PORSEA DI TUHAN JESUS JALA HAHOLONGI MA DONGAN JOLMA ( 1 JOHANNES 3 : 19 - 24 )



PANURATAN  SERMON  EVANGELIUM MINGGU  JUBILATE

Minggu, 25 April 2021

Turpuk                  : 1  Johannes  3 : 19 - 24

Topik Minggu     : Mangoloi Parsuruon Ni TUHAN I ( Menuruti Perintah TUHAN )

 

I.      Patujolo

Surat 1 Johannes on masuk do tu sada sian pigapiga na nidokna Surat Am (Surat untuk orang Kristen secara umum) na adong di Padan na Imbaru. Professor Wismoady Wahono di bukuna “Disini Kutemukan” mandok, “Surat 1-3 Yohanes berasal dari kelompok atau jemaat Kristen di mana Yohanes sang Penatua (Penulis Injil Yohanes) hidup. Oleh karena itu, ketiga surat Yohanes mempunyai kedekatan dengan Kitab Injil Yohanes. Ada baiknya kalau ketiga surat itu dibaca dalam kaitan dengan Kitab Injil Yohanes.” Surat Johannes na parjolo on mangarahon halak Kristen asa lam dipauli jala lam dipatogu haporseaonna di bagasan Tuhan Jesus.

Adong hamaolon di halak Kristen hatiha i, i ma halak Kristen na tongon mangadopi pangajarion na mandok ndang Kristus ianggo Jesus, jala adong do muse aliran doketisme (ndang toho Jolma ianggo Jesus, alai holan TUHAN do Ibana). Pangajarion na lilu i ma na naeng dipatigor panurat ni Surat on asa marsihohot haporseaon ni halak Kristen i: “Jesus 100% Jolma jala 100% TUHAN. 

Tangkas do pangantusion jala pangondolon ni panurat 1 Johannes pabotohon panandaion na tangkas taringot tu Tuhan Jesus. I do na didok di 1 Johannes 1:1, “Na adong sian mulana, na hubege hami, na niida matanami, na hupanotnoti hami jala na jinama ni tangannami, taringot tu Hata hangoluan i.” Tuhan Jesus do ianggo Hata hangoluan (Firman Hidup) i, i ma TUHAN na ro gabe Jolma (Inkarnasi ni TUHAN i.) Alani i, diondolhon do: Na so adong dosa di Ibana, ai Ibana do na mambuat dosa ni jolma umbahen na ro tu portibi on (1 Joh.3:5).

 

II.        Hatorangan Ni Turpuk


Ayat 19-21: Marhiras Ni Roha Maradophon TUHAN I

Sada na tangkas naeng ingotonta paboa jolma naung manjalo Tuhan Jesus di bagasan haporseaonna, i ma na dapotan haluaon jala naung dipatigor/dipasintong di bagasan TUHAN i. I do na niondolhon di ayat 19, “Disi ma botoonta paboan sian hasintongan hita jala tapapos rohanta di joloNa.” Ndang na borhat pangantusion on sian panompaon na parjolo, alai borhat do sian pangantusion on sian haheheon ni Tuhan Jesus na mangalehon ngolu na imbaru tu jolma na porsea di Ibana.

 

Ayat 20-21 paboahon naung tangkas binoto pangalaho ni jolma na so tuk mangulahon Patik manang na jotjot jolma i madabu di bagasan dosa. I do umbahen na diarahon asa tubu jala mangolu ma di bagasan roha na manolsoli angka dosa naung binahen, ndang na gabe patuduhon habadiaon diri maradophon TUHAN i nang maradophon dongan jolma.

 

Diboto TUHAN i do saluhutna angka hagaleonta dohot hahuranganta nang sude angka na adong di rohanta. Ndang habadiaon na “dibahen” jolma asa tung marhiras ni roha maradophon TUHAN i, ala sun badia do ianggo Ibana. Roha na unduk, serep jala manolsoli angka hahurangan nang hagaleon na mambahen tama jolma marhiras ni roha tu TUHAN i marhite Tuhan Jesus.

 

Pangantusion on do na mamboan hita tu pangatusion na sintong. Unang sarombang tu pangantusion ni parugamoon ni Jahudi dohot pigapiga aliran gareja na adong di partingkianta nuaeng, mansai godang do mambahen “doktrin” asa gabe badia hombar tu pamingkirion ni nasida. Isarana: Adong ma angka sipanganon na so boi dipangan (haram) jala mambahen so badia ibana di adopan di TUHAN i. Hape, na nidok di turpuk on tangkas naeng patigorhon pangantusion i. Jumolo ma mangolu halak na porsea i di ngolu na manolsoli angka dosa dohot hagaleonna.

