IBRANI 11:1-4 / HEBER 11:1-4

PANURATAN JAMITA

Evangelium : Heber 1 : 1 - 4

Angka dongan na hinaholongan di bagasan Tuhan Jesus Kristus..!!

 

I.         PATUJOLO

Panuratan di turpuk Heber sasintongna ndang marupa surat na tinongos ni sahalak ni panurat tu halak/kelompok ni hasahatan ni surat. Alai panuratan ni Heber on, i ma sada jamita na ganjang na tinujuhon tu sude halak Kristen hatiha i di Heber.

Harimpunan ni Heber on laho mangondolhon sada pangantusion, i ma “Nunga Dipapatar TUHAN I HataNa Marhite Anak.” Anak i, i ma Jesus na tumimbo sian si Musa (Heber 3:1 - 4:13). Jesus ma Sintua ni Malim na bolon naung manorusi angka banua ginjang (Heber 4:14) jala gabe Jolma do Ibana.

Tudos do songon topik ni Pesta Natal I na diondolhon deba angka huria di portibi on di na mamestahon ari Hatutubu ni Tuhanta Jesus Kristus. Tuhan Jesus do hapapatar ni Hata dohot Huaso Ama na di banua ginjang.

Ala topet di tingki masa angka “hata filosofis” lumobi di masa ni sahalak filsuf na margoar Plato, jonok do “alur panghation” di jamita on tu “konsep filosofi” ni si Plato. Boi dohonon, panuratan ni Heber on sada bagian aktualisasi pangantusion di haporseaon ni halak Kristen di konteks ni filsafat Plato. 

Jamita marhite panuratan ni Heber on naeng patolhashon tu hita sada pangantusion theologis taringot tu Hakristenon manang “pokok inti” panghaporseaon ni jolma tu Tuhan Jesus.

 

Angka dongan na hinaholongan di bagasan Tuhan Jesus Kristus..!!

 

II.      POINTER JAMITA

      

DI BAGASAN HAPORSEAON DO PATAR HUASO NI TUHANTA MARHITE JESUS KRISTUS

 

1.   Ayat 1 :

“Alai anggo haporseaon i pos ni roha do i di angka sihirimon, jala pamotoan na tontu taringot tu na so niida.”

(Iman adalah dasar dari segala sesuatu yang kita harapkan dan bukti dari segala sesuatu yang tidak kita lihat.)

 

Marbonsir ma turpuk on, lumobi turpuk jamita sadari on di hamamasa di angka halak Kristen hatiha i. Adong pangunjunan di angka halak Kristen na sian Jahudi asa ditadingkhon Hakristenon jala mulak nasida tu ugamo Jahudi.

Ala pangunjunan taringot tu haporseaon ni nasida, gabe ancaman ma i di ngolu ni Halak Kristen na sian Jahudi. Secara realistis pamingkirion, hira diboan do nasida asa unang dohot manghaporseai Jesus na pinarsilanghon ni bangso nasida: Ai na taruhum do Ibana, pola diparsilanghon di hau pinarsilang.

Dison ma panurat ni Heber patogutoguon haporseaon ni nasida. Ai tarsilang pe Tuhan Jesus, so alani dosaNa, alani dosa ni saluhut jolma di portibi on do.

Laos i do ondolan, na dipatutoru Tuhan Jesus do diriNa holan laho humophop jolma, polo dioloi Ibana sangkap ni Ama na di banua ginjang asa Ibana gabe parhitean “Pelean Situtungon” laho manghophop saluhut jolma manisia.

Jala ayat on ma laho pasingkophon panghaporseaon ni nasida asa unang ganggu di haporseaonNa tu Tuhan Jesus. Marhite haporseaon do na boi marnida hapapatar ni Tuhan Jesus Sipalua i. Tondi Parbadia do na patogu haporseaon ni jolma na porsea.

Marhite haporseaon do boi idaon ni halak na porsea angka sihirimon, i ma Hangoluan Sisalelenglelengna na pinarade ni Tuhan Jesus Kristus di banua ginjang. Panghirimon na mangolu i ma na gabe gogo di angka na porsea asa lam tang jala polin haporseaonna di Tuhan Jesus.

