HUASO DI BAGASAN GOAR NI TUHAN JESUS ( ULAON NI ANGKA APOSTEL 3 : 12 - 19 )



PANURATAN JAMITA PARTANGIANGAN

MINGGU MISERIKORDIAS DOMINI

Rabu, 14 April 2021

Epistel  :  ULAON NI ANGKA APOSTEL 3 : 12 – 19

Topik    :  Mangolu Di Bagasan Holong Ni Debata

                 (Hidup Dalam Kasih Setia TUHAN)

Angka dongan na hinaholongan di bagasan Tuhan Jesus Kristus..!!

I.      PAMUHAI

Longang situtu do roha ni natorop mida si Petrus dohot si Johannes na pamalumhon sahalak na pangpang sian hatutubuna. Mamintor boi do na pangpang i mardalan dung didok si Petrus, “Anggo perak dohot sere ndang adong di ahu: alai na adong di ahu, hulehon ma tu ho: Marhitehite goar ni Jesus Kristus na sian Nasaret i, mardalani ma ho!”

Ala sai udur ibana (naung pinamalum i) dohot si Petrus dohot si Johannes, marrongoman ma saluhut halak tu nasida, tu inganan na margoar emper ni si Salomo, dibahen songgot ni rohanasida (ay.11). On ma na gabe parmulaaan (latar belakang) ni si Petrus pasahathon jamitana tu angka natorop jala na gabe jamita di Partanginganta di Minggu on.

Jamita ni si Petrus on gabe sada parbue hasasaor ni Tondi Parbadia tu angka sisean di ari Pentakosta i (Ulaon 2:1-13). Ndang adong be biar ni roha di angka sisean ni Kristus dohot na porsea di Ibana laho marpanindangion taringot tu Tuhan Jesus naung mate jala naung hehe sian hamatean.

Laos Barita na Uli on ma na gabe sada Barita tu hita di na laho manguduti parngoluonta, asa lam hehe hita mangadopi na masa di ngolunta. Asa jumolo ma Tondi Parbadia na mangajari hita asa marparbue Hata ni Tuhanta di ngolunta siganup ari.

Angka dongan na hinaholongan di bagasan Tuhan Jesus Kristus..!!

II.   POINTER  JAMITA

 

1.     GOAR NI TUHAN JESUS NA MARHUASO

Jumolo ma naeng idaonta turpuk on sian ayat 1-11. Adong ma disi sahalak na pangpang sian hatutubuna; ganup ari do ditaruhon nasida tu lambung pintu ni bagas joro, asa dipangido nasida asiasi sian angka na bongot tu bagas joro i.

Boasa nasida ingkon di lambung ni pintu? Boasa ndang masuk tu bagas joro halak na pangpang i? Adong pangantusion di halak Jahudi hatiha i, molo adong halak na “marasing pardagingonna” (cacat fisik) ndang diloas nasida marhobas gabe sahalak malim. So holan i tahe, ndang diloas nasida masuk tu bagas joro, ala pangantusion ni nasida, alani dosa do umbahen gabe songon i nasida.

On ma na nialo Tuhan Jesus saleleng marjamita, mangajari jala mambahen tanda halongangan tu angka jolma na mangihuthon Ibana hatiha i. Laos ulaon na sisongon i do na diuduti angka Sisean dohot Apostel songon dalan mamaritahon Barita na Uli tu torop jolma.

Songon jolma na marnida na masa hatiha i, songon i nang hita, ingkon longang do roha, molo adong na masa idaonta hape na so somal do nian anggo na masa i, i ma marhite tanda halongangan na pamalumhon sahalak na pangpang i. Ingkon tubu do di roha, “huaso dia do umbahen boi si Petrus dohot Johannes patupahon tanda halongangan i?”

