1 TESSALONIK 5 : 16 - 24



SERMON EVANGELIUM  MINGGU ADVENT III

Turpuk : 1 Tessalonik 5 : 16 – 24 

Topik     : Mangolu So Hasurahan Di Haroro Ni Tuhan I

                 (Hidup Tak Bercacat Pada Kedatangan Tuhan)

 

I.    Patujolo

Huria na mangolu huhut na marpanindangion do huria Tessalonik di partingkian ni angka huria na parjolo i. Pola do dihatindanghon gabe sitiruon di haporseaon huria Tessalonik di saluhut dongan na porsea, angka na di luat Makedonia dohot Akaya; tu saluhut luat tahe do tarbarita haporseaonna di Tuhan Jesus Kristus.

Molo dihatindanghon Apostel Paulus gabe sitiruon huria i tu saluhut na porsea, naeng patar tu angka na asing kualitas nasida na gabe sitiruon, mulai sian proses dohot hamubaon manadingkon ajiajian gabe marsomba mangoloi Jesus Kristus. Satia di bagasan haporseaonna atik pe manaon sitaonon alani haporseaonna i, gabe marsihohot di ngolu na imbaru di bagasan holong na sian Tuhan i, pajongjong parsaoran na imbaru nirahut ni holong ni roha, dohot parbue ni parange na imbaru di tonga ni parsaoran dohot ngolu siganup ari. Gabe punguan na porsea na marpanindangion tu na humaliang marhite parange na imbaru i.

Alai tung pe songon i, pintor ro do angka gambal-gambal (petualang-petualang) manggaori, gabe ndang leleng si Paulus disi. Terpaksa ma ditadinghon si Paulus huria na mansai poso i dope. Ala sai khawatir do ibana taringot tu huria i, disuru ma si Timoteus tusi, jala di na mulak muse si Timoteus sian i, diboan ma angka barita na adong persoalan na dokdok disi, ima pangantusion na sala taringot tu haroro ni Kristus na parpudi.

Ala didok si Paulus, tibu na ma ro Tuhan Jesus, pintor dipingkir nasida, sogot manang taon na ro nama. Aha ma na gabe panghorhonna? Gabe tubu ma dua pangalaho: na sada mandok, tu aha be karejo, ai na ro nama Jesus, marujung na ma saluhut. Alai na debanari mandok: binsan so ro dope Jesus i, “mari kita nikmati semua.” Gabe godang na madabu tu angka pangalaho na so gabeak. Ala pangalaho na sian pangantusion na sala, ro ma Apostel Paulus mangalehon sipaingot tu nasida marhite surat on. Naeng diarahon si Paulus muse pangantusion ni huria i di hatigoran na binoan ni si Paulus, lumobi ma pangantusion taringot haroro ni Kristus na parpudi. Tapaihutihut ma sipasingot na nilehon si Paulus marhite turpuk jamita sadari on.

 

II.     Hatorangan Ni Turpuk 

1.          Lam Dipasolhot Ma Diri Di Bagasan Ngolu Partondion (Ay. 16-18)

Maol do mangantusi sangkap ni Tuhanta di ragam ni na masa di ngolunta. Lumobi di na masa na taadopi nuaeng taringot tu Pandemi Covid-19. Naeng salpu nama taon 2020, alai ndang marnasalpu Pandemi Covid-19 sian portibi on, lam martamba do angka jolma na gabe korban ni sahit i. Hape somalna, lao masuk tu bulan parpudi (Desember) ganup taon, tarida do i di angka pangaradeon ni huria di na laho patupahon angka Natal di tongatonga ni huriaNa. Somalna, sude naung dibagasan las ni roha laho jumpang tu “Ari Pesta” i.

Hape, dia ma na boi idaonta nuaeng. Ndang na somal i na ro tu hita nuaeng. Ndang na somal i pangaradeonta nuaeng. Jala ndang na somal i muse angka “las ni roha” na ro tu hita nuaeng. Alai, boi do haporseaon ni angka siihuthon ni Kristus gabe mubauba alani na masa di tongatonga ni portibi on? Alusna: Daong!

