HAHOLONGI MA HANGOLUAN ( 2 SAMUEL 1 : 17 - 27 )

PANURATAN JAMITA MINGGU IV DUNG TRINITATIS

HKBP Maranatha Ressort Kutacane

Minggu, 27 Juni 2021

Evangelium : 2  SAMUEL  1 : 17 - 27

Topik : Parhahamaranggion Di Bagasan Holong (Kasih Persaudaraan) 

Angka dongan na hinaholongan di bagasan Tuhan Jesus Kristus..!!

I.      PAMUHAI

Adong pandohan songon on:

“DENDAM dapat mematikan orang lain, bahkan ketika orang tersebut MASIH HIDUP” sedangkan “KASIH dapat MENGHIDUPKAN orang lain, bahkan ketika orang tersebut SUDAH MATI!”

Sian pandohan i mamboan hita tu pangarimangon taringot “partalian ni jolma dohot jolma na asing” (hubungan antara manusia dengan manusia yang lain). Dua do pangalaho na didok di pandohan i, i ma:

1.     Hosom (Dendam)

-   Sada sahit na posi, na ingkon dibolonghon di ngolu ni sasahalak jolma. Boasa didok gabe sahit? Ala na manghosomi donganna, ndang boi menak jala dame rohana. Sai holan na marsak do ngoluna jala jotjot mambahen marsak donganna.

-   Sada harugian tu dirina dohot tu donganna. Boasa harugian? Ala sai dipingkiri laho mamaloshon hansit ni rohana tu donganna.  Marsak ibana mamingkiri i jala marsak donganna mangadopi.

-   I do molo jolma na gok hosom di ngoluna, sai “roha na pamatehon” do na adong di dirina:

a.      Pamatehon karakter ni donganna

b.     Pamatehon las ni roha ni donganna

c.      Pamatehon ngolu dohot na naeng paagohon hosa ni donganna.

 

2.     Holong (Kasih)

-   On ma “ubat ni nasa ubat” na boi pamalumhon nasa sahit ni jolma. Boasa didok gabe ubat? Ala dirina digohi roha na naeng “pangoluhon” dirina nang angka donganna. Sai dipadao do roha na mambahen marsak dirina dohot donganna marhite na mangulahon holong.

-   On ma sada pangomoan na so boi dipatudos tu nasa na adong di portibi on. Boasa didok pangomoan? Ala ndang loja ibana mangalului las ni roha, dame nang hatuaon di ngoluna. Holan mangolu ibana di bagasan holong ni roha, mangihut ma dame, las ni roha dohot hatuaon di ngoluna.

-   I do molo jolma na gok holong di ngoluna, sai “roha na pangoluhon” do na adong di dirina:

a.      Pangoluhon karakter ni donganna

b.     Pangoluhon las ni roha ni donganna

c.      Pangoluhon ngolu ni donganna, tung pe na so marhosa be donganna i, ala sai diingot do na denggan sian donganna.

 

Idaonta ma nuaeng di ngolunta na nidokna angka siihuthon ni Kristus:

-        Pangalaho na dia ma na mangolu di hita nuaeng? Hosom manang Holong?

-        Pangalaho na dia ma na tahalomohon ingkon ulahononta? Hosom manang Holong?

-        Pangalaho na dia ma gumodang taulahon? Hosom manang Holong?

Jala turpuk on naeng mangarahon hita, asa botoonta dia do pangalaho na ingkon mangolu jala siulahononta hombar tu parngoluan halak Kristen na hinalomohon ni Tuhanta Jesus Kristus!!

 

Angka dongan na hinaholongan di bagasan Tuhan Jesus Kristus..!!

II.   POINTER JAMITA

Idaonta ma nuaeng pangalaho ni sahalak “Tokoh Besar” na sinurat ni Bibelta, i ma si David. Andorang so dipadiri TUHAN i ibana gabe sahalak raja, mansai godang do hamaolon na ingkon adopanna.

Lumobi ma late ni roha Raja Saul maradophon ibana.

Marlate ni roha do si Saul tu si David sahat tu na naeng paagohon hosana. Nunga piga hali disangkapi raja Saul laho pamatehon si David, asa unang ma nian bangkit ibana gabe raja ni halak Israel.

