HUASO HAHEHEON NI TUHAN JESUS (MARKUS 16 : 9 - 18)

PANURATAN  JAMITA  PASKAH I

“Pesta Parjolo Parningotan Ari Haheheon Ni Tuhan Jesus”

Minggu, 04 April 2021

Evangelium :  Markus 16 : 9 - 18

 

“HUASO HAHEHEON NI TUHAN JESUS”

( KUASA KEBANGKITAN TUHAN YESUS )

Selamat Paskah ma di hita saluhutna..!!

Angka dongan na hinaholongan di bagasan Tuhan Jesus Kristus..!!

I.      PAMUHAI

Di na marpungu hita nuaeng mamestahon Paskah di taon 2021 on, tung so boi do halupahononta na masa di taon na salpu, taon 2020. Taon na salpu Mamestahon Paskah hita di tongatonga ni bagasta be. Jala molo niingot, godang do sian hita na gale situtu ala so boi marpungu di Gareja.

Nang di taon 2021 on pe, adong do parasinganna sian taontaon na salpu andorang so taon 2020. Molo nuaeng, na ro hita tu bagas joro, diarahon do tongtong ingkon mangihuthon Protokoler Kesehatan ala so sidung dope Pandemi Covid-19.

On ma Pesta Paskah di hita di taon 2021 on!

Tung songon on pe na masa di hita nuaeng. Hira na mago do angka las ni roha di marningot Haheheon ni Tuhanta Jesus i? Sai unang ma adong sian hita manghilala na sisongon i.

Naeng ma nian lam tambana angka las ni roha dohot hatuaon di hita ruas ni huria na hinaholongan di bagasan Tuhan Jesus. Ala adong na ingkon siingotonta:

“Ndang boi dohononta naung MALUA hita, molo so jolo tahilala dirinta na manghilala angka hamaolon dohot sitaonon ni ngolu!”

(Kita tidak pernah merasa bebas, jika belum pernah terpenjara!)

 

Angka dongan na hinaholongan di bagasan Tuhan Jesus Kristus..!!

II.             POINTER  JAMITA

Dipaandar panurat Evangelium Markus do tu hita di parpunguanta nuaeng: “na tutu do hehe Tuhan Jesus.” Ndang pola ringkot be di hita nuaeng laho pabagashon taringot tu “history” haheheon ni Tuhan Jesus. Tasungkun ma rohanta nuaeng:

-   “Naung tutu do hehe Tuhan Jesus di ngolunta on?”

-   “Naung rap hehe do hita dohot Tuhan Jesus nuaeng on?”

I do na ringkot tahangoluhon di ngolu ni haporseaonta!

Alani i, tapaihutihut ma jamita on jala naeng ma gabe bohal na arga di ngolunta marhite na “dipataridahon Tuhan Jesus do haheheonNa tu pigapiga halak jolma.”

 

1.     HEHE DO TUHAN JESUS DI NGOLU NI JOLMA NA PORSEA DI IBANA (Ay. 9-14)

Ndang na naeng mandok: “gabe so hehe Tuhan Jesus molo adong na so porsea tu Ibana.” Alai, bagas ma hita mangantusi: molo porsea hita di haheheonNa, na disi do Tuhan Jesus patuduhon diriNa naung hehe di ngolu ni na porsea i. Jala di angka na hurang porsea, ndang mangolu haheheonNa di dirina.

Di pamuhai ni turpuk on, didok tu si Maria Magdalena do jumolo dipataridahon diriNa, naung hea dipabali pitu sibolis sian dirina. Tangkas do i mangalehon pangantusion tu hita:

“Na ingkon jumolo do dipalao sibolis sian diri ni jolma i asa porsea di haheheon ni Tuhan Jesus, jala ro Ibana patuduhon hangoluan naimbaru.”

Lapatanna:

Jumolo do naeng loasonta Tuhanta Jesus palaohon hadirion ni sibolis sian jolma i, asa tung mian Tuhan Jesus di haporseaon nang di ngoluna.

Dung dipalua sibolis sian dirina, diida ibana naung hehe Tuhan Jesus na ro mandapothon ibana. Laos i do na mangonjar roha ni si Maria Magdalena laho paboahonsa tu angka na mandongani Tuhan Jesus na jolo, angka na marsak jala na tumatangis i.

