HATINDANGHON MA KRISTUS DI NGOLUM ( JOHANNES 3 : 31 - 36 )

SERMON EVANGELIUM MINGGU TRINITATIS

HKBP RESSORT KUTACANE

Di Ari Sabtu, 29 Mei 2021

Turpuk :   Johannes 3 : 31 – 36

Topik :      Disuru Debata Do AnakNa Jala Dipasaorhon Do TondiNa

                   ( Allah Mengutus PutraNya Dan Mengaruniakan RohNya )

 

I.      Patujolo

Ganup di parmingguanta di ari Minggu dohot di angka ari Parningotan na pinatupa ni hurianta HKBP tangkas do saluhutna na ro disi manghatindanghon haporseaonna, i ma di na rap hita mandok “Ahu porsea di Debata Jahowa, d.u,” “Ahu porsea di Jesus Kristus, d.u” dohot “Ahu porsea di Tondi Parbadia, d.u,”. Sada bagian Liturgi na so boi tarsirang di ganup Parmingguanta. I ma dogma ni hurianta HKBP.

Asa saluhut ruas ni huria tangkas mangantusi lapatan ni hata haporseaon i, dipatupa do parguruan “Manghatindanghon Haporseaon” manang naung somal didok “Parguru Malua.” Jala ndung sidung marsiajar di parguruan i, dihatindanghon ma haporseaonna i di adopan ni Debata dohot jolo ni huria, jala gabe tama mandohoti Sakramen Ulaon Na Badia. Songon i ma hinaringkot ni na “manghatindanghon haporseaon” di hurianta HKBP. Ndang holan pandohan na mandok “ahu porsea...” alai naeng ma jumolo adong pangantusion na mansai tangkas di haporseaon na hinatindanghonna i.

Fenomena na masa na huida hami, nunga lam godang angka ruas ni hurianta na so tangkas mangalapati hinaringkot na marsiajar taringot tu “dogma haporseaon” i. I do rupani lam godang angka ianangkhon ni hurianta na gabe “Parguru Malua Instan” ala naeng marhasohotan, holan sahali manang dua hali marsiajar, diapil hata haporseaon, ndung i dihatindanghon di Parmingguan. Hape ndang na “Blanko Manghatindanghon Haporseaon” i na gabe situjuon asa diloas marhasohotan, alai pangantusion na tangkas laho manghatindanghon haporseaonna tu Debata Sitolu Sada i do asa lam polin haporseaonna songon siihuthon ni Kristus, lumobi di na laho mamungka pardongansaripeon.  

Turpuk on tangkas paboahon tu hita hinaringkot ni panindangion haporseaon di Tuhanta i. Songon panindangion ni Johannes Pandidi taringot tu Jesus Kristus na ro sian banua ginjang di turpuk on. Jumolo do didok si Johannes, “Ndada ahu Kristus i; na sinuru do ahu patujoloNa” (ay.28), ndung i diuduti ibana ma patoranghon taringot hadirion ni Jesus Kristus. Ndang na gabe dipatuduhon ibana dirina tumimbo sian Jesus Kristus, alai didok ibana do “Ianggo Ibana patut lam ganda, lam moru ma anggo ahu.” Ndang olo ibana dijou Mesias ala ulaon pandidion naung niulahonna hatiha i. Alai, naeng pabotohonna do, ianggo Kristus nunga ro laho “mandidi” angka jolma na porsea tu Ibana asa tama gabe panean di Harajaon banua ginjang i

Panindangion ni si Johannes on do na gabe sada parsiajaran na mansai arga di hita marhite jamita di Minggu Trinitatis on asa lam marsitutu hita manghaporseai Tuhanta Jesus Kristus na sian Ama i jala naung marsaor di halak na porsea marhite Tondi Parbadia.

II.   Hatorangan Ni Turpuk

Songon tujuan sian panurat ni Buku Johannes i ma “asa porsea hamu, Jesus do Kristus, Anak ni Debata; jala asa hamu angka na porsea i dapotan hangoluan marhitehite GoarNa.” (Joh. 20:30-31). Dipaandar evangelium Johannes do paboa Jesus Kristus i ma “Hata i” (Gorik: “Logos,” Indonesia: “Firman”) di bagasan konteks: “kosmis na universal” (KBBI: “kosmis” yaitu berhubungan dengan semua yang ada mengenai jagat raya). Tuhan Jesus, i ma hapataran ni Debata (Inkarnasi Allah). Pangantusion i do na mangarahon panjaha evangelium Johannes, tung pe sian bangso Jahudi ianggo Jesus, alai tu saluhut jolma na di portibi on do ianggo haroroNa gabe Sipalua.

Secara konteks panuratanna, adong pigapiga ciri khas ni evangelium Johannes, i ma:

a.   Disurathon do evangelium Johanes on mamangke hata dohot “grammar” Gorik (hata Gorik hatiha i gabe bahasa na paduahon/bahasa Internasional).

b.     Budaya dohot tradisi na digombarhon evangelium Johanes manggombarhon Jahudi Rabinik na patuduhon Jesus Kristus sahalak Jahudi.

c.        Benang Merah: Jesus Kristus i ma TUHAN na mangarumari diriNa gabe sahalak jolma (halak Jahudi) na so holan gabe Sipalua tu halak Jahudi (na tongon di toru huaso ni Rom), alai ro do Ibana gabe Sipalua tu saluhut angka jolma manisia di portibi on naung dirante huaso ni dosa.

