabe jamita jala bohal partondion di hita angka ianangkhonNa!

 

Angka dongan na hinaholongan di bagasan Tuhan Jesus Kristus..!!

II.           POINTER  JAMITA

Molo nunga adong sungkunsungkun i di na laho manulingkiti dirinta, idaonta ma panorangion ni turpuk on tu hita huriaNa, asa torang jala polin hita mangantusi songon dia do na hinalomohon ni Tuhan Jesus tu angka siihuthonNa.

 

1.      Unang Unjuni Tuhan Jesus!! (Ay.34-36)

Horas jala maniak tu ateate molo didok tu hita “UNANG UNJUNI TUHAN JESUS!!” Hira na jat situtu do parange nang pangalahonta maradophon Tuhan i molo didok hata i tu hita!

Alai, marhite hata “UNANG UNJUNI TUHAN JESUS” mambahen hita lam manat jala lam bisuk di na mangoloi lomo ni roha ni Tuhan Jesus di ngolunta. Songon dia do i??

Molo taida ayat pamuhai perikop jamita on, (ay.34-36) adong do didok disi halak Saduse dohot halak Parise. Ise do nasida?

a.      Halak Saduse

I ma halak na maniop pangantusion “Ibadah di bait suci adalah pusat dan tujuan utama Hukum Taurat.” Sude ngolu ni bangso ni TUHAN i dipataridahon marhite na ro tu bagas joro.

 

b.      Halak Parise

I ma halak na hot maniop Patik na gabe ojahan di ngoluna songon bangso Israel / bangso na pinillit. Nasida ma na gabe “Pemimpin Spiritual” halak Jahudi hatiha i. Patik i ma na gabe dasor: Molo diulahon Patik, dapotan pasupasu do bangso i. Baliksa, molo dilaosi Patik, hona uhum ma bangso i.

 

Taida sian dua horong i: Saduse dohot Parise, boi dohonon: “angka na unduk jala satia do di Patik” jala “marsitutu” do nasida di ngolu parugamoon i.

Alai, ro sungkunsungkun sian halak Parise tu Jesus:

“Gurunami, dia do patik raya sian angka patik i?”

(Guru, hukum manakah yang terutama dalam hukum Taurat?)

 

“Sibotopatik” do halak Parise alai laos manungkun taringot tu Patik!! Tingkos do haruar sian bagasan rohana sungkunsungkun i?? 

Daong!! Na mangunjuni Tuhan Jesus do nasida!!

Dirimpu nasida ndang diboto Tuhan Jesus na di bagasan roha ni nasida. Asa tarunjun do Tuhan Jesus molo isarana didok “Patik na parjolo ma patik raya sian angka patik na asing.” Hira na adong tumimbo sada sian sia patik na asing.

 

Suman do i molo ro sungkunsungkun sian hita:

  “Tumingkos do ahu Tuhan na losok marminggu dohot partangiangan on sian angka donganhu na ringgas marminggu dohot partangiangan?? Alana, tong do angka dongan i dung sidung partangiangan dohot parmingguan olo manghatahatai halak manang paroaroahon halak!!”

Unang unjuni Tuhan Jesus! Molo naung taboto dia na sinuru ni Tuhan i laho taulahon, ingkon taulahon. So pola godang sungkunsungkun, “dia do dumenggan” manang “dia do tumimbo”??

Sandok pangalaho siihuthon ni Kristus jala hata ni Tuhan Jesus i ma na taulahon pola tabahen angka “hasurungan” hita sian angka donganta. Manang “ulaon na tumimbo” sian angka “ulaon na asing” na songon na sinuru ni Tuhanta i.

Angka dongan na hinaholongan di bagasan Tuhan Jesus Kristus..!!

2.      Haholongi Ma Tuhan I Sian Nasa: Ateatem, Hosam Dohot Roham  (37-38)

Mura do gabe “Jolma na balga” manang “seorang yang besar.” Godang halak na bisuk na mambahen “tips” manang “tirket” laho gabe jolma na balga. Alani i, lam godang do jolma na mangihuthon i gabe “jolma na sukses.” 

Hira suman do i songon pandohan: Mura do mambahen gareja gabe “Gareja na balga.” Tidak sulit menjadikan sebuah “Gereja menjadi besar.” Dipabangkit ma Panitia Pembangunan, diarahon ma laho pauliulihon bagas joro i, dilului ma donatur, dipatupa ma guguan tu angka ruas ni huria. Lam balga jala lam uli do bagas joro i.

Alai, maol do gabe:

“Jolma Na Sintong” (Orang Yang Benar)

Dohot

“Gareja Na Sintong” (Gereja Yang Benar)

 

Panjouon ni Tuhan Jesus asa gabe “Huria jala halak Kristen na sintong” ringkot do pangantusion na bagas jala pangajarion sian Tondi Parbadia. Sotung sala mangantusi jala sotung lilu haporseaonta. Ala ndang gabe “jaminan” naung leleng gabe parugamo Kristen.

I do na nialo Tuhan Jesus tu halak Parise na gabe sibotopatik hatiha i. Ndang gabe jaminan naung sintong nasida mangulahon na hinalomohon ni TUHAN i.

Jadi dia do ojahan na sintong i?