Dison boi do idaonta parasingan ni si Maria Magdalena sian angka na mandongani Tuhan Jesus na jolo, angka na marsak jala tumatangis di naung dibaritahon tu nasida haheheon ni Tuhan Jesus:

a.     Maria Magdalena, hibul do rohana naung manghangoluhon Tuhan Jesus di dirina. I do na mamboan ibana gabe “parbarita na uli.”

Ndang dipangke ibana pingkiranna. Aut sura dipangke ibana pingkiranna, tontu boi do dohononna “na marnipi do ahu” manang dohononna “na menghayal do au!” Laos gabe ndang olo ibana mamaritahon barita na uli taringot tu haheheon ni Tuhan Jesus.

Molo dipangke ibana do “pangantusion na masa” jala “na somal” hatiha i, boi do dohononna, “ndang na Jesus na ro i, ai begu do i,” ala boi dohonon, masa dope pangantusion hatiha i taringot tu begu ni halak naung mate. Laos gabe ndang olo ibana mamaritahon barita na uli taringot tu haheheon ni Tuhan Jesus.

Alai, ditadinghon ibana do “pingkiranna” dohot “pangantusion na somal hatiha i,” dioloi ibana do hapapatar ni Tuhan Jesus di ngoluna. Jala gabe parbarita na uli ibana.

Relevansi:

On do sada pangajarion na mansai arga marhite jamita sadari on. Di hita angka naung manjalo Kristus di ngolunta: Hehe ma hita gabe parbarita na uli!

Ndang ingkon gabe “partohonan” di tongatonga ni huria asa didok “parbarita na uli.” Alai, marsitutu ma dipangke hangoluanta patuduhon dirinta naung pinahehe ni Kristus jala naung pinalua ni Kristus sian gomgoman ni sibolis dohot angka gogo na sian portibi on.

Gabe mago ma angka lungun ni roha dohot arsak ni roha. Marganti ma gabe pingkiran, panghataion nang parulaon na ginohan ni Tondi Parbadia 

Laos tapatuduhon naung ro Tuhan Jesus papatarhon haheheonNa na manghorhon ngolu naung pinahehe ni Kristus. Gabe di bagasan ngolu na imbaru ma hita manguduti parngoluanta di bagasan Tuhan Jesus.

 

b.     Angka jolma na tumatangis, tutu do nasida tumatangis hatiha i marnida sitaonon ni Tuhan Jesus. Tutu do nasida malungun marnida Jesus na mate di hau pinarsilang i. Alai, intap ni hamatean i do haporseaon ni nasida. So sahat di nasida haporseaon na mandok naung hehe Jesus di ngolunasida.

On ma na marasing sian nasida molo dipaadop tu haporseaon ni Maria Magdalena i.

Ndang dohot hehe Tuhan Jesus di nasida. Tutu na holan na mate i Kristus na diboto nasida. I do na mambahen ngolu nasida tongtong dibagasan halungunon jala arsak dohot biar ni roha. Ndang dapotan di nasida dame, las ni roha dohot hatuaon marhite haheheon ni Tuhan Jesus.

 

Relevansi:

On do sada pangajarion na mansai arga marhite jamita sadari on. Di hita angka siihuthon ni Kristus naung mandalani taontaon rap dohot Tuhan Jesus, unang tapasombu dirinta tongtong dibagasan halungunon, arsak dohot biar ni roha.

Tutu do nian naung mate Kristus i, nang hita pe ingkon sahat do tu hamatean i. Alai, ndang holan sahat tu hamatean i huaso ni Kristus!

Na hehe do Ibana manaluhon hamatean, jala dipahehe do angka na porsea di haheheonNa i.

Molo tongtong dope hita di bagasan arsak, halungunon jala biar ni roha na binahen ni portibi on, i do patuduhon na so polin dope haporseaonta di haheheon ni Tuhan Jesus.

Alai baliksa, naeng ma nian hita malua sian sitaonon ni portibi on marhite na hehe hita di bagasan las ni roha na sian Tuhan Jesus di na laho mangadopi na masa di ngolunta.

Hira songon dia do asa boi hita marlas ni roha di tingki ro arsak manang sitaonon??

Jempek do alusna: Unang ma marpanggortap panghirimonta tu Tuhan Jesus!

