KRISTUS NA PAIMBARUHON ( ROM 1 : 16 - 17 )

PANURATAN JAMITA MINGGU XXII DUNG TRINITATIS

HKBP Efrata Ressort Palembang

Minggu, 31 Oktober 2021 ( Ari Reformasi )

Evangelium: ROM 1 : 16 – 17

“ KRISTUS NA PAIMBARUHON ”

Angka dongan na hinaholongan di bagasan Tuhan Jesus Kristus..!!

I.      PAMUHAI

Selamat Ari Reformasi ma di hita saluhutna!!

504 taon na salpu, topet di tanggal 31 Oktober 1517, jongjong sahalak Profesor Theologi di jolo ni pintu Gareja Wittenberg di Jerman. Diboan ibana tulisan naung jumolo disurathon ibana, dung i dipaku ma di pintu ni Gareja i. Aha do na dipaku nasida? I ma 95 dalil/thesis laho mengkritik pangajarion ni Gareja hatiha i na diida ibana naung lipe sian hapolinon hata ni TUHAN i.

Dikritik ibana do taringot tu “dalan ni jolma laho manjalo haluaon na sian TUHAN i!” Umbahen i, gabe tubu ma pangajarion taringot tu “indulgensia” (surat penghapusan dosa) dohot pangondolon ni otoritas ke-Paus’an hatiha i. Nunga gabe tartuju tu habadiaon ni jolma, ndang diarahon be tu habadiaon ni TUHAN i. Umbagas sian i, adong do pangajarion ni nasida na mandok adong huaso ni Paus laho paluahon jolma.

Ise ma ibana?

Ise na barani jongjong di pintu ni Gareja laho mansoarahon hasintongan i?

I ma Tokoh Reformator na margoar Martin Luther!!

So holan sahalak Profesor Theologi ibana, alai laos masuk ma ibana tu horong ni Biarawan, i ma jolma na mamelehon diri tu Debata laho marhobas di Bagas Joro.

Sungkunsungkun:

Boasa ingkon pola diulahon Martin Luther na sisongon i?

Ala sai tubu arsak ni rohana hatiha i laho mangantusi “Haluaon na pinatupa ni Debata marhite Tuhan Jesus Kristus!” Songon dia do sasintongna i? Ai na adong do huaso ni Paus asing ni Tuhan Jesus laho paluahon jolma sian dosa?

-   Sai dilului ibana ma alus taringot tusi.

-   Ganup ari sai martangiang huhut puasa ibana asa boi dapotan pangantusion na sintong taringot tu haluaon i.

Di bagasan parsiranggutanna (pergumulan) laho mangalului pangantusion taringot tu haluaon i, dipasiajari ibana ma hata ni Tuhanta di Bibel na tarsurat di Rom 1:16-17, na tongon gabe ojahan ni jamita di Minggunta sadari on.

Diida ibana sian turpuk i, adong do parasingan jala maralo tu pangajarion ni Gareja hatiha i. Masa ma delusi (haporseaon na sala, alai dihatindanghon gabe hasintongan) di pokok iman Gareja hatiha i!

Padahal sesungguhnya “pokok iman” atau yang sering kita dengar dengan istilah “dogma” haruslah revocable dan appealable, artinya: terbuka untuk ditinjau ulang!! Itu adalah hakekat iman, “Selalu bertanya: Apakah keyakinan saya ini sudah benar menurut TUHAN?”

Molo so tubu panghangoluhon na sisongon i, boi do hita masuk tu delusi! Tabo do nian na mar-delusi on! Boi do jolma mandok dirina umbadia/sumintong/tumingkos sian angka jolma na asing marhite na niulana (bisa mengaku menjadi orang kudus)!

Sialani i, marhite turpuk on, diarahon tu hita asa manghangoluhon haporseaon na sintong marhite Barita na Uli, asa Barita na Uli gabe dalan ni Tuhanta laho paimbaruhon ngolunta!!

 

Angka dongan na hinaholongan di bagasan Tuhan Jesus Kristus..!!

II.    POINTER  JAMITA

1.Hot Di Kristus !! 

Ganup Minggu, sai disoarahon do Tingting Na Marragam di Huria (Warta Jemaat). Ala ulaon na somal na pinatubegehon di ganup parmingguon, gabe somal idaonta tolu respon ni na manangihon i:

a. Marsitutu manangihon!

-   Dihangoluhon ibana do Tingting i songon huaso ni Tuhan i na mangaramoti huriaNa:

1.     Molo adong barita las ni roha, isarana: Hamauliateon, Ulang Tahun, dna, dirajumi ibana songon pasupasu na pinapatar ni Tuhan i di tongatonga ni huriaNa.

2.     Molo adong barita habot ni roha, isarana: Na Monding, dirajumi ibana songon dalan ni Debata laho pahothon haporseaon ni huriaNa.