On ma alus ni Tuhan Jesus na parjolo! Jala on ma pangajarion ni Tuhan Jesus di angka siihuthonNa asa di bagasan hasintongan mangihuthon Tuhan Jesus!

 

Haholongi Tuhanmu sian nasa: ateatem, dohot sian nasa hosam dohot sian nasa roham!

 

Tolu bagian na so boi bahenonta tumimbo sian na dua nari. Lapatanna: Ingkon rap mardalan do tolunsa: Ateate (hati), hosa (jiwa), dohot roha (akal budi). Na ingkon sadalan do “ateate” dohot “hosa” dohot “roha.”

 

“Mangolu na so marisuang di adopan ni Tuhan i!!”

 

-  Boasa didok asa unang mangolu na so marisuang di adopan ni Tuhan i?

-  Ai na marisuang do parpunguanta bodari on?

-  Ai marisuang do Hakristenonta saleleng on?

-  Ai marisuang do tangiangta saleleng on?

 

Tapatudos ma i di ngolu ni na saripe (keluarga). Tahaholongi ripenta manang ianangkhonta manang natorasta, na laho asa tarrimas do nasida manang asa las rohana?

 

Tontu alusna: “Asa las roha ni na tahaholongi i”

 

Asa boi tabahen las roha ni na tahaholongi i, ringkot do di hita “totalitas” jala sahat tu “pengorbanan” tu nasida, asa boha gabe las rohana, ndang na gabe pangidoanta na tabahen ingkon siat di nasida.

 

Songon i do di na manghaholongi Tuhanta i hita!

-  Martangiang pe hita molo holan pangidoanta na ingkon saut, ndang na holong goarna i.

-  Manjaha hata ni Tuhan i dohot manangihon jamita pe hita molo holan asa patabotabohon sipareon, ndang na holong goarna i.

-  Marminggu dohot partangiangan pe hita, molo holan mamolus songon i sambing, ndang na holong goarna i.

 

Ringkot do parsitutuon na holan lomo ni rohaNa na tajalo jala taulahon i do na patuduhon na holong rohanta tu Tuhan i jala na mambahen las rohaNa. Ndang tabahen tarrimas Ibana jala ndang tabahen jut rohaNa.

 

-  Molo ro pe angka parsorion, dohononta ma: “Tongtong do holong rohangku tu Tuhan i jala ingkon tongtong do mardalan ahu di lomo ni rohaNa!”

-  Molo lam majuna pe zaman dohot tekhnologi, dohononta ma: “Sai tumimbo ma huaso ni Tuhan i maradophon parbinotoan ni portibi on jala ndang gabe ganggu ahu di na manghaholongi jala mangulahon lomo ni rohaNa.”

-  Molo lam matua pe hita, dohononta ma: “Tongtong ma huhaholongi ma Ho Tuhan sahat ro di ujung ni ngolungku.”

 

I do na mangarahon jala patigorhon ngolu ni haporseaonta di na laho manghaholongi Tuhanta Jesus saleleng mangolu hita.

 

Angka dongan na hinaholongan di bagasan Tuhan Jesus Kristus..!!

3.      Sihaholonganmu Do Donganmi Doshon Dirim  (39-40)

Hamaolon na umbalga molo manaringot “Holong,” ima :

“mura do mandokhon alai maol mangulahon!!”

 

Boasa?

Ala timbo dope “Ilmu Ekonomi” di angka jolma!

 

“Molo huhaholongi ho, aha ma na boi lehononmu tu ahu?”

 

I do na boi mangambati hita patuduhon holong ni roha tu angka dongan jolma!  Lumobi ma molo ditaringoti “HOTEL” (Hosom Teal Elat Late ni roha) 

Di na laho patuduhon angka siihuthon ni Kristus hita:

“Ingkon mago do HOTEL i sian dirinta!”

Itu adalah penyakit yang harus disembuhkan!

Itu adalah masalah yang harus dituntaskan!

Itu adalah persoalan yang harus diselesaikan!

Karena ketika hal itu masih hadir di dalam diri orang Kristen:

-  Dia ingin orang lain menderita, dan

-  Dia tidak ingin orang lain diberkati dan bahagia!

Hape didok Tuhan Jesus, “Haholongi ma donganmi dosohon dirim!”

-       Songon dia hita manghaholongi dirinta, songon i do hita manghaholongi donganta jolma!

-       Songon dia hita na so olo marsahit, songon i do hita na so lomo rohanta molo donganta marsahit!

-       Songon dia hita na so olo dibahen hansit rohanta, songon i do nang hita ndang mambahen hansit roha ni dongan!

-       Songon dia hita na mangalului hatuaon dohot las ni roha, songon i nang hita mambahen hatuaon dohot las ni roha tu donganta. 

Aha na hinalomohon na naeng ro tu hita, songon i ma tabahen tu angka donganta jolma!

On ma sude pangarimpunan ni Patik songon pangajarion ni Tuhan Jesus tu hita angka siihuthonNa.

Taulahon ma i asa mambahen las roha ni Tuhan Jesus jala lam tapatuduhon dirinta songon halak Kristen na tutu na mangulahon lomo ni rohaNa saleleng di ngolunta. Amen.

Syalom..!!

Tuhan Jesus mamasumasu..!!

Pdt. Ferdinand Fernando Silaen