Di na rap i hita mangadopi na masa on di bagasan Tuhan Jesus gabe mangolu ma panghirimonta na mamboan hita boi malua sian angka arsak, halungon nang biar ni roha. Marsingkat ma gabe mangolu di bagasan hatuaon ala raphon Kristus do hita mangolu.

 

Angka dongan na hinaholongan di bagasan Tuhan Jesus Kristus..!!

Nang songon di hita, songon dua halak sian nasida, na pinapatar ni Tuhan Jesus diriNa di bagasan rupa ni na asing. Hehe do nasida gabe mamaritahon barita na uli, tung pe dipataridahon Tuhan Jesus bohiNa so songon bohi naung tinanda nasida jumolo.

Molo tung pe naung bangkit nasida gabe parbarita na uli, sai adong dope na so porsea di haheheon ni Tuhan Jesus i. Alai, ndang na gabe mansohot barita na uli i. Lam rarat do barita na uli i, sahat tu hita nuaeng on.

Relevansi:

Fenomena do na masa di hita halak Kristen nuaeng on. Dia ma i? Lam godang do angka lukisan ni Tuhan Jesus hombar tu pingkiran ni pangalukis i. Laos marpanghorhon do i tu panggombaronta taringot tu bohi ni Tuhan Jesus i.

On ma na paingothon hita. Ndang na sala lukisan na jotjot taida i. Jala tabahen ma i gabe pamorahon hita manggombarhon bohi ni Tuhan Jesus na gok dame i. Tung pe na so pola ringkot ingkon botoonta bohiNa na “asli.”

Na olo do ro Tuhan Jesus papatarhon diriNa tu jolma marrupahon rupa na asing.

Songon dia ma i?

Taingot ma, na olo do TUHAN i mamangke rupa ni jolma songon hita on, jala marhite i ma gabe tatanda Tuhanta na margoar Jesus. Alai, ndang na gabe rupaNa i na gabe siingotonta, ai TUHAN do Ibana. LomoNa do naeng patuduhon diriNa songon dia pe i.

Tauji ma marningot naung tarsurat di Padan Na Robi:

a.       1 Musa 18:1-3

“Dung i diida si Abraham ma Jahowa di tombak Mamre, tongon hundul ibana di baba pintu ni undungundungna, di parngiar ni ari. Dung i manaili ma ibana, gabe diida ma tolu halak jongjong di jolona. Jadi dung diida marlojong ma ibana manomunomu nasida sian baba pintu ni undungundungna, jala dipatungki tu tano. Dung i ninna ma: Molo asi rohaM marnida ahu, ale Tuhanhu, sai unang laosi naposoMon.”

(Kemudian TUHAN menampakkan diri kepada Abraham dekat pohon terbantin di Mamre, sedang ia duduk di pintu kemahnya waktu hari panas terik. Ketika ia mengangkat mukanya, ia melihat tiga orang berdiri di depannya. Sesudah dilihatnya mereka, ia berlari dari pintu kemahnya menyongsong mereka, lalu sujudlah ia sampai ke tanah, serta berkata, “Tuanku, jika aku telah mendapat kasih tuanku, janganlah kiranya lampaui hambamu ini.)

b.       2 Musa 3:4

“Alai dung diida Jahowa ibana ro naeng manilik, joujou ma Debata sian tongatonga ni ramba i, ninna ma mandok ibana: Jo Musa, Musa! Dison do ahu, ninna.”

(Ketika dilihat TUHAN, bahwa Musa menyimpang untuk memeriksanya, berserulah Allah dari tengah-tengah semak duri itu kepadanya: “Musa, Musa!” dan ia menjawab: “Ya, Allah.”)

 

Jala di Padan na Imbaru: “Patar ma TUHAN i dibagasan Jesus Kristus!”

Nuaeng, na dohot do hita marnida hapapatar ni Tuhanta i marhite angka jolma na adong di humaliangta. Na rap do hita mangolu dohot angka dongan na ringkot siuruponta.

Jala tongtong do patar haroro ni Tuhan Jesus di ngolunta molo mangolu hita di bagasan dame, holong dohot ngolu na marasi roha! Didok Tuhan Jesus di Mateus 25:40, “...... nasa na binahenmu tu sada sian anggingKu angka na metmet on, na tu Ahu do i dibahen hamu.” Disi ma idaonta Tuhan Jesus.