Na masa di tongatonga ni portibi on, ndang na gabe mambahen hita lam mandao manang marpanghurangi di angka las ni roha, di hasosolhotta tu Tuhan Jesus. Lam dison ma boi idaonta, na ingkon Tondi Parbadia do na mangajari hita asa mangantusi na masa on, gabe lam tapasolhot dirinta tu Ibana. Songon na didok di ayat 16-18 di turpuk on:

a.         Tongtong Marlas Ni Roha!

Nang pe masa angka parungkilon di tongatonga ni huria Tessalonik, unang ma mambahen nasida gabe ndang marlas ni roha. Las ni roha na sintong, ingkon dapoton ni nasida di pangantusion na sintong di haroro ni Kristus tu portibi on jala parmuduonNa dope angka huria sahat tu ujung ni parngoluan di portibi on. Jala las ni roha i do patuduhon “karakter” ni halak Kristen na sintong manghangoluhon ngolu ni haporseaonna.

Songon i nang hita nuaeng. Ndang adong na boi mambahen gabe marpanghurangi las ni rohanta, tung pe so sidung parungkilon na ro marhite sorimago Covid-19 on. Lumobi di na marpesta Natal di tongatonga ni huria. Dison ma boi idaonta ngolu ni haporseaonta marhite panandaonta saleleng on tu Tuhan Jesus.

Tontu, molo saleleng on di masa angka Natal, molo “fokus” holan di angka “pesta” manang “seremonial,” gabe marpanghurangi do nian di las ni rohana. Ala las ni rohana hot dope di angka “las ni roha hadagingon.” Hape molo tapaihutihut pigapiga angka “drama Natal” sai dipaingot do tu hita, na tubu do Jesus di bara ni pinahan, ndang di angka pesta manang di angka “euforia” songon na dipatuduhon portibi saleleng on.

Marhite na masa on, lam marningot ma hita di haroroNa na parjolo gabe Sipalua, na paluahon hita di bagasan haserepon ni roha. Laos i do na pinangido tu hita. Lam tatanda Tuhan Jesus, lam mambahen ngolunta gabe martambatamba di angka las ni roha. Jala las ni rohanta naumbalga, ala tongtong dope ramotanNa parngoluanta dohot huriaNa sahat tu partingkian sadari on.

b.        Martangiang Ma Di Bagasan Roha Na Mandok Mauliate!

So pola maol alusanta molo adong na manungkun, “aha do lapatan ni tangiang?” Sian dakdanak Singkola Minggu sahat tu na matua, nunga mamboto aha do lapatan ni tangiang “secara teori”! Jala molo tapaihutihut, so adong dope na manghalupahon ngolu na martangiang songon siihuthon ni Kristus ibana. Jadi, boasa pola ondolhonon ni turpuk on muse tu hita asa “unang mansadi martangiang!” So pola dipaingot, nunga tontu martangiang hita ganup ari.

Sungkunsungkun: “Hea do hita, manang somal do hita martangiang holan na mandok mauliate, so pola dohononta sipangidoanta tu Tuhan i?” Sian sungkunsungkun i, naeng sulingkitonta “hata” na tadok di angka tangiangta. Na holan mangido manang naung gumodang mandok mauliate di angka tangiangta i.

On do na ingkon tapatigor di panandaonta tu Tuhanta Jesus. Jala masa do i di halak Kristen na “kecewa” ala hira so dialusi tangiangna. “Ngolu sipartangiang” do na naeng arahonon ni turpuk on tu hita, ndang na holan “ngolu na mangido marhite tangiang.” I do na patuduhon ngolu na marpos ni roha di ngoluna tu Tuhan Jesus.

Molo nunga songon i panghangoluhon ni halak Kristen, tontu dame jala marbinar do pardompahonna mangadopi angka na masa di ngoluna. Ngolu na pasahathon diri jala ngolu na dirajai Tondi Parbadia do ngolu ni angka Sipartangiang. On do na ingkon tahangoluhon jala i do na paimbaruhon ngolu ni partondionta saleleng mangolu dope hita di portibi on.


