YOHANES 3:14-21 / JOHANNES 3:14-21

PANURATAN NI JAMITA PESTA NATAL II

Sabtu, 26 Desember 2020

Evangelium : Johannes 3 : 14 - 21

Topik              : Holong Ni Debata Na Paluahon

                          (Kasih Allah Yang Menyelamatkan)

Angka dongan na hinaholongan di bagasan Tuhan Jesus Kristus..!!

I.         PATUJOLO

Buku Evangelium Johannes disurathon sahalak Sintua na sian huria Epesus na margoar Johannes. Disurathon evangelium on hira di taon 100 M. Molo jinaha sude buku Evangelium Johannes, dipatandahon do nasida “hira” na jonok tu masa ni Tuhan Jesus di tingki manghobasi gabe Jolma di portibi on. Hape sasintongna, na tarboan do ibana di “pokok-pokok fikiran” ni si Johannes, sisean ni Tuhan Jesus.

Sada situasi na masa na diadopi halak Kristen di tingki panuratan ni Evangelium Johannes, i ma paraloan sian horong Gnostik (Gorik). Alani i, “pola bahasa” na sinurathon ni buku Johannes on mamangke hata filosofis songon na masa hatiha i, di na laho mangalo tantangan na ro sian horong Gnostik i.

Sada “dogma theologis” na dipasahat buku Evangelium Johannes on i ma na mangondolhon Hata naung gabe Jolma di bagasan Tuhan Jesus Kristus. Tuhan Jesus. Ndang pola tangkas pinatorang ni si Johannes sian hatutubu ni Tuhan Jesus jala ndang pola sude angka tanda halongangan naung pinatupa ni Tuhan Jesus dibahen di buku Johannes on.

Sude na pinillit jala na sinurathon ni buku Johannes mangalehon pangantusion di hadirion ni Tuhan Jesus jala na paandarhon ngolu ni partondion di angka na manjalo Tuhan Jesus di rohana. Tarlumobi di turpukta sadari on na paandarhon tu hita sada hangoluan partondion ni jolma naung manjalo Tuhan Jesus di rohana.

Tangkas dipabotohon di ayat 1 bindu 3 ni turpuk on, dipaboa do adong sahalak na margoar Nikodemus, sahalak Sintua ni Jahudi. Nikodemus sahalak “tokoh agama” ni halak Jahudi na tontu naung bagas parbinotoanna taringot tu parugamoon Jahudi.

Jala na “menarik” idaonta parjumpangan ni Nikodemus dohot Tuhan Jesus di tingki bornginborngin. Jala na “menarik” muse idaonta, si Nikodemus do na ro manopot Tuhan Jesus.

Adong sada “pergumulan” di roha ni si Nikodemus, pola ditopot ibana Tuhan Jesus di borngin ni ari. Ala sahalak “tokoh” do ibana di halak Jahudi, jagaonna do hadirionna asa unang gabe sogo roha ni halak Jahudi marnida ibana, ala dijumpangi ibana Jesus na tongon hatiha i maralo tu angka pangajarion ni Jahudi.

Alai adong do na manginona di rohana. Idaon ni ibana huaso ni Tuhan Jesus na gok Tondi di tingki marjamita, mangajari jala mambahen angka tanda halongangan. Pangantusion ni ibana hatiha i, na marsahala jala na diramoti Tondi ni TUHAN i do Jesus pola godang jolma gabe mangihuthon Ibana.

Dibahen Tuhan Jesus do sada ondolan tu ibana taringot tu “hangoluan na marmula sian mulak tubu sian ginjang marhite Aek dohot Tondi” (Kehidupan bermula dari kelahiran baru di dalam Air dan Roh). Naeng boanon ni Tuhan Jesus do si Nikodemus di hangoluan na binoanNa marhite na manjalo hasesaan ni dosa sian Tuhan Jesus dohot na mangolu marhite pangajarion na sian Tondi Parbadia.

Mangula ma Tondi Parbadia di roha ni si Nikodemus, tarjalo ibana do pangajarion na sian Tuhan Jesus. Jala nunga dapot hangoluan na imbaru ibana sian Tuhan Jesus.

 

Angka dongan na hinaholongan di bagasan Tuhan Jesus Kristus..!!

II.      POINTER JAMITA

Turpuk on i ma pangajarion na sian Tuhan Jesus na mangalehon hangoluan na imbaru di angka jolma na manjalo Ibana di rohana. Lumobi di Pesta II Parningotan Ari Hatutubu Ni Tuhan Jesus sadari on. Ndang holan na naeng marningot hita di hatutubu di bara ni pinahan. Alai, asa antusanta jala lopokhononta di rohanta, naung tubu do Tuhan Jesus di tongatonga ni parngoluonta nuaeng.

Hangoluan na imbaru do na naeng pinasahat ni barita na uli di hita sadari on. Hangoluan na imbaru songon parbue holong ni roha ni Tuhanta mida hita angka jolma pardosa. Alani holongNa do tupa di hita haluaon asa unang mate hita alani dosa naung tabahen saleleng on.

