ASI NI ROHA NA JINALO MARHITE NA MARASI ROHA ( 2 KORINT 8 : 7 - 15 )

PANURATAN JAMITA PARTANGIANGAN

MINGGU IV NDUNG TRINITATIS

Rabu, 23 Juni 2021

Epistel : 2  KORINT 8 : 7 – 15

Topik : Parhahamaranggion Di Bagasan  Holong ( Kasih Persaudaraan )

Angka dongan na hinaholongan di bagasan Tuhan Jesus Kristus..!!

I.      PAMUHAI

“Ise na so olo gabe mamora?” Manang Adong do sian tongatonganta na mangido asa dibagasan hahurangan ngoluna?

Tontu, marsiadu gogo do sude laho manggohi na ringkot di ngoluna. Lumobi, sai niadu do nian asa maradu marlobilobi na adong di ibana.

Lapatanna, so adong jolma na manghirim dirina asa marpogos. Sai niluluan ragam pangulaan asa lam digohi na ringkot di ibana. Dohononma, ndang adong jolma na olo dirina gabe jolma na pogos, naeng ma nian mamora ibana.

Molo didok hata “mamora” manang “hamoraon,” dia do tahe na boi gabe suhatsuhat (ukuran) ni hamoraon i?

-   Sadia godang do hepengna asa didok gabe jolma na mora?

-   Sadia godang do kendaraan di ibana asa didok ibana gabe jolma na mora?

-   Sadia balga do jabuna asa didok ibana gabe jolma na mora?

Hira na maol dohononta dia do suhatsuhat ni hamoraon i. Tontu, molo naeng dohononta donganta i manang dirinta songon halak na mora manang na pogos, ingkon adong do tudostudos tu angka jolma na asing. Dia na gumodang artana, didok ma i ummora, na ummotik didok ma i umpogos.

Sai sinulingkitan, dua do na nidokna “arta” asa tardok jolma i boi didok gabe na mora manang na pogos, dia ma i?

1.     Arta Portibion (Materiil dohot Non-Materiil)

On ma na nidokna arta na patar di simalolong ni jolma. Tung pe adong pandohan “harta yang bergerak,” “harta yang tidak bergerak,” “aset” dohot angka istilah na asing i, alai boi do i idaon ni simalolong ni jolma. Hira dia do i?

a.      Arta Materiil

-        Hepeng, sere, mobil, jabu, tano, dna

b.     Arta Non-Materiil

-        Huaso, pangkat, parbinotoan, dna

 

2.     Arta Partondion (Spiritualitas)

On ma na nidokna arta na so niida manang na so patar di simalolong ni jolma. Ummaol do etongon jala ummaol do papunguon. Alani maolna i do, boi dohonon on ma sasintongna arta na ummarga i. Hira dia do i?

a.     Pangalaho ni Tondi Parbadia na pinataridahon

-        Holong, las ni roha, dame, lambas ni roha, habasaron, habasaon, haporseaon, halambohon, hatomanon

b.     Pamingkirion ni Tondi Parbadia na pinataridahon

-        Berfikir positif terhadap segala sesuatu, mamingkirhon tu hamajuon ni natorop, dao sian egosentris.

c.      Panghataion ni Tondi Parbadia na pinataridahon

-        Panghataion na konstruktif manang membangun tu na denggan

Molo angka siihuthon ni Kristus, dua arta i do na ingkon papunguonta, lumobi arta partondion, asa pinataridahon parbue panghophop ni Tuhanta Jesus Kristus tu hita.

Alani i, jamita on, naeng manungguli hita asa tongtong mangulahon na nidok ni Tondi Parbadia di portibi on. Saleleng mangolu hita, pinatuduhon ma ngolu na tongtong mangula jala mangolu di bagasan pangajarion ni Tuhan Jesus Kristus, asa mamora hita di roha, pambahenan nang di na adong di hita. Jala asa gabe pasupasu di portibi on.

 

Angka dongan na hinaholongan di bagasan Tuhan Jesus Kristus..!!

II.   POINTER  JAMITA      

“ASI NI ROHA NA JINALO MARHITE NA MARASI ROHA”

(PEMBERIAN YANG DITERIMA DALAM PEMBERIAN)

Tarajumi do saluhut na adong di hita saonari, i ma sian Asi Ni Roha Ni Tuhanta Jesus Kristus. Molo naung gomos peoponta i di rohanta, rajumanta do saluhut na adong di hita saonari asa gabe dalan habaoran ni pasupasu tu humaliangta.

Songon pangajarion ni Apostel Paulus tu huria na adong di Korint, asa sandok huria i gabe habaoran pasupasu tu huria na adong di Judea dohot di Jerusalem, na ringkot asa lehonon pangurupion di nasida.

Nunga jumolo pinatuduhon ni huria na adong di Makedonia ngolu na marasi roha tu huria na adong di Judea dohot di Jerusalem. So sian hamoraon ni arta huria Makedonia pasahathon pangurupionna, ala tardok do nasida tongon di bagasan pangunjunan, haporsuhon jala hapogoson.

Huria na tongon dibagasan hahurangan pe boi do pasahathon pangurupion tu angka donganna, lam ma huria na adong di Korint, i do na hinirim ni Apostel Paulus tu nasida. Alani i didok si Paulus di ayat 7, “Alai songon hasurunganmuna di na saluhut, di haporseaon, di hata, di parbinotoan, di nasa haringgason, di panghaholongimuna di hami, naeng songon i ma hasurunganmuna nang di ulaon asi ni roha on.”