Mamintor diantusi si Petrus do sungkunsungkun na di roha ni angka natorop i, i do umbahen didok iabana di ayat 12, “Hamu halak Israel, boasa longang rohamu mida on, boasa hami diberengi hamu, songon na hira gogonami sandiri manang hadaulatonnami mambahen mardalan halak on?”

Jala di ayat 16 didok, “Asa ala ni haporseaon di goarNa do dipargogoi goarNa halak on na niida jala na tinandamuna, gabe dilehon haporseaon na sian Tuhan i do hahisaron tu ibana di jolomuna saluhutna.” Adong haporseaon di goar ni Tuhan Jesus, jala haporseaon i do na mangalehon gogo tu angka na porsea di Ibana.

Ayat on ndang na mambahen goar ni Tuhan Jesus gabe “mantera” di hita laho patulushon na adong di rohanta. Tutu do marhuaso goar ni Tuhan Jesus, alai nihilala jala marparbue di bagasan haporseaon na sintong na mambahen asa lam martamba na porsea di Ibana.

Jadi, huaso goar ni Tuhan Jesus jumolo asa lam tang jala polin haporseaon ni jolma tu Ibana. Dung i, tupa ma angka tanda halongangan so ala parenta ni jolma.

Goar ni Tuhan Jesus ndang boi pinangke tu ulaon na so hinalomohon ni Tuhan i. Goar ni Tuhan Jesus pinangke asa gabe pujian di Ibana na marhuaso di ginjang ni saluhutna. Asa jolma naung porsea jala pinahehe ni Tuhan Jesus mangolu di bagasan GoarNa na badia i.

 

2.     HATINDANGHON MA TUHAN JESUS

Ngolu na songon dia do ngolu na hinalomohon ni Tuhan Jesus molo naung pinahehe Ibana? I ma ngolu na tongtong manghatindanghon Ibana. Ngolu songon dia do ngolu na manghatindanghon Tuhan Jesus?

a.       Ngolu na marasi roha ala naung manjalo asi ni roha na sian Tuhan Jesus.

b.       Pamanghuling na lambok jala serep songon naung pinatuduhon Tuhan Jesus

c.        Tongtong pasahathon diri tu adopan ni TUHAN i songon Tuhan Jesus na pasahathon DiriNa tu Ama i.

 

3.     DIPAUBA ROHA ASA TARSESA DOSA

Taboto do songon dia si Petrus hatiha ditangkup jala diparsilangkhon Tuhan Jesus. Diparsoada do Tuhan Jesus ala biar ni rohana. Alai, ndung hehe Tuhan Jesus, manaek Ibana tu Surgo jala naung songgop Tondi Parbadia tu ibana, gabe tubu ibana di ngolu naimbaru na tongtong pasahathon diri tu Tuhan Jesus, mago ma saluhut angka biar ni rohana.

Ndang jolma na lama be ibana, nunga gabe jolma na pinaimbaru marhite naung pinauba dirina jala disesa ma saluhutna angka dosana. I do na nidok ni si Petrus di jamitana di turpuk on. Asa adong hamubaon ni roha tu angka na ganggu dope rohana di haporseaon tu Tuhan Jesus.

Tutu do ganup ari sai tapangido tu Tuhan i hasesaan ni saluhut angka dosanta. Alai, tangkas do songon na nidok di ayat 19, “Antong, pauba jala paulak hamu ma rohamuna, asa tarsesa dosamuna.” Ndang na holan pangidoan sian hata manang tangiang asa tarsesa dosanta, alai ingkon tangkas tarida sian angka na taula di ngolunta.

Tapatandahon ma dirinta naung sinesa dosanta di bagasan ngolu naimbaru marhite Tuhan Jesus Kristus. Amin.

 

Syalom..!!

Tuhan Jesus mamasumasu..!!