 

Dung adong panolsolion sian angka dosa i, ajaran ni Tondi Parbadia do jolma patupahon jala mangulahon na hinalomohon ni Tuhan i. Jala holan marhite Tuhan Jesus Kristus do tama jolma di adopan ni TUHAN i.


Ayat 22-24: Tarjalo Do Na Pinangido Di Bagasan Patik Ni TUHAN I

Ndang boi tarsirang ayat 22 sahat tu ayat 24. Lapatanna: Molo didok hata “...manang aha pe tapangido, jaloonta do sian Ibana,” ndang boi tarsirang sian “pangidoan na hombar tu Patik naung niajarhon Tuhan Jesus.” Jumolo do adong pangaradotion di patik jala diula lomo ni rohaNa i asa dijalo sipangidoan tu adopan ni TUHAN i. Jala dipabotohon do Patik na nidok ni turpuk on i ma:

 

1.     Porsea Di Goar Ni Tuhan Jesus

Ndang na mangosehon Patik ni si Musa songon na nidok di Padan na Robi, alai hasisingkop ni Patik do na naeng binoan ni pangantusion di ayat 23 di turpuk on. Tuhan Jesus Kristus do hapapatar ni Patik na Parjolo-Paopathon. Alani i, ingkon porsea di Tuhan Jesus, i ma inkarnasi ni TUHAN na ro tu portibi on. Ndang na gabe TUHAN (YHWH lapatanna: Na Adong dohot Na Naeng Adong) arah parsombaon, alai nunga patar dibagasan Tuhan Jesus, i ma TUHAN naung ro gabe Jolma.

 

Didok do nian hata “Anak-Na i,” ndang na umbuk tu pangantusion biologis di portibi on, alai naeng patuduhon “Gelar” ni Tuhan Jesus hombar tu ulaonNa saleleng marhobas di portibi on. Pola na tarida songon on: TUHAN Sitompa nasa na adong => ro tu portibi on dibagasan Daging (Jolma), i ma Jesus => Gabe suman tu Jolma, alai marhasurungan sian angka Jolma na asing ala sian Banua Ginjang, jala na sun badia do Ibana, i do na gabe didok AnakNa i.

 

Didok Tuhan Jesus do di angka tangiangNa na tarsurat di Padan na Imbaru pandohan “Amang.” Ndang na mandok tumoru Tuhan Jesus sian “Amang” na nidok di tangiangNa i, alai naeng patuduhon nasa na mangulahon lomo ni roha ni TUHAN i, tama do ibana gabe anakNa. Jala panjouon i do na mambukka pangantusion, ianggo jolma naung manjalo haluaon na sian Tuhan Jesus, ndang na gabe hatoban be, alai nunga gabe Anak (Joh.8:19; Rom 8:14-15; Galatia 4:6).  

 

Di Konfessi HKBP Taon 1996, Bindu 1, Taringot Tu Debata, B. Hasitolusadaon ni Debata, 2. Debata Anak, hlm. 85-86 tarsurat disi, “Debata Anak, i ma Jesus Kristus, hapataran ni Debata Ama na mangarumari diriNa gabe jolma;... (Allah Anak adalah Yesus Kristus, penyataan Allah Bapa yang mengosongkan diriNya dan menjadi manusia,...)”

 

Tuhan Jesus do sasadasa dalan di bagasan haporseaon asa sahat tu bagasan pangantusion jala hangoluan na sintong songon siihuthon ni Kristus. Porsea di Tuhan Jesus, i ma mangolu di bagasan pangajarionNa marhite na pasahathon diri tu Ibana, serep marroha jala unduk tu hata ni TUHAN i.

 

2.     Masihaholongan Maradophon Dongan Jolma

Roha na masihaholongan do pangarimpunan ni Patik V-X hombar tu Patik na di Padan na Robi. Molo mangolu di bagasan holong na sian TUHAN, ndang adong roha ni jolma na maralo hombar tu Patik Palimahon sahat tu Patik Pasampuluhon. Isarana: na mamunu, na margabus maradohon dongan jolma. Alai, molo holan Patik V-X na gabe ojahan na parjolo, tontu hira “paksaan” do mangulahon i, ndang na di bagasan holong na niajarhon Tuhan Jesus.

 

Roha na masihaholongan pe patar do di bagasan pangurupion tu angka dongan jolma na mangido pangarupion. Songon Tuhanta na tongtong mangurupi hita di tingki hasusaan, songon i nang parngoluanta na mangurupi donganta na ringkot siurupon.