2.   Tangi Di Pangajarion Sian Tondi Parbadia (Ay. 19-22)

Ingkon tahaporseai jala tahatindanghon do: “Na mangula do Tondi Parbadia di ngolu ni halak na porsea.” Panghaporseaon jala panghatindanghonon i do na gabe gogo di hita di na mandalani parngoluan on. Ndang tolap jolma mangulahon saluhutna molo so ada Tondi Parbadia na mangajari ibana. Laos marhite pangajarion ni Tondi i do na mambahen hita boi mangantusi aha do ulaon na hinalomohon ni Tuhanta Jesus. 

Asa lomo roha ni Tuhan i di angka pangulaonta siganup ari, taloas ma Tondi i mangajari jala tangi hita di soaraNa na torus pauliulihon ngolunta. Tung pe masa ragam ni angka pangunjunan sian portibi on, alai dijaga jala diramoti Tondi do ngolu ni angka na porsea. Ndang diloas pangunjunan i pamagohon hita molo tongtong ihuthononta soara ni Tondi  Parbadia.

 

3.   Haposan Do Tuhan Jesus Di BagabagaNa Taringot Di HaroroNa Na Parpudi (Ay. 23-24)           

On ma panghirimon na ingkon mangolu di halak siihuthon ni Kristus. Panghirimon tu Tuhan Jesus na gabe Panguhum na Tigor, na maniranghon angka jolma na mangulahon lomo ni rohaNa dohot na so mangulahon lomo ni rohaNa. Panghirimon tu haroro ni Tuhan Jesus na parpudi on do na gabe gogo di hita mangalo nasa ihotihot ni portibi.

Nunga ro Tuhan Jesus pabadiahon ngolunta marhite mudarNa na durus di Golgata. Jala marbagabaga Ibana naeng ro muse tu portibi on. On do na ingkon ingotonta, haroro ni Tuhan Jesus na parpudi ndang na naeng paluahon hita sian dosa be, alai ro Ibana gabe maniranghon angka na manghangoluhon Ibana dohot na so manghangoluhon Ibana. Pos rohanta di bagabagaNa i jala tapangido asa tongtong pargogoanNa hita mandalani ngolu on.

 


III. Sipahusorhusoron

Di Minggu Advent na patoluhon on hombar tu Poda ni Gareja Lutheran, diondolhon do tu hita asa tongtong mangolu di bagasan las ni roha ala naung tubu Sipalua i tu portibi on. Jala didok do di angka Gareja na parjolo, on ma na digoari Minggu Gaudete, na mangarahon asa tongtong marlas ni roha hita di naung tubu ni Tuhan Jesus tu portibi on laho manesa saluhut dosa ni angka jolma di portibi on tung pe taadopi dope ragam ni angka parungkilon.

Sian pangantusion i, boi do boanonta di “hajolmaonta” na tongtong manghirim angka las ni roha saleleng mangolu hita. Jala olo ala “pangidoan” di angka las ni roha i, gabe lam mandao ngoluna sian ngolu ni halak na satia di Hata ni Tuhan i. Alani i, tongtong ma hita hot di pangajarion na sian Tuhantanta Jesus, lumobi molo mangadopi angka parungkilon dohot hasusahan ni ngolu.

I do na didok Topik ni Minggunta tu hita asa tongtong “Mangolu So Hasurahan Di Haroro Ni Tuhan I.” Mangolu so hasurahan naeng mangarahon hita asa tongtong manghangoluhon “karakter” ni Kristus saleleng mangolu hita. Tung godang pe angka na masa na ingkon adopanta, tongtong ma mian Tuhan Jesus di ngolunta jala mian ma hita di Tuhan Jesus.                 

Syalom..!!

Selamat ari Minggu di hita saluhutna..!!

Tuhan Jesus Mamasumasu..!!


Pdt. Ferdinand Fernando Silaen.

