NA RO MA ARI NI TUHAN I (SERMON MALEAKHI 3:19-24)

SERMON JAMITA MINGGU

DI MINGGU XXII DUNG TRINITATIS

HKBP RESSORT PALEMBANG

Di Ari Senin, 07 November 2022

 

Turpuk : Maleaki 3 : 19 – 24 (Alkitab TB: Maleakhi 4 : 1 - 6)

Topik : “Na Ro Ma Ari Ni Tuhan I” (Hari Tuhan Akan Tiba)

 

I.      PATUJOLO

Minggu on, i ma Minggu na parpudi andorang so bongot hita tu Minggu Ujung Taon Parhuriaon, di na marningot angka dongan, keluarga nang sisolhot naung jumolo (monding) sian hita. Laos dipahot do hita marhite turpuk Maleaki 3:19-24, asa paradehon diri di na mangujungi sada taon parhuriaon on. Tung mansai uli do turpuk on paradehon dirinta mamongoti Minggu na mangihut. Disungguli do tu hita taringot tu parngoluanta nuaeng jala na ingkon sihirimonta di ari na mangihut. Diloas jala dilehon dope partingkian tu hita manguduti nasa ulaonta. So holan i, naeng ma ndang moru panghirimonta di ari ni Kristus na parpudi, so holan dihaliangi angka hasusaan na mambahen moru sihol ni rohanta di haroro ni Kristus i. Umbahen i, rimangonta na naeng pinasahat ni turpuk on. Anggiat ma bahan Sermon on manambai angka pangantusion tu turpuk sijamitaon di ari Minggu XXI Dung Trinitatis di taon 2022 on.

 

II.    BUKU MALEAKI

Maleaki lapatanna “na sinuru ni Debata.” Buku Maleaki tangkas sinurathon ndung haruar bangso Israel sian habuangan Babel laho manaringoti angka parsombaon nasida (ibadah) tu TUHAN jala maminsang angka hasalaan ni nasida di ruhut ni parsombaon tu Debata (mamelehon pelean, angka malim na so mangaradoti patik, 1:6-7, 2:9).

 

III.  HATORANGAN  NI  TURPUK

1.     Na Ro Ma Ari I (Bibel: Bindu 3:19, Alkitab TB: Pasal 4:1)

Ari na ginombarhon ni Maleaki i ma ari parpudi, di tingki ro panguhumion sian Debata tu angka jolma (halak Jahudi hatiha i) siula hajahaton. Sian pandohan i, na tinuju ni panurat: Asa ditopoti bangso ni Debata angka ulaonna naung godang maralo tu patik jala naeng ma dipauba dirina. Nunga jumolo dihilala nasida naung tarbuang tu Babel alani angka pangalaho nasida. Nasa na mangaleai Debata marhite na maralo tu patikNa, sai uhumonNa songon pamurunan na manutung nasida, ndang adong tadinghonon di nasida nang urat, nang ranting. Malengse jala porsuk ma nihilala angka parjahat molo naung sahat di ari paruhuman i. So adong na boi malua sian i.

Ise do parjahat i? Adong dua horong na nidok di ayat on: Parjolo, i ma halak na jungkat (semua orang yang gegabah). Na Paduaon, i ma halak siulahon hajahaton (orang fasik).Tung pe marasing, alai patar do pangalaho nasida songon sahalak na so manghabiari Debata. Sian on boi dapotonta sada pangantusion, na boi do hape diula angka na maralo tu Debata ala hurang ni pangantusion tu hataNa. Umbahen i, diarahon ayat on asa unang madabu tu horong na dua i, naeng ma nian tangkas dihangoluhon hata ni Debata huhut manat di angka ulaon na naeng siulahonon.

Pandohan “na ro ma” (sesungguhnya hari itu datang), naeng patuduhon na sintong jala na ingkon masa na nidok ni Debata. Hamamasa na Parjolo: Panguhumion dohot haluaon di masa ni panurirangion ni si Nehemia dohot si Ezra. Hamamasa na Paduahon: Haroro dohot Haluaon na pinatupa ni Kristus na parjolo jala singkop di HaroroNa na parpudi. Tumangkas, ndang holan idaon adong paruhuman tu angka siula hajahaton, alai adong do haluaon na pinatupa Debata tu angka na satia tu Ibana.

 

2.     Binsar Mata Ni Ari Hatigoran Di Angka Na Mabiar Tu Debata (Bibel: Bindu 3:20, Alkitab TB: Pasal 4:2)

Dipangke panurat Maleaki do hata “mata ni ari” na gabe sisombaon ni halak Misir dohot Mesopotamia. Boasa? Naeng patuduhon so holan marhuaso Debata di halak Israel, alai tu sandok portibi on. Pandohan “mata ni ari” naeng patuduhon hadirion ni mata ni ari: na ingkon buni sian parnidaan jala patar sian parnidaan. Nunga adong tingki na une di na binsar mata ni ari, manondangi angka na holom di portibi. On ma gombaran ni Debata na ingkon patar patuduhon hamonangan maradophon hajahaton.