Nunga pigapiga hali si David malua sian parmaraan dohot sangkap ni si Saul ala sai didongani TUHAN i do ibana mangadopi na masa i. Piga hali ibana dipalua TUHAN i, malua do ibana sian sangkap na roa sian si Saul.

Di sada tingki, marporang ma raja Saul dohot anakna si Jonatan. Jonatan, i ma aleale ni si David. Sai dipangke TUHAN i do si Jonatan gabe dalan paluahon si David asa unang mate di tangan ni si Saul.

Hape, di tingki marporang, mate ma nasida na dua, i ma raja Saul dohot anakna si Jonatan. 

Ndung binege si David barita i, mangandungi ma ibana patuduhon habot ni rohana di hamamate ni nasida na dua.

Andung ni David mambege barita hamatean ni si Saul dohot si Jonatan on ma na gabe jamita di Minggunta sadari on.

Di pangandungan ni si David on, idaonta ma angka mutiha na mansai arga di hita:

 

1.     INGKON AJARHONONHON DO HOLONG TU ANGKA SUNDUT NAUMPOSO !!

Masa di sada huta, molo marbada natoras tu sasahalak jolma, sai diarahon do gelengna i asa unang dohot gabe ndang marsiantoan nasida, suang songon i dohot tu angka ianangkhon ni donganna marbada i. Gabe diboan ma bada i sahat tu pinomparna, na so parsidohot hian di parbadaan i.

Unang ma nian masa na sisongon i di tongatonga ni hurianta nang di tongatonga ni hutanta. Dakdanak sian haetehonna, nunga diajari natorasna laho marmusu tu jolma na asing.

Baliksa do na naeng didok ni turpuk on tu hita. Ingkon ma nian diajarhon holong tu angka sundut na umposo. Unang ma nian diboan bada i gabe lam rarat.

Nuaeng, pangalaho na songon dia do na boi papatarhon holong na laho siajarhononta i? 

HOLONG NA BERSOLIDARITAS !!

Ndang dihatai si David pangalaho ni si Saul na sai jotjot laho pamatehon ibana. Alai, dilapati ibana do hamatean ni si Saul dohot si Jonatan, i ma hataluon ni bangsona maradophon musu. Na marporang humophop bangsona do nasida umbahen gabe agoan hosa.

Pangandung ni si David gabe pangandung ni bangso na talu marporang. Ndang diboan ibana “perasaan pribadi” jala ndang na “si Saul na laho pamatehon ibana” na gabe siingoton. Alai, “si Saul na mangalehon dirina dohot bangsona laho manghophop nasida.”

I do rupani na didok si David: “tarsurat do i di pustaha ni halak na bonar” (Kitab orang jujur).

Daud mengajarkan kepada orang Yehuda, bahwa orang Israel, raja Saul dan Yonatan yang mati di dalam peperangan adalah Pahlawan bagi bangsa mereka!!

Ingkon ajarhononta do “Solidaritas” (satu rasa, sisada roha) tu angka sundut na umposo. Ndang ajarhononta nasida holan “mamingkiri dirina sandiri!” Solidaritas na songon dia ma na ingkon ajarhononta?

 

a.      Solidaritas Na Berkeluarga

-        Manghilala haporsuhon ni na marhahamaranggi dohot na berkeluarga.

-        Marsiurupan di angka na marhahamaranggi dohot na berkeluarga.

 

b.     Solidaritas Na Sahuta

-        Manghilala haporsuhon ni donganna sahuta.

-        Marsiurupan di angka donganna sahuta.

 

c.      Solidaritas Na Marbangso & Marnegara

-        Manghilala haporsuhon ni bangso dohot negara.

-        Marsiurupan di angka dongan sabangso.

 

d.     Solidaritas Na Sahuria

-        Manghilala haporsuhon ni dongan na sahuria.

-        Marsiurupan di angka dongan na sahuria.

 

e.      Solidaritas Angka Siihuthon Ni Kristus

-        Manghilala haporsuhon ni dongan halak Kristen na asing.

-        Marsiurupan di angka dongan halak Kristen na asing.

Molo naung ajarhononta huhut taulahon, jumpangta do dame di bagasan rohanta, jala dao do hita sian ragam ni parbadaan dohot parbolatbolatan na holan manait tu dirinta.