Alani i, tapaihutihut ma mutiha na mansai arga na boi idaonta sian jamita di ari sadari on. Laos i do naeng boanonta gabe gogo dohot ngolu na imbaru laho manguduti parngoluonta:

 

1.   Tuhan Jesus Na Marhuaso Laho Paluahon Saluhut Jolma (Ay.14-15)

Ditaringoti Tuhan Jesus do si Musa, sada “tokoh besar” di halak Jahudi. Dilehon do tu ibana sada huaso laho manguluhon pataridahon huaso ni TUHAN i di na laho mamboan bangsona tu tano na pinarbaga i, i ma tano Kanaan.

Topet di halongangan manang pahorsihan do bangso i marmungutmungut ala so sahat dope nasida tu tano na pinarbagabaga i. Gabe ditongos Jahowa ma tu tongatonga ni bangso i angka ulok tulung api (ular tedung) laho mamargut bangso i, gabe marmatean mansai torop sian Israel (4 Musa 21:4-6).

Manolsoli ma nasida ala parungutungutonna, laos disuru Jahowa ma si Musa asa mambahen sada ulok tulung api sian tombaga jala disangkothon ma tu sada hau partonggol (tiang). Molo adong na hona pargut ulok, mamintor diida ma na disangkothon di tiang i, ingkon mangolu ma ibana (4 Musa 21:7-9).

On ma sada pangajarion di angka na porsea asa tung holan marpanatap tu Tuhanta. Godang pe angka pangunjunan na “mamargut” na porsea i, marpanatap ma tu Tuhan Jesus na pinatimbo di habangsaNa, ingkon mangolu do ibana. Tuhan Jesus do na mangalehon haluaon jala hangoluan di angka na porsea. Ibana naung pinatimbo na mangatasi saluhutna.

 

2.   Tuhan Jesus Do Hapapatar Ni Holong Ni Roha Ni Ama Na Di Banua Ginjang (Ay. 16)

Nunga ro Tuhan i marhite hadirion ni Jesus Kristus na gabe Jolma, na mangalehon diriNa gabe pelean sitobus dosa ni saluhut jolma. Ndang holan marhite panghataion didok na holong do roha ni Tuhan i mida angka jolma, alai na dibahen do diriNa sandiri patuduhon jala papatarhon holong ni rohaNa marhite panobusion di hau pinarsilang i.

Singkop do tarpatupa saluhutna! Manghilala jala mamparsaulihon do saluhut jolma so pola marnida sian bangso dia manang horong dia ibana. Dipasada do saluhutna marhite haporseaon di bagasan Tuhan Jesus Kristus.

So holan panobusion na pinarade ni Tuhanta, na dohot do hangoluan sisaleleng ni lelengna diparade di angka jolma na porsea di Tuhan Jesus. Jesus Kristus do na paradehon inganan harajaon banua ginjang tu angka na porsea jala satia tu Ibana.

 

3.   Malua Do Halak Na Porsea Jala Hona Uhum Angka Na So Porsea Di Tuhan Jesus (Ay. 17-21)

Dung patar saluhutna holong ni roha ni Tuhan i marhite Tuhan Jesus Kristus, tarida ma Panondang na manondangi angka na holom i. Disi do boi idaon, tudia do laho angka jolma dung ro Hatiuron i. Na tongtong do ibana mian di haholomon i, manang gabe diihuthon ibana ma Hatiuron sian Panondang i.

Boi do boanonta di situasi na jotjot taadopi di tongatonga ni bagasta. Aut sura “mati lampu” jala so adong “cahaya” manang panondang di bagasta, mardalan hita, laos gabe olo do tartuktuk hita ala so boi idaonta na adong di jolonta.

Songon i nang parngoluan ni halak na porsea. Molo so disondangi hatiuron na sian Tuhan Jesus, jotjot tartuktuk jala hansitan hita mangadopi huaso ni portibi on. Ingkon adong do na manondangi hita asa tung idaonta didia do dalan na tigor, jala asa unang masuk hita tu rante ni sibolis.

 

III.             PANUTUP

Inisiatif Ama na di banua ginjang papatarhon holongNa marhite hatutubu ni Tuhan Jesus na tapestahon di ari sadari on naeng paingothon hita asa unang be hita manimbil sian haporseaonta tu Tuhan Jesus. Holan Ibana do Sisada Tuhan ni na mangolu dohot na mate.

Mian ma hita di bagasan holong ni roha na binoanNa. Laos gabe tiur ma pardalanan ni ngolunta di portibi on. Ndang madabu be hita di bagasan dosa ala naung boi idaonta marhite sondang na sian Tuhan Jesus. 

Alani i, lam tartuju ma hita tu hangoluan sisaleleng ni lelengna naung pinarade  ni Tuhan Jesus di angka na porsea di Ibana, i ma hangoluan na imbaru. Jala marparbue ma hatutubu ni Tuhan Jesus di rohanta na paimbaruhon angka pamingkirion, panghataion nang parulaonta siganup ari. Tapangasahon ma Tuhan Jesus naung tubu di rohanta di na laho mandalani parngoluanta. Amen.

Syalom..!!

Selamat ari Natal ma tu hita saluhutna..!!

Tuhan Jesus Mamasumasu..!!

 

Pdt. Ferdinand Fernando Silaen.