Adong sada pandohan “hira na janggal” i ma na nidokna “linggom ni habongNa” (sayapnya). Marasing do pangantusion na sinurathon di Bibel dohot di Alkitab. Molo di Bibel hira naeng diarahon do pangantusion on tu “habong ni Debata” (Imbuhan –Na yang memakai huruf besar). Di Alkitab, polin songon na digombarhon di hata asli. Tutu, naeng manggombarhon habong ni mata ni ari i do, ndang na habong ni Debata.

Boasa boi songon i? Ala naeng mangalo pangantusion di halak Persia do panurat Maleakhi. Molo di pangantusion halak Persia, lapatan ni “habong” i ma naeng patuduhon huaso, hahorason dohot halengseon. Dipatigor panurat Maleaki, na manggombarhon huaso ni Debata na balik sian pangantusion i: Dapotan hahisaron, haluaon, ngolu na manontong jala hadameon.

On ma na gabe jambar ni angka na hot di haporseaon dohot hata ni Debata. Molo tung pe ditaon nasida pangontak ni angka siula hajahaton, marpanatap do Debata di ngolu ni nasida. Di tingki “na ro ma ari i,” tangkas disiranghon horong ni jolma na mabiar tu Debata na dapotan haluaon dohot horong ni jolma na so mabiar tu Debata na dilengsehon jala dapotan panguhumion. Dipatudos do muse halak na mabiar tu Debata songon anak lombu na haruar jala panihalnihalon (berjingkrak-jingkrak), angka na ruar sian bara. Tudosan na manggombarhon haluaon na mangalehon las ni roha na mansai balga, ala malua sian haporsuhon na tinaon na sai laon.

 

3.     Hamonangan Ni Halak Partigor (Bibel: Bindu 3:21, Alkitab TB: Pasal 4:3)

Na tinuju ni ayat 21 on “manambai” jambar ni halak na mabiar tu Debata songon na nidok di ayat 20. So holan dapotan hahisaron dohot las ni roha na mansai balga, alai na dohot do diparmonang maradophon angka jolma siula hajahaton. Balik ma na masa i: Na diparhatoban ni pangontak ni siula hajahaton, gabe monang maradophon nasida. Hamonangan ni halak partigor maradophon halak na jungkat dohot siula hajahaton, i ma na gabe tanda eskatologis halak Heber: Na ingkon monang do halak na tigor maradophon halak parjahat di tingkina. Tu angka parjahat dipabagas muse sitaonon pangontak ni hajahaton nasida, i ma na dipatudos songon sirabun (jerami yang sudah dibakar) na dihabanghon alogo. On ma sibaheon ni Jahowa Zebaot di ari paruhuman i.

 

4.     Manghangoluhon Patik Dohot Hata Ni Debata (Bibel: Bindu 3:22, Alkitab TB: Pasal 4:4)

Bagas do pangalapation sian hata “paingotingot” (ingatlah) na mandok so holan marningot, alai dohot do na mangulahon, marpangunsandean jala manghangoluhon. Pandohan on na gabe ojahan dohot nilai na diida Debata di angka pangalaho ni jolma. Ayat on ma na gabe sorminan di pangalaho ni jolma: Dia do na hinalomohon ni Debata na ingkon ulahonon ni jolma. Patik na gabe pamuhai di na diain Debata bangso Israel gabe bangsoNa, jala dipasingkop ma i di bagasan hadirion ni Tuhan Jesus. Songon na nidok ni Tuhan Jesus di Mateus 5:17, “Unang ma dirimpu rohamuna Ahu ro mangarumpakhon patik i, manang hata ni angka panurirang pe. Ndang ro Ahu mangarumpakhon; na pajongjonghon do Ahu.”

 

5.     Dilehon Debata Partingkian Asa Muba Roha Ni Jolma (Bibel: Bindu 3:23, Alkitab TB: Pasal 4:5)

”SuruonHu ma tu hamu panurirang Elias,” naeng mandok: adong dope partingkian andorang so ro ari ni TUHAN i. Elia i ma sahalak panurirang na sinuru ni Debata manghatahon hataNa, songon patujolo ari ni Jahowa jala panurirang Elia i ma halak ni Debata na manaek tu banua ginjang (2 Raja 2:11). Pangantusion “halak na gabe patujolo ari ni TUHAN i,” dipangke panurat Lukas manggombarhon hadirion ni Johannes Pandidi (3:1, 4:5-6). Laos ari ni TUHAN i, tinujuhon ma tu haroro ni Kristus na parjolo dohot di ari parpudi haroro ni Tuhan Jesus. Idaon ma marhite haporseaon, na holong situtu do roha ni TUHAN i maradophon jolma, umbahen sai lehononNa do partingkian tu jolma asa marhamubaon, marhite Tuhan Jesus.