 

Pdt. Ferdinand Fernando Silaen

Komentar

Posting Komentar

Postingan populer dari blog ini

MAZMUR 85:9-14

Gambar
TULISAN KHOTBAH MINGGU ADVENT  II Minggu, 06 Desember 2020 Evangelium :  Mazmur 85 : 9 – 14 Topik            :  Keselamatan Dari Tuhan Sudah Dekat                          (Nunga Jonok Haluaon I) Saudara-saudari yang terkasih di dalam Tuhan Yesus Kristus..!! I.     PENDAHULUAN Pada umumnya, setiap orang yang mengalami kegelisahan hidup oleh karena pergumulan, penyakit yang diderita, kesulitan perekonomian dan berbagai permasalahan yang membuat hidupnya sangat terbeban, pasti akan mencari solusi agar kegelisahan itu secepatnya berlalu. Berbagai cara akan dilakukan agar seseorang itu mendapatkan ketenangan. Tentu tidak satu atau dua kali saja seseorang mengalami kegelisahan di dalam hidupnya. Dan hal yang sudah pasti juga, dia sudah tahu kepada siapa dia akan “bercerita” dan mencari solusi. Bisa kepada kerabat, saudara, keluarga atau kepada orang lain yang dapat dipercaya. Secara khusus kepada orang-orang yang percaya, dia pasti sudah tahu kepada siapa pertama kali
Baca selengkapnya

KEHIDUPAN DI DALAM JANJI TUHAN (KEJADIAN 9:8-17)

Gambar
  TULISAN KHOTBAH MINGGU INVOCAVIT “Bila Ia Berseru Kepada-Ku, Aku Akan Menjawab” ( Mazmur 91 : 15a ) Minggu, 21 Februari 2021 Evangelium     :  KEJADIAN 9 : 8 – 17 Topik Minggu :  Janji Dan Kuasa Allah   Saudara-saudari yang terkasih di dalam Tuhan Yesus Kristus..!!   I.               PENDAHULUAN Teks di dalam perikop ini berasal dari sumber P ( Priest , kaum Imamat). Secara keseluruhan di dalam sumber P dan secara khusus di dalam teks ini dituturkan tentang sejarah keselamatan Israel. Dalam peristiwa mengenai air bah, secara terperinci penulis dari sumber P memaparkan bagaimana detail dari peristiwa, tokoh dan beberapa objek di dalam sebuah kesimpulan tentang “Kuasa TUHAN atas bumi dan semesta.” Secara penulisan, cerita mengenai air bah tetap mengarah kepada suatu Subjek yang tidak dapat diganggu gugat, yaitu TUHAN yang transenden (agung, berkuasa). Ketika “pusat” dari pemberitaan itu telah didapatkan, maka secara tidak langsung tulisan ini juga menyiratkan bagaim
Baca selengkapnya

YOHANES 3:14-21 / JOHANNES 3:14-21

Gambar
PANURATAN NI JAMITA PESTA NATAL II Sabtu, 26 Desember 2020 Evangelium : Johannes 3 : 14 - 21 Topik              : Holong Ni Debata Na Paluahon                           (Kasih Allah Yang Menyelamatkan) Angka dongan na hinaholongan di bagasan Tuhan Jesus Kristus..!! I.          PATUJOLO Buku Evangelium Johannes disurathon sahalak Sintua na sian huria Epesus na margoar Johannes. Disurathon evangelium on hira di taon 100 M. Molo jinaha sude buku Evangelium Johannes, dipatandahon do nasida “hira” na jonok tu masa ni Tuhan Jesus di tingki manghobasi gabe Jolma di portibi on. Hape sasintongna, na tarboan do ibana di “ pokok-pokok fikiran ” ni si Johannes, sisean ni Tuhan Jesus. Sada situasi na masa na diadopi halak Kristen di tingki panuratan ni Evangelium Johannes, i ma paraloan sian horong Gnostik (Gorik). Alani i, “ pola bahasa ” na sinurathon ni buku Johannes on mamangke hata filosofis songon na masa hatiha i, di na laho mangalo tantangan na ro sian horong Gnostik
Baca selengkapnya