 

Angka dongan na hinaholongan di bagasan Tuhan Jesus Kristus..!!

2.     JAMITAHON HAMU MA BARITA NI TUHAN JESUS TU SALUHUT NA TINOMPA (Ay.15-18)

Tangkas parsuruon ni Tuhan Jesus tu angka naung mananda jala pajumpang dohot Ibana, “Laho ma hamu tu liat portibi on; jamitahon hamu ma Barita na Uli i tu nasa na tinompa.”

 

Tapabagas ma na nidok ni Tuhan Jesus i:

a.                   Laho ma hamu tu liat portibi on!

So holan na ingkon “ro” hita tu Tuhan Jesus, alai na ingkon “laho” hita mamboan  barita taringot tu Ibana! Tu dia? Ndang holan tu bagasta! Alai, dohot tu sandok liat ni portibi on!

Bah tutu? Na ingkon laho tu Luar Negeri do hita?

Ndang na songon i na nidokna disi! Alai, manang tudia pe hita mangalangka:

-   Ingkon boanonta do Barita na Uli taringot Tuhan Jesus.

-   Ingkon paboaonta do ngolunta on songon ngolu naung pinaimbaru ni Tuhan Jesus!

 

b.     Jamitahon hamu ma Barita na Uli i tu nasa na tinompa!

Jumolo ingkon lopokhononta do pangantusionta di pangalaho ni Tuhan Jesus andorang so “boanonta” barita taringot tu Ibana, ima: Tuhan Jesus do Silehon Hangoluan!!

Lapatanna: Sude pangalahonta on, gabe pangalaho na mamboan hangoluan di saluhut na tinompa!

So holan manghaholongi angka dongan jolma, alai dohot do: Manjaga ekosistem alam, Mengurangi polusi udara, Menjaga stabilitas lingkungan hidup dan tetap hidup di dalam protokoler kesehatan!

 

Angka dongan na hinaholongan di bagasan Tuhan Jesus Kristus..!!

Dungkon i, “nasa na porsea jala na tardidi, dapotan haluaon, alai na so porsea, hona uhum do!”

Lapatanna:

Angka naung manjalo Barita na Uli marhite hangoluan naung tabaritahon i dapotan haluaon na sian Tuhan Jesus.

Baliksa, na so olo manjalo hangoluan i, hona uhum do! Nang tu jolma nang tu sude angka na tinompa i!

Molo naung denggan boanonta tu nasida angka hinauli na niajarhon ni Tuhan Jesus, dijalo manang so dijalo, idaonta ma na gabe parbuena di nasida!

So holan na ingkon porsea, alai ingkon dohot do nasida tardidi. Molo didok tardidi, lapatanna: “naung sangkabona di hamamate dohot di haheheon ni Tuhan Jesus !”

Di angka jolma naung porsea jala nunga sangkabona dohot Silehon Hangoluan i, dapotan ma nasida haluaon naung pinatupaNa!

Tugas di hita holan na mamaritahon do! So adong be na patut ulahononta so holan na gabe Parbarita na Uli di bagasan ngolunta on!

Angka dongan na hinaholongan di bagasan Tuhan Jesus Kristus..!!

Aha ma na nilehon ni Tuhan Jesus tu hita songon “alat” manang didok di turpuk on “na gabe tanda” di na laho mamaritahon Barita na Uli i?

a.     Pabalion angka sibolis marhitehite goar ni Tuhan Jesus

b.     Manghatahon hata na imbaru

c.     Jomputonnasida angka ulok ndang mahua nasida, Diinum rasun hamatean ndang pola mahua nasida

d.     Diinum rasun hamatean ndang pola mahua nasida

e.     Ampehonnasida tanganna tu angka na marsahit gabe malum hilalaonna

Hira angka ulahon na so masuk tu pingkiran ni jolma do na nidok di ayat on. Alai, marhite na tarsurat i, ingkon jumolo do mangantusi di “pemahaman na so pola kaku.” Lapatanna: Jumolo do hita “ndang membatasi pemahaman taringot tuson.”

Alkitab manang Bibelta on dijaha dakdanak SD sahat tu Profesor. Naeng dohonon disi, bidang do pangantusion, boha ma molo dakdanak SD mambahen pangantusion sahat tu na Profesor mangantusi na tarsurat di Alkitab/Bibelta on. 