Komentar

Posting Komentar

Postingan populer dari blog ini

MAZMUR 85:9-14

Gambar
TULISAN KHOTBAH MINGGU ADVENT  II Minggu, 06 Desember 2020 Evangelium :  Mazmur 85 : 9 – 14 Topik            :  Keselamatan Dari Tuhan Sudah Dekat                          (Nunga Jonok Haluaon I) Saudara-saudari yang terkasih di dalam Tuhan Yesus Kristus..!! I.     PENDAHULUAN Pada umumnya, setiap orang yang mengalami kegelisahan hidup oleh karena pergumulan, penyakit yang diderita, kesulitan perekonomian dan berbagai permasalahan yang membuat hidupnya sangat terbeban, pasti akan mencari solusi agar kegelisahan itu secepatnya berlalu. Berbagai cara akan dilakukan agar seseorang itu mendapatkan ketenangan. Tentu tidak satu atau dua kali saja seseorang mengalami kegelisahan di dalam hidupnya. Dan hal yang sudah pasti juga, dia sudah tahu kepada siapa dia akan “bercerita” dan mencari solusi. Bisa kepada kerabat, saudara, keluarga atau kepada orang lain yang dapat dipercaya. Secara khusus kepada orang-orang yang percaya, dia pasti sudah tahu kepada siapa pertama kali
Baca selengkapnya

KEHIDUPAN DI DALAM JANJI TUHAN (KEJADIAN 9:8-17)

Gambar
  TULISAN KHOTBAH MINGGU INVOCAVIT “Bila Ia Berseru Kepada-Ku, Aku Akan Menjawab” ( Mazmur 91 : 15a ) Minggu, 21 Februari 2021 Evangelium     :  KEJADIAN 9 : 8 – 17 Topik Minggu :  Janji Dan Kuasa Allah   Saudara-saudari yang terkasih di dalam Tuhan Yesus Kristus..!!   I.               PENDAHULUAN Teks di dalam perikop ini berasal dari sumber P ( Priest , kaum Imamat). Secara keseluruhan di dalam sumber P dan secara khusus di dalam teks ini dituturkan tentang sejarah keselamatan Israel. Dalam peristiwa mengenai air bah, secara terperinci penulis dari sumber P memaparkan bagaimana detail dari peristiwa, tokoh dan beberapa objek di dalam sebuah kesimpulan tentang “Kuasa TUHAN atas bumi dan semesta.” Secara penulisan, cerita mengenai air bah tetap mengarah kepada suatu Subjek yang tidak dapat diganggu gugat, yaitu TUHAN yang transenden (agung, berkuasa). Ketika “pusat” dari pemberitaan itu telah didapatkan, maka secara tidak langsung tulisan ini juga menyiratkan bagaim
Baca selengkapnya

YOHANES 3:14-21 / JOHANNES 3:14-21

Gambar
PANURATAN NI JAMITA PESTA NATAL II Sabtu, 26 Desember 2020 Evangelium : Johannes 3 : 14 - 21 Topik              : Holong Ni Debata Na Paluahon                           (Kasih Allah Yang Menyelamatkan) Angka dongan na hinaholongan di bagasan Tuhan Jesus Kristus..!! I.          PATUJOLO Buku Evangelium Johannes disurathon sahalak Sintua na sian huria Epesus na margoar Johannes. Disurathon evangelium on hira di taon 100 M. Molo jinaha sude buku Evangelium Johannes, dipatandahon do nasida “hira” na jonok tu masa ni Tuhan Jesus di tingki manghobasi gabe Jolma di portibi on. Hape sasintongna, na tarboan do ibana di “ pokok-pokok fikiran ” ni si Johannes, sisean ni Tuhan Jesus. Sada situasi na masa na diadopi halak Kristen di tingki panuratan ni Evangelium Johannes, i ma paraloan sian horong Gnostik (Gorik). Alani i, “ pola bahasa ” na sinurathon ni buku Johannes on mamangke hata filosofis songon na masa hatiha i, di na laho mangalo tantangan na ro sian horong Gnostik
Baca selengkapnya