 

III.               Sipahusorhusoron

Minggu Jubilate mangondolhon asa marolopolop hita nang sude sandok tano on tu adopan ni TUHAN i. Marolopolop do hita alani haluaon na pinatupa ni Tuhan Jesus Kristus. Ai jolma na sian hasintongan do angka naung pinalua ni Tuhan Jesus. Parolopolopon tu Tuhan Jesus dipataridahon ma sian panindangion di tongatonga parngoluanta, i ma marhite na patuduhon tiruan na sian Tuhan Jesus. I do na patuduhon naung mian hita di bagasan Ibana jala Ibana di bagasan hita. Amen.

Salam Sehat..!!

Syalom..!!

Tuhan Jesus mamasumasu

Pdt. Ferdinand Fernando Silaen 


Komentar

Posting Komentar

Postingan populer dari blog ini

KEHIDUPAN DI DALAM JANJI TUHAN (KEJADIAN 9:8-17)

Gambar
  TULISAN KHOTBAH MINGGU INVOCAVIT “Bila Ia Berseru Kepada-Ku, Aku Akan Menjawab” ( Mazmur 91 : 15a ) Minggu, 21 Februari 2021 Evangelium     :  KEJADIAN 9 : 8 – 17 Topik Minggu :  Janji Dan Kuasa Allah   Saudara-saudari yang terkasih di dalam Tuhan Yesus Kristus..!!   I.               PENDAHULUAN Teks di dalam perikop ini berasal dari sumber P ( Priest , kaum Imamat). Secara keseluruhan di dalam sumber P dan secara khusus di dalam teks ini dituturkan tentang sejarah keselamatan Israel. Dalam peristiwa mengenai air bah, secara terperinci penulis dari sumber P memaparkan bagaimana detail dari peristiwa, tokoh dan beberapa objek di dalam sebuah kesimpulan tentang “Kuasa TUHAN atas bumi dan semesta.” Secara penulisan, cerita mengenai air bah tetap mengarah kepada suatu Subjek yang tidak dapat diganggu gugat, yaitu TUHAN yang transenden (agung, berkuasa). Ketika “pusa...
Baca selengkapnya

MANISIA NA MAMINISIAHON MANISIA ( 5 MUSA 24 : 17 - 18 )

Gambar
SERMON EVANGELIUM MINGGU XXI DUNG TRINITATIS HKBP Ressort Palembang Di Ari Senin, 18 Oktober 2021 Turpuk : 5 Musa 24 : 17 – 18  Topik : Manontong Marholong Ni Roha Di Dongan ( Hidup Rukun Dengan Sesama )   I.       PATUJOLO “ My mama told me when I was young: we are all born superstars ” (Lapatanna: Dipaboa dainang pangintubu di tingki haposoonhu: sude jolma sorang tu portibi on asa gabe jolma na hasea/“ superstar ”/” bintang ”). Saponggol syair ni ende na berjudul “ Born This Way, ” niendehon sahalak parompuan na margoar Lady Gaga . Ende i borhat sian na nialamanna saleleng mandalani ngoluna jala hea do nasida manghilala sahit na nidokna “ post traumatic stress disorder, ” sada sahit alani parungkilon na so tarjalo ni rohana. Marhite ende “ Born This Way ” jala na masa naung nialaman Lady Gaga , pabotohon tu na umbege ende i, na godang do di humaliangta angka jolma na “ termarginal ” jala na gabe “ korban ketidakadilan ” dohot “ ...
Baca selengkapnya

YOHANES 3:14-21 / JOHANNES 3:14-21

Gambar
PANURATAN NI JAMITA PESTA NATAL II Sabtu, 26 Desember 2020 Evangelium : Johannes 3 : 14 - 21 Topik              : Holong Ni Debata Na Paluahon                           (Kasih Allah Yang Menyelamatkan) Angka dongan na hinaholongan di bagasan Tuhan Jesus Kristus..!! I.          PATUJOLO Buku Evangelium Johannes disurathon sahalak Sintua na sian huria Epesus na margoar Johannes. Disurathon evangelium on hira di taon 100 M. Molo jinaha sude buku Evangelium Johannes, dipatandahon do nasida “hira” na jonok tu masa ni Tuhan Jesus di tingki manghobasi gabe Jolma di portibi on. Hape sasintongna, na tarboan do ibana di “ pokok-pokok fikiran ” ni si Johannes, sisean ni Tuhan Jesus. Sada situasi na masa na diadopi halak Kristen di tingki panuratan ni Evang...
Baca selengkapnya