  

Angka dongan na hinaholongan di bagasan Tuhan Jesus Kristus..!!

2.     HAHOLONGI MA ANGKA NA MANGULUHON HO !!

Kepemimpinan Pertama yang terjadi pada seseorang di dalam dunia ini adalah . . . .

“KEPEMIMPINAN SEORANG IBU KEPADA ANAK YANG DIKANDUNGNYA!!”

Molo tung pe sai dohononta ama do na gabe “uluan” di tongatonga ni keluarga, gumodang tarida secara “SIMBOLIK” do i. Hapataranna, parjolo do dipataridahon sian “holong ni angka ina” tu ianangkhonna, ndung adong dakdanak i di bortian ni inana.

Sada kritik do i sian ahu, lumobi tu horong ama. Dohononhu naung godang holan “secara simbolik,” ala tarida do gumodang “pengorbanan” ni angka ina di na laho mangajari angka na denggan tu ianangkhonna.

Lumobi ma taringot tu partingkian:

a.        Gumodang do tingki ni angka ina mangajari angka ianangkhonna.

b.        Gumodang do tingki ni angka ina manangianghon gelengna.

c.        Gumodang do tingki ni angka ina manosoi ianangkhonna taringot tu partondion tu angka ianangkhonna.

Alani i, jumolo ma haholongi angka ina na adong di tongatonga ni bagasta!!

Ndung i pataridahon ma muse holong tu angka na manguluhon hita:

a.     Ama na mangalehon tingki, gogo nang pingkiranna laho tu marmudumudu keluarga.

b.     Panggomgomi na mangalehon tingki, gogo nang pingkiranna laho tu hamajuon ni na niuluhonna.

c.    Parhalado nang Uluan ni Huria na mangalehon tingki, gogo nang pingkiranna laho manangianghon ruas ni huria asa unang mintop haporseaon nasida. 

Songon na didok di ayat 19, “Oe ale hamuliaon ni Israel! Nunga mate tartullang hamu di atas ni angka robeanmu. Magopona i tung marragean angka ulubalang.” (Kepermaianmu, hai Israel, mati terbunuh di bukit-bukitmu! Betapa gugur para pahlawan!)

Gabe ulubalang do halak na mangalehon dirina laho mamingkirhon na ringkot di angka na niuluhonna. Ingot ma parange na denggan sian nasida. Haholongi ma nasida doshon dirinta sandiri.

Molo tung adong na humurang sian parange ni angka na manguluhon hita, ndang jumolo hita pahatahata hahuranganna:

a.      Ndang jumolo hita pahatahata hahurangan ni donganta saripe!

b.     Ndang jumolo hita pahatahata hahurangan ni angka panggomgominta!

c.      Ndang jumolo hita pahatahata hahurangan ni angka parhalado nang uluan ni hurianta!

Alai, ingkon sungkunonta do dirinta: “Ganup ari do hita mamboan nasida di tangiangta?”

Atik alani na so hea hita manangianghon nasida, gabe dohot hita manghilala hahurangan nasida!

Alani, haholongi nasida marhite tangiangta di ganup ari!

 

Angka dongan na hinaholongan di bagasan Tuhan Jesus Kristus..!!

3.        UNCONDITIONAL LOVE (KASIH TIDAK BERSYARAT)!!

Fenomena na huida hami di media sosial, isarana Facebook, nunga mansai godang halak nampunasa lobi sian dua akun! Isarana dibahen ma i goarna: “Ferdinand Fernando Silaen Satu,” “Ferdinand Fernando Silaen Dua,” sahat tu “Ferdinand Fernando Silaen Tiga.”

Boasa pola sahat tu tolu “akun media sosial” ni nasida i. Ala torop do donganna di Facebook i. Alana molo Facebook, intap ni lima ribu (5.000) halak do na boi gabe dongan di sada akun.

Lapatanna: Molo sahat tu tolu akun Facebook-na, nunga adong lobi sian sampulu ribu (10.000) halak donganna di Facebook i.