Marhite haporseaon do muse boi idaonta angka na so boi idaon ni simalolong. Tutu, ndang diida nasida hatiha i hamamate, hababangkit jala hananaek ni Tuhan Jesus marhite simalolong nasida. Alai, marhite haporseaon, gabe diparhatutu nasida, masa do i jala ndang adong gabus disi.

Laos on do muse na paingothon hita di hamamaju ni zaman nuaeng on. Lam hembang angka parbinotoan dohot kemajuan zaman, ndang pola loja be jolma mangalului na so binotona marhite Google. Hira na singkop sude informasi na nidapot sian Google i,

Boi do i gabe ancaman di ngolu ni haporseaonta. Gabe olo lam mandao jala tading angka ngolu parugamoon jala panghaporseaonta tu Tuhan Jesus. Dipanghulingi hita marhite jamita on, asa unang madabu hita tu parsigantungan di angka zaman on, alai hot ma di haporseaonta tu Tuhan Jesus.

Hamajuon ni zaman, ndang boi mamboan hita tu hangoluan sisaleleng ni lelengna. Alai, naeng ma nian marhite hamajuon ni zaman on, gabe sada fasilitas di na laho pabagashon pangantusion di angka huaso ni Tuhanta. Gabe lam polin jala lam tang ma haporseaonta.

 

2.        Ayat 2 :

“Di bagasan i do dapotan panindangion

angka natuatua na robi”

(Sebab oleh imanlah telah diberikan kesaksian kepada nenek moyang kita.)

 

Marhite haporseaon do tubu panindangion di angka na porsea. I do na diulahon angka siihuthon ni Kristus na parjolo, jala sahat ma di hita nuaeng on. Ala panindangion ni nasida, boi sahat barita na uli tu hita.

Jala marhite panindangion i do boi idaonta na mangula do Tondi Parbadia di tongatonga ni portibi on, boi nuaeng hita gabe porsea di Tuhan Jesus. Jumolo do nasida porsea, dihatindanghon ma tu angka pinompar dohot sisolhotna, gabe lam tamba ma angka siihuthon ni Kristus.

Jala nuaeng, sahat ma “estafet  pekabaran Injil” tu hita. Dung porsea jala mangolu hita di bagasan haporseaonta i, naeng ma nian, tauduti ulaonta di bagasan panindangion na sintong taringot tu Tuhan Jesus.

Tondi Parbadia do na mangajari hita saluhutna. Na ingkon paradeonta, i ma: roha, pingkiran, tondi  dohot pamatangta na rade manangihon jala mangulahon parsuruon ni Tondi Parbadia.

Asa unang holan ulaon ni halak Kristen na parjolo i mangulahon ulaon na marpanindangion, na dohot do hita mangulahonsa. Tapataridahon ma i di ngolu na tongtong marsigantung tu Tuhan Jesus Kristus.

So holan marhite Jamita di mimbar boi lam tamba angka jolma na porsea. Lobi sian i, ingkon pataridahonta do di angka pamingkirion, panghataion nang parulaonta siganup ari hombar tu hata ni Tuhanta, asa lam tamba bilangan ni na porsea.

3.        Ayat 3 :           

“Hinorhon ni haporseaon do taantusi,

naung marhitehite pandok ni Debata dipaojak angka hasiangan, asa sian na so tarida manjadi na tarida i.”

 

(Karena iman kita mengerti, bahwa alam semesta telah dijadikan oleh firman Allah, sehingga apa yang kita lihat telah terjadi dari apa yang tidak dapat kita lihat)

Tangkas do pangondolan ni ayat on tu hita, asa tarida hapapatar huaso ni Tuhanta. Ai marhite Pandohan/Hata/Fiman/Logos saluhut ditompa Ibana. Jala molo tapaumbuk di pangantusion ni Hakristenonta, ai Jesus do Hata i, jala Jesus do Tuhan i.

Maol do masuk tu pingkiranta molo pinangke logika hajolmaon. Ai hira songon dia merasionalkan saluhutna i. Alani i, haporseaonta tu Ibana do mangalehon pangantusion tu hita.