Hasurungan ni huria Korint sian huria na adong di Makedonia, saluhut sian asi ni roha ni Tuhan Jesus Kristus. Tarpasupasu do ngolu ni huria i, asa gabe habaoran ni pasupasu tu angka na hurangan. I do na diondolhon si Paulus tu nasida.

Tontu na gabe dohot do hita sinunggulan ni surat Apostel Paulus on. Jumolo naeng bolongkhononta ma roha na mandok “umpogos do ahu sian angka donganhu.” Molo tarajumi saluhut na adong di hita on songon asiasi ni Tuhan Jesus Kristus, tontu dao ma pandohan i di hita, ala sasintongna hamoraon ni partondion do na naeng pataridahononta tu angka donganta na mangido pangurupion.

Ndang tarajaran ni portibi on hita ngolu na marsilehonlehon, so holan na papunguhon na ringkot di dirinta sandiri.

Jugulhononta do laho papunguhon arta holan tu dirinta, hape na di humaliangta sai pasurdukhon tanganna mangido pangurupion tu hita?

Ndang songon i pangajarion ni Tuhanta Jesus Kristus. Nunga jumolo dipatuduhon Ibana na ro suman tu Jolma. Ibana do nampunasa portibi on, alai ingkon ro do Ibana gabe jolma na pogos, asa pamorahon jolma na hinongkhopNa. Dilehon do diriNa humophop jolma, Dirina na so tumanda dosa, gabe manaon haporsuhon alani dosa. 

Tarjou do hita asa marbagi tu angka donganta na asing. Lumobi di masa pandemi Covid-19 on, asa tung ungkap rohanta marsilehonlehon tu angka donganta na asing. Hira adong do pandohan na dohot manungguli rohanta asa lam manghangoluhon turpuk on:

a.        So tamba hamoraonta molo mangholit tu angka donganta na asing jala

b.        So tamba hapogosonta molo marsilehonlehon tu angka donganta na hurangan!

 

Angka dongan na hinaholongan di bagasan Tuhan Jesus Kristus..!!

Pangalaho ni huria siihuthon ni Kristus i ma pangalaho na gabe habaoran ni pasupasu. On ma na nidokna “Halak Kristen Na Berkualitas!!” Jala i do pangajarion di tongatonga ni hurianta marhite “Tri Tugas Panggilan Gereja,” i ma:

a.        Koinonia

Parpunguan na badia na pinatuduhon di bagasan ngolu na marsomba tu Debata Ama, Anak dohot Tondi Parbadia. Parpunguan na manghangoluhon pamujian tu Tuhanta dohot parhahamaranggion di angka siihuthon ni Kristus.

 

b.        Marturia

Ngolu na pinatuduhon marhite na mangolu di bagasan Hata ni Tuhanta. Ngolu na tongtong pararathon Barita Na Uli di tongatonga ni bagasna, keluarga, huria nang di humaliangna.

 

c.        Diakonia

Ngolu ni halak Kristen na patuduhon parbue ni: parsaoran, pamujian dohot pangajarion ni Tondi Parbadia. Parbue na pinatuduhon marhite na marasi roha, na masihaholongan, masiurupan, masitogutoguan, masiapulan jala na masilehonlehon tu angka na di bagasan haporsuhon.

Ndang adong na boi digotap sada sian tolu panjouon ni ngolu parhuriaon i!!

Sasadasa cara di na laho manjalo asi ni roha na sian Tuhanta Jesus Kristus, i ma marhite na manjalo marhite na marasi roha!!

 

Angka dongan na hinaholongan di bagasan Tuhan Jesus Kristus..!!

Didok si Paulus di ayat 15 songon ngolu ni huria na sintong, naeng ma patar di portibi on ngolu ni huria i marhite pandohan, “Sipeop na godang, ndang marlobilobi; jala sipeop na otik, ndang hurangan” (Orang yang mengumpulkan banyak, tidak kelebihan; dan orang yang mengumpulkan sedikit, tidak kekurangan).

Borhat do i sian pangalaho ni bangso Israel na jolo di hamongkusonna. Marsiadu papunguhon na godang do torop halak Israel di Roti Manna na dibasabasahon ni TUHAN i di nasida. Hape, so marlapatan godang ni na pinapungu nasida ala so boi alangan na pinapungupungu nasida i.

Songon i do ngolunta na tongon papunguhon na ringkot di hita. Unang alani marsigogo hita papunguhon arta, pangkat nang parbinotoan, laos na tapapungu i do laho mamboan hita paujunghon ngolunta. Manang hepeng naung pinapungupungu i do na gabe manggarar Rumah Sakit alani parsahiton i.

Taingot ma na tarsurat di 1 Timoteus 6:8, “Alai molo adong di hita sipanganon dohot parabiton, tahasabamhon ma i” (Asal ada makanan dan pakaian, cukuplah). Asa dao sian hita roha na holan mangharingkhothon dirinta sandiri. Taingot ma dirinta naung gabe marhahamaranggi (keluarga) di bagasan Tuhan Jesus. Pinatuduhon ma i dibagasan roha na masihaholongan dohot masiurupan tu angka donganta na ringkot siurupan. Amen.

 

Syalom..!!

Tuhan Jesus mamasumasu..!!

 

Pdt. Ferdinand Fernando Silaen