 

6.     Hadameon Dohot Haluaon (Bibel: Bindu 3:24, Alkitab TB: Pasal 4:6)

Ayat on manguduti hatorangan jala patangkashon na tinuju ni angka na sinuru ni Debata, i ma na mamboan hadameon dohot haluaon na sian Debata. Jumolo diparade halak na naeng pinalua andorang so jinalo haluaon i. Fakta Historis: Naeng patuduhon na masa hatiha i, i ma parbadaan ni ama tu angka anakna alani “perkawinan campur,” gabe mago ma “hapolinon” ni bangso i. Fakta Iman: Naeng patuduhon na masa, i ma Debata na tarrimas alani pangalaho ni jolma na pasidohot manomba debata ganaganaan (budaya Hellenisme pada saat itu). Hatiha i, tubu ma parbadaan sian sundut naumposo tu sundut na matua alani filsafat, politik dohot parugamoon sian Hellenisme.

Digombarhon do situasi keluarga di ayat on. Keluarga manang rumatangga i ma lembaga naumetmet na boi papatarhon hadameon. Jumolo ma dipature jala dipauli ruma tangga asa tung saor hadameon disi. Jala jumolo di tongatonga ni rumatangga manang keluarga na dapotan haluaon na sian Debata.

 

IV.  USUL POINTER JAMITA

1.     Na Ro Ma Ari Ni TUHAN I

Di Partingkian nuaeng, nunga lam moru be sihol ni roha ni jolma lumobi di halak Kristen di na paimaimahon haroro ni Kristus na parpudi. Tangkas do piga hali sinungkun tu halak na matua, “Molo monding ho amang/inang, tudia ma ho?” Mamintor hatop alusanna, “Ingkon tu Toba do boanon ahu.” Hira na gaet do nian pandohan i, alai disi ma tangkas idaon, nunga moru be halak na mandok, “Molo mate ahu, ingkon rap dohot Tuhan Jesus ma ahu, di surgo hasonangan i.”

Ndang apala binoto, boasa di partingkian nuaeng so apala ringkot be di (deba) jolma “hangoluan ndung hamatean ni daging.” Nunga godang jolma fokus tu haporsuhon na tinaonna. Umbahen i, mansai las do roha na umbege jamita molo tinaringotan “Pos roham, dipalua Debata dohot Tuhan Jesus Kristus ho sian sitaononmu molo dipasahat ho ngolum tu Ibana.” Apala holan di portibi on sihirimon (deba) jolma.

Turpuk on tangkas paingothon hita, asa ringkot marnida “pandang situjuon.” Na adong do hangoluan na pinarade ni Tuhanta Jesus Kristus tu angka na marsihohot tu Ibana. Pinarade ni Tuhan Jesus do inganan hasonangan songon tumpal hangoluan di angka na satia tu Ibana. Lohot ma nian di bagasan roha, “Na ro ma ari ni TUHAN i,” asa marparbue di ngolu marhite roha na mabiar maradophon Tuhan Jesus Kristus.

 

2.     Manghangoluhon Kristus Di Portibi On

Tutu do turpuk on diarahon tu angka na mangolu dope di portibi on. Umbahen i, naeng ma adong sada tiruan ni halak na niasianan ni Debata. Tangkas do songon na tinompa ni Debata angka jolma, naeng ma nian patar parangena songon Debata. Alai, tutu, na so boi do jolma rimpas patupahon i di bagasan ngoluna. Umbahen i do ro Tuhan Jesus patuduhon parange na hinalomohon ni Debata: So holan marpanatap tu Debata, alai ingkon masihaholongan dohot dongan jolma nang tu angka na tinompa.

Saluhut naung diajarhon Tuhan Jesus songon na sinurathon di Evangelium, gabe tiruan di angka na porsea di Debata. I do umbahen, didok ma hita songon angka siihuthon ni Kristus. Na mansai balga do identitas ni Hakristenon tarida sian Operasional (parange siganup ari), so holan sian Ornamental (ritus, simbol). Paingotingot ma Barita na Uli pangajarion ni Tuhan Jesus, lopokhon jala hangoluhon.

 

3.     Loas Hadameon Dohot Haluaon Saor Di Tongatonga Ni Rumatangga

Sada panghirimon na mansai balga do i. Alai, holan panghirimon sambing, molo mangihut sian angka usaha dohot pengorbanan. Songon sahalak partani na manghirim parbue na denggan sian na sinuanna, so boi holan martangiang ibana paima ro na hinirim ni rohana. Ingkon rade do ibana mangula, manambornambori, mangalehon pupuk dohot manjaga na nisinuanna, dung i pasahathonna ma tu Debata asa Ibana na mangelehon parbue na denggan. Songon i ma nian di tongatonga ni rumatangga, asa gabe dakdanak na hasea di adopanta dohot diadopan ni Debata angka dakdanak naung pinalumehon tu hita, tontu so holan manangianghon nasida, alai tinambaan partingkian di na laho family time, manungkun aha na nialaman nasida di na sadari i, huhut mangalehon poda na denggan siingoton ni nasida, lumobi mangajari hata ni Debata asa dihangoluhon. Jumolo ma nian saor Hata ni Debata ditongatonga ni rumatangga, asa sijalo parbue hadameon dohot haluaon hita ditongatonga rumatangga, siboanon tu humaliangta.

 

Syalom..!!

Tuhan Yesus Memberkati..!!

 

Pdt. Ferdinand Fernando Silaen