3.     Molo adong program ni huria, dirajumi ibana songon panogihonon ni Tuhan i tu huriaNa di na laho pararathon Barita na Uli.

4.     Molo minus kas ni huria, dirajumi ibana songon dalan ni Debata na manungguli huriaNa asa lam marsitutu laho manghaholongi huriaNa.

 

b.Marsitutu manangihon holan tu ringkot tu dirina!

-   Isarana: Molo pasahathon hamauliateon, ditingtinghon parhalado i do manang daong? Molo ditingtinghon denggan, molo so ditingtinghon ingkon dipasingot Parhalado i!

-   Na asing nari, tole ma!

 

c. Mamolus songon i/Pola so binege!

-   Maos holan i tingting na jinaha!

-   So adong panghorhonna tu ahu!!

Angka dongan na hinaholongan di bagasan Tuhan Jesus Kristus..!!

Dia do respon na denggan? Tutu respon na parjolo i do! Ndang na gabe mulak boti tingting na sinoarahon di ganup Minggu. Alai, gabe jamita na mangolu ma i di ibana ala dirajumi songon partalian (hubungan) ni Debata tu huriaNa!!

Hape idaonta do na masa! Sude do tahe respon ni parminggu songon na parjolo i? Sahat tu saonari, hot dope na tolu respon i idaonta somal di tongatonga ni huria!!

Jadi, alani i gabe mansohot ma so jinahaon Tingting ganup Minggu? Daong! Songon dia pe respon ni na manangihon Tingting i, ingkon do jahaon ganup Minggu!

Songon i do gombaran ni Barita na Uli! Sai tongtong do ganup ari disoarahon Barita na Uli tu liat portibi on! Songon dia respon ni jolma? Hot do songon na somal i, idaonta do tolu respon i masa di humaliangta!

Tung songon i pe na masa, ingkon tongtong do ingotonta hata ni Tuhan Jesus di Mateus 28:19-20,

“Laho ma hamu, podai hamu ma saluhut bangso, didi hamu ma nasida tu bagasan goar ni Ama, Anak, dohot Tondi Parbadia. Laos ajari hamu ma nasida mangaradoti nasa hata naung Hupatikhon tu hamu. Ai ida ma, sai na dongananHu do hamu ganup ari, rasirasa ro ajal ni hasiangan on.”

(Karena itu pergilah, jadikanlah semua bangsa murid-Ku dan baptislah mereka dalam nama Bapa dan Anak dan Roh Kudus, dan ajarlah mereka melakukan segala sesuatu yang telah Kuperintahkan kepadamu. Dan ketahuilah, Aku menyertai kamu senantiasa sampai kepada akhir zaman).

 

Angka dongan na hinaholongan di bagasan Tuhan Jesus Kristus..!!

I do na dihangoluhon Apostel Paulus songon na sinurathonna di ayat 16 on,

“Ai ndang huhailahon Barita na Uli i, ai hagogoon ni Debata do i na paluahon nasa na porsea, halak Jahudi jumolo, dung i dohot do halak Gorik.”

(Sebab aku mempunyai keyakinan yang kokoh dalam Injil, karena Injil adalah kekuatan Allah yang menyelamatkan setiap orang yang percaya, pertama-tama orang Yahudi, tetapi juga orang Yunani).

 

-   Hot do ibana di Barita na Uli i!

-   Hot do ibana di Kristus na gabe Barita na Uli na mamboan haluaon tu angka jolma pardosa!

-   Ndang maila/disoadahon ibana Barita na Uli i!!

Alani aha boi hot Apostel Paulus di Barita na Uli i? Ala dihaporseai ibana Barita na Uli i ma hagogoon ni Debata do i na paluahon nasa na porsea!!

-   Beriman bukan perbuatan yang menegakkan kebenaran kita di hadapan Allah, melainkan PENGAKUAN KETIDAKBENARAN kita!

-   Malua do jolma molo ditopoti hahuranganna dohot dosana jala dijalo Barita na Uli laho pauliulihon ngoluna!

I do na pinangidohon ni turpuk on tu hita asa “Hot di Barita na Uli.” Hot di Barita na Uli, i ma “Hot Di Kristus, Barita na Uli i!!”

Alai, ndang holan “hot” di dirina sandiri, ingkon diulahon ma songon parsuruan ni Tuhan Jesus di na laho pararathon Barita na Uli tu liat ni portibi on!

Pararathon Barita na Uli ndang holan “ulaon mimbar,” alai umbidang sian i ingkon marhite pangalaho siganup ari! Boasa?

-   Molo holan ulaon di mimbar: Parmingguon, Jamita, Partangiangan, Punguan, holan di halak na marpungu i do sahat Barita na Uli. Lapatanna: Molo so masuk tu horong manang kelompok (ugamo, huria, parsahutaon, arisan, punguan) ndang dohot manjalo Barita na Uli.