Ndang sala molo hita mangantusi secara harafiah, ingkon adong do idaon tandatanda songon na tarsurat i. Jala unang disalahon molo adong na mangantusi marhite interpretasi/penafsiran. Ai bidang do pangantusion na naeng niajarhon Tondi Parbadia tu hita.

Alai, ala jamita do on, hira hubahen ma pangantusion “na so sian harafiah” manang “interpretasi/penafsiran” naung niajarhon Tondi Parbadia tu ahu na manjamitahon on tu hamu:

a.     Pabalion angka sibolis marhitehite goar ni Tuhan Jesus

Sibolis ndang na holan ro tu jolma na “siarsiaron” (kesurupan). Alai, di sude pangalaho na so dihalomohon ni Tuhan Jesus, sibolis do na ro tu jolma i. Tuhan Jesus sandiri diunjuni sibolis do, jala talu do pangunjunan ni sibolis i.

Alani i, marhite angka parbarita na uli naung sahat tu liat portibi on, gabe lam moru ma angka pangalaho ni jolma na ro sian sibolis i. Marsingkat ma i gabe pangalaho na gok holong, las ni roha dohot dame na sian Tuhan Jesus i.

 

b.     Manghatahon hata na imbaru

Manghatahon hata na imbaru na dibagasan halambohon, na dao sian hata na rumar jala dibagasan murukmuruk. Angka na porsea, naeng ma nian lam imbaru be hatana na mamboan angka dongan jolma lam mananda Kristus Parasiroha i.

 

c.     Jomputonnasida angka ulok ndang mahua nasida, Diinum rasun hamatean ndang pola mahua nasida

Ndang na naeng didok dison “uji nyali!” manang mandok “ilmu kebal” ingkon adong di halak na porsea. Alai, ma molo didok “ulok” boi do gabe sada pangantusion “marabahaya” na boi mambahen jolma marmara.

Dison ma didok di halak na porsea, sai diramoti jala dijaga Tuhan Jesus do tondi nang pamatangna sian “ancaman alam” na mambahen ibana marmara. Molo dilehon Tuhanta i dope tingki laho mamaritahon barita na uli, sai dijagai do hita.

Alai, songon na hudok nangkin, ndang na gabe “uji nyali” manang gabe “kebal” jolma i. Lobi sian i, unang gabe sahat hita tu pangalaho “na mangunjuni Tuhan i.” Nunga taboto mara do i, hape sai ulahononta. Nunga taboto rasun i, hape tong ingkon inumonta, ala sasintongna boi do tabolonghon rasun i.

 

d.     Ampehonnasida tanganna tu angka na marsahit gabe malum hilalaonna

Tutu do molo didok “sahit,” somalna pangantusionta tu angka sahit ni pamatang on. Isarana: batuk, demam, jantung, kanker dohot angka sahit marhite parbinotoan sian medis. Alai, unang holan intap ni i tabahen pangantusionta. Ingkon sahat do hita marnida, na adong do “sahit di partondion” ni jolma.

Lapatanna:

Halak na porsea dilehon do tandatanda na gabe parhitean ni hamamalum manang hahisaron ni tondi dohot pamatang ni dongan jolma. Jala tangkas do ndang na gabe ibana mambahen malum, alai gabe parhitean hamamalum manang pahisarhon  sahit ni partondion nang pamatang ni angka dongan jolma.

Songon dia carana asa boi diulahon halak na porsea i. Dipasahat do i marhite tangiang. Laos Tondi Parbadia do na mangajari halak na porsea i boi gabe parhiteanNa. Jala ingkon tangkas do di hita pangantusion, ndang boi gabe paksahononta Tondi Parbadia mangulahon na tahalomohon. Alai, pinasahat ma tu Ibana, sai lomo ni roha ni Tuhan i do tongtong na ingkon saut.

Sian sude parulaon nang angka tanda na dipasahat Tuhan Jesus tu halak na porsea saluhutna asa lam tarbarita: Tuhan Jesus Kristus naung hehe jala dohot do pinahehe angka na porsea na mangolu di bagasan Tuhan Jesus. Lam dipargogoi ma hita mangulahon na hombar tu lomo ni rohaNa i. Amen.

Syalom..!!

Selamat Paskah ma di hita saluhutna..!!

Tuhan Jesus mamasumasu..!!

 

Pdt. Ferdinand Fernando Silaen