Aha na nidok ni Tuhanta, manjadi do. Dohot do nang Tuhanta Jesus na tarsilang jala naung hundul di hasangaponNa di banua ginjang. Ai sangkap ni Tuhanta do i saluhutna asa manjadi.

Saluhutna na sinangkapan ni Tuhanta, marmula do sian HataNa/FirmanNya. Jala saluhutna angka PandohanNa na i marujung tu angka haulion, hadameon, haluaon dohot las ni roha.

Saluhut huaso, parbinotoan dohot ragam angka na masa di portibi on, sude di toru ni huasoNa do. So adong dalan di hita gabe mangantusi adong na gumogo sian Tuhan Jesus. Dipasahat do saluhutna huaso di portibi on dohot di banua ginjang di toru ni huaso ni Raja i, i ma Tuhan Jesus Kristus.

 

4.   Ayat 4 :

“Hinorhon ni haporseaon do dipelehon si Abel tu Debata pelean na dumenggan sian na binoan ni si Kain; marhite sian i do dihatindanghon Debata ibana partigor, ai dihatindanghon Debata do angka pelean na binoanna, jala marhite sian i marsoara dope ibana atik pe naung mate.”

 

(Karena iman Habel telah mempersembahkan kepada Allah korban yang lebih baik dari pada korban Kain. Dengan jalan itu ia memperoleh kesaksian kepadanya, bahwa ia benar, karena Allah berkenan akan persembahannya itu dan karena iman ia masih berbicara, sesudah ia mati.)

 

Sada parbue ni haporseaon, i ma marhite Pelean. Ingkon dibagasan roha na manghilala jala na mandok mauliate di huaso ni Tuhan i do jolma pasahathon peleanna. I do rupani pangantusion di angka huria, tangkas didok pelean na pinasahat, i do parbue ni haporseaon ni angka ruas ni huria.

Nunga dipatuduhon si Abel marhite peleanna na dumenggan sian hahana si Kain. Dijalo TUHAN i do peleanna ala di bagasan roha na mandok mauliate, jala dipasahat na dumenggan tu adopan ni TUHAN i.

Jala haporseaonna na marparbue i do na mambahen ibana tongtong diramoti TUHAN i, ndang holan di tingki na mangolu, dohot di tingki naung mate ibana. I do rupani, ndung dibunu hahana si Kain alani pangiburuon tu ibana, dilooas dope si Abel marsoara na pasahathon alualuna di pangalaho ni si Kain.

Naeng dohonon disi, haporseaon i naeng ma marparbue di parngoluanta siganup ari. Tangkas dipataridahon di roha na tongtong mandok mauliate tu Tuhan Jesus. Laos i do sada dalan di hita asa manghilala pangaramotion ni Tuhanta saleleng mangolu sahat tu na paimahon ari parpudi andorang so ro muse Tuhan Jesus na parpudi.

 

 

III.             PANUTUP

Nunga tubu Tuhan Jesus di haleaon ni portibi on. Di bagasan haserepon dohot roha na patutoru diri do Ibana ro. Dipatuduhon Ibana do asi dohot holong ni rohaNa laho manghophop hita jolma asa unang mate alani dosa na taulahon.

Alani i, marlas ni roha ma hita di ganup gulmit ni ngolunta. Tapangido tu Ibana asa tongtong mian Tondi Parbadia tu rohanta ganup. Laos Tondi Parbadia i do na pahothon jala papolinhon haporseaonta di ngolu na tongtong diparmudumudu jala diramoti Tuhan Jesus.

Dung polin jala tang haporseaonta, marparbue ma i di angka ulaonta na tongtong pasahathon pelean hamauliateon jala na tongtong marpanindangion di ngolunta. Asa i do na patamahon hita gabe sitean harajaon banua ginjang na pinarade ni Tuhanta Jesus na tongtong satia di haporseaonna tu Ibana. Amen.

Syalom..!!

Selamat ari Natal ma tu hita saluhutna..!!

Tuhan Jesus Mamasumasu..!!

 

Pdt. Ferdinand Fernando Silaen.