-   Molo marhite ulaon siganup ari: Hidup dengan jujur, mau memaafkan, mau memberi penghiburan, mau membantu orang yang kesusahan, peduli terhadap sekitar, gabe gumodang do na manjalo Barita na Uli i, so holan na sa-ugamo, sa-huria, sa-parsahutaon, sa-arisan, sa-punguan!

“Memberitakan Injil pada hakekatnya adalah sama dengan Mewartakan!”

Jadi, songon dia hita molo manangihon Tingting di huria, songon i ma gombaran di hita di na pararathon Barita na Uli

I do lapatan ni pandohan si Paulus di ayat 16 on, “halak Jahudi jumolo, dung i dohot do halak Gorik!” Gombaran ni pandohan na mandok: Halak naung gabe siihuthon ni Kristus jumolo na pararathon, dung i dohot do halak na naeng porsea tu Tuhan Jesus Kristus!

Alani i, tangkas taantusi marhite Barita na Uli gabe dapotan ma hita “hangoluan na imbaru” na manghilala denggan basa dohot asi ni roha ni Tuhan Jesus Kristus. Denggan basa dohot asi ni roha i do na lam pauliulihon ngolunta asa tongtong mardalan di dalan na hinalomohon ni Tuhanta i!

Hot ma di Kristus!!

 

Angka dongan na hinaholongan di bagasan Tuhan Jesus Kristus..!!

2.Hangoluan Naimbaru Di Bagasan Hatigoran Ni Debata Na Sian Haporseaon Tu Haporseaon !!

Molo didok “Hatigoran Ni Debata” (Kebenaran Allah) somalna jolma mangantusi: Hatigoran ni Debata i ma hatigoran na pinatupa ni Debata (Kebenaran yang dimiliki Allah). Molo songon i pangantusionna songon dia do panghorhonna?

-   Gabe fokus ma jolma di ulaon na denggan.

-   Dipaadop ma tu ulaon na hinalomohon ni Debata na ingkon tongtong di bagasan hatigoran, ise na sala dohonon ma ibana halak pardosa, jala hona uhum do angka pardosa!

-   Aha do uhum sian dosa? Rom 6:23a mandok, “Ai upa tinuhor ni dosa do hamatean....”

-   Hape, so adong jolma na so mangulahon dosa!

Sala do pangantusion i? Ndang na sala pangantusion na sisongon i. Alai, adong na ingkon pinabagas muse. Alana molo holan intap ni i do pangantusionna, gabe tubu ma pangantusion di bagasan roha:

-   Ndang adong las ni roha hape sian Barita na Uli!

-   Ndang boi Barita na Uli paimbaruhon ngolu ni jolma so holan na mangalehon uhum!

Alai molo pinabagas pangantusion i:

“Hatigoran ni Debata i ma Hatigoran na dibasabasahon Debata di bagasan Tuhan Jesus Kristus na dilehon humophop jolma pardosa”

(Kebenaran Allah adalah Kebenaran yang dikaruniakan oleh Allah di dalam Tuhan Yesus Kristus yang dianugerahkan untuk menyelamatkan orang berdosa).

Songon dia asa tarjalo jolma basabasa ni Debata?

Apostel Paulus mandok di ayat 17 on:

“From Faith To Faith!!”

“Dari Iman Kepada Iman!!”

“Sian Haporseaon Tu Haporseaon!!”

I ma na porsea di bagasan Tuhan Jesus Kristus. On ma na nidok ni Martin Luther “Sola Fide” (Holan alani haporseaon, Hanya oleh karena iman). On ma pangantusion na polin asa tarjalo jolma haluaon na pinatupa ni Debata.

Dalanna songon on:

a. Dilehon Debata haporseaon tu jolma marhite Tuhan Jesus Kristus laho paluahon jolma sian rante ni dosa!

b.Dihaporseai jolma ma haluaon di bagasan Tuhan Jesus Kristus asa tama manjalo haluaon i!

Haporseaon ndang tanda halongangan na pinangido jala binahen ni jolma! Alai, haporseaon i ma tanda halongangan na pinatupa di bagasan lomo ni roha ni Tuhan Jesus Kristus!

a. Beriman ketika sakit:

-   Kalo sembuh itu bonus, kalo tetap sakit ya tetap beriman!

b.Beriman ketika memiliki masalah:

-   Kalo masalah selesai itu bonus, kalo tetap menghadapi masalah ya tetap beriman!

Jalo ma hangoluan na imbaru di bagasan haporseaon na marojahan di Kristus, aha pe na masa di ngoluna! Jala haporseaon i do na mamboan tu  hangoluan na manontong (di portibi on: mangolu di bagasan panghirimon, dung marujung: mangolu di hangoluan na pinarade ni Tuhan Jesus Kristus)! Amen!

 

Syalom..!!

Selamat ari Minggu di hita saluhutna..!!

Tuhan Jesus Mamasumasu..!!

Pdt. Ferdinand Fernando Silaen