Sungkunsungkun:

a.      “Sian sampulu ribu halak i, sude do tutu na gabe donganna?”

b.     “Sian sampulu ribu halak i, sude do tutu na gabe alealena?”

c.      “Sian sampulu ribu halak i, sude do tutu jonok tu ibana?”

Alusna:

a.      “Ndang sude sian sampulu ribu halak i na gabe donganna!”

b.     “Ndang sude sian sampulu ribu halak i na gabe alealena!”

c.      “Ndang sude sian sampulu ribu halak i na jonok tu ibana!”

d.     Jala godang do “pardonganon” di dunia maya bertujuan laho tu bisnis!!

Boi do hira tarida godang donganta, hape “maya” do sude!

 

Angka dongan na hinaholongan di bagasan Tuhan Jesus Kristus..!!

Molo didok pardonganon manang paralealeon, adong do hasurungan sian na masa nangkin. Dia ma hasurunganna i?

TUBU ROHA NA MASILEHONLEHON TU ALEALENA MANANG TU HASUDUNGAN NI ROHANA I!!

Sian turpuk on, idaonta do tolu halak na patuduhon holong ni roha na so marpambuati (Unconditional Love, Kasih Tidak Bersyarat), i ma:

a.      Holong ni raja Saul mida bangsona

-        Tanda holong ni si Saul mida bangsona, dilehon ibana do dirina laho marporang manghophop bangsona, pola mate ibana di parporangan i.

-        Di tingki mangolu ibana, dilehon do ulos na uli mardongan sorta dohot sere tu angka parompuan ni Israel, tanda pangaramotionna tu nasida.

b.     Holong ni si Jonatan mida amongna si Saul

-        Alani holongna, dohot do ibana mandongani amongna laho marporang mangadopi bangso Palistim.

-        Ndang diloas holan si Saul maralo halak Palistim.

-        Dipatuduhon si Jonatan do hasatiaonna sahat tu na mate di parporangan.

 

c.      Holong ni si David mida si Jonatan

-        Sai diingot do paralealean nasida saleleng on. Sai diondihon si Jonatan hian do si David di jolo ni si Saul. I do umbahen holong roha ni si David mida si Jonatan.

Mansai uli do pangalaho holong naung pinatuduhon nasida tu hasudungan ni rohana. Holong i do na mamboan “tondi”/ “spirit” / “semangat” naimbaru. Holong i do na tongtong pangoluhon diri nasida marhite haulion naung binahenna.

Ndang manontong holong na holan “asa unang na binuatna!!” Hira na mandok: “Hulehon tu ho, asa lehononmu tu ahu!!” Ndang songon i holong na niajarhon Tuhanta Jesus.

Songon panghaholongi Tuhanta Jesus, na mora hian gabe pogos, asa mamora hita di na saluhutna:

-        Rade do Tuhanta i maninggalhon hasangaponNa

-        Rade do Tuhanta i manaon na porsuk alani dosa ni jolma

-        Rade do Tuhanta i mangolu di bagasan hapogoson

Asa:

-        Unang hita na manaon uhum alani dosa

-        Unang hita masuk tu hamatean saleleng ni lelengna

-        Gabe parjambar hita di HarajaonNa i

Alani i, lam patar do haulion ni holong i pinataridahon di bagasan pengorbanan. Lam patar do haulion ni holong i pinataridahon di bagasan pangalaho na masilehonlehon.

“Tidak ada kasih yang nyata jika tidak diwujud-nyatakan di dalam sebuah pengorbanan!”

Angka dongan na hinaholongan dibagasan Tuhan Jesus Kristus..!!

III.     PANUTUP 

Holong i do na mangarahut hita di bagasan hasadaon ni roha. Lumobi songon na nidok ni Topik ni Minggunta asa jumpangta “Parhahamaranggion Di Bagasan Holong.” Ndang holan mudar “secara biologis” na patuduhon hita na marhahamaranggi (berkeluarga).

Alai, “mudar ni Kristus” i ma na pasadahon hita saluhutna. Asa jumpangta ngolu na gok holong songon naung niajarhon Tuhanta Jesus tu hita angka siihuthonNa. Amen.

Syalom..!!

Selamat Ari Minggu Di Hita Saluhutna..!!

Tuhan Jesus mamasumasu..!!

 

Pdt. Ferdinand Fernando Silaen