Alani i, tapaihutihut ma hatorangan ni turpuk naung huparade hami:

1.          Jesus Kristus I Ma TUHAN Na Ro Sian Ginjang (Ayat 31)

Masa do hatiha i “filsafat Plato” na boi mangunjuni haporseaon ni halak Kristen. Konteks filsafat na borhat sian “dunia ide” mamboan tu sungkunsungkun taringot tu hadirion ni Jesus Kristus: “Ise do Jesus Kristus i?” “Molo tutu do Tuhan ianggo Jesus i, pola ingkon mate tarsilang Ibana di hau pinarsilang i?” Hira songon i ma sungkunsungkun na rarat jala na boi mambahen ganggu haporseaon ni halak Kristen hatiha i. Boasa adong pangantusion jala sungkunsungkun na sisongon i? Ala nunga leleng jolma ndang boi pajumpang bohi dohot Debata. Gabe ndang porsea jolma boi pajumpang bohi dohot TUHAN i jala ndang porsea jolma boi tarsilang TUHAN i.

 

Boasa gabe maol jolma porsea? Ndung madabu jolma tu bagasan dosa (1 Musa 3:1-7), dipaharuar ma jolma sian porlak Eden (1 Musa 3:22-24), i ma inganan parsaoran ni Debata tu jolma na tinompaNa. Nunga mago be habadiaon ni jolma alani dosa na binahenna. Ndung mago habadiaon ni jolma, marusaha do jolma pabadiahon dirina asa boi pajumpang muse dohot Debata jala asa disesa saluhut angka dosana: dipatupa pelean situtungon, dipatupa bagas joro, dohot angka usaha ni jolma na asing.

 

Ndung dibahen jolma na sisongon i, naung tama do jolma pajumpang dohot TUHAN i? Daong! Tung so boi dope jolma pajumpang bohi dohot TUHAN i. I do umbahen molo tajaha di Padan na Robi, isarana si Musa na so boi marnida Jahowa tung pe binege soaraNa. Dung i, berinisiatif ma TUHAN i papatarhon diriNa tu jolma asa boi pajumpang bohi. Ro Ibana tu portibi on mangarumanghon jolma dibagasan Jesus Kristus. Asa ndang adong be pangambati di jolma laho pajumpang dohot TUHAN i jala asa tama jolma tu inganan naung pinarade ni TUHAN i di banua ginjang. I do umbahen ro TUHAN i di bagasan Jesus Kristus.

 

2.          Dihatindanghon Tuhan Jesus Do HarajaonNa Di Banua Ginjang (Ayat 32-34)

Ala na ro sian banua ginjang do Tuhan Jesus, i do umbahen sai dihatahon Ibana taringot harajaon banua ginjang. Boasa ndang tarjalo pingkiran ni jolma? Ala ndang ro jolma manisia sian banua ginjang, alai diarahon dope angka jolma asa sahat tu harajaon banua ginjang naung pinarade Tuhan Jesus.

Songon dia asa tarjalo ni jolma paboa Kristus i do TUHAN naung ro sian banua ginjang? Ala pangantusion na sian banua ginjang, ingkon Tondi Parbadia na sian banua ginjang do na boi mangajari jolma. Ndang tuk pingkiran ni jolma na pinangke laho mangantusi hadirion ni Kristus.

Tutu partingkian nuaeng on, ndang boi be idaonta Jesus Kristus secara fisik, alai dipasaorhon do Tondi Parbadia di ngolu ni jolma na porsea, asa ajaronNa portibi on taringot tu hata ni TUHAN i (Joh.16:8). Hapataran pangulaon ni Tondi Parbadia di portibi on nuaeng, tangkas idaonta sian huria na jongjong jala lam rarat di partingkian nuaeng on. Sai ditogihon do angka jolma parsidohot di na laho pararathon barita taringot tu Jesus Kristus, asa saluhutna jolma dapotan hangoluan na sian Tuhanta i. 

Alani i, naeng ma lam dilehon jolma dirina manghaporseai hadirion dohot hata ni Tuhan Jesus, i ma hata ni Debata. Paloas ma Tondi Parbadia mangula di roha ni jolma dohot di saluhutna panghobasion di tongatonga ni huria. Jala taarahon ma saluhut ngolunta tu banua ginjang (fikiran sorgawi).

 

3.          Dapotan Hangoluan Sisalelenglelengna Do Na Manghaporseai Tuhan Jesus (Ayat 35-36)

“Na holong do roha ni Ama i di Anak i, naung dilehon do saluhut tu tanganNa.” Hata “Ama” dohot hata “Anak” ndang na naeng manggombarhon songon “ama” dohot “anak” hombar tu pangantusion ni portibi. Ndang na mamboan hita di pangantusion “geneologi ni jolma.” Hata “Ama” laho patuduhon “Huaso” dohot “Hadirion” ni Debata di ginjang ni saluhut nasa na adong di portibi on. Jala hata “Anak” laho mamboan jolma mangantusi Debata songon Ama jala nasa na mian dibagasan Tuhan Jesus na ginoaranNa “Anak,” targoar ma ibana Anak ni Debata. Nasa na porsea dibagasan Tuhan Jesus, ndang be “hatoban” ibana, alai nunga gabe anak, laos gabe panean di harajaon banua ginjang i.

 

Holong do roha ni Ama i di Adam (Jolma) naimbaru, i ma Tuhan Jesus, TUHAN na ro dibagasan daging. Jolma na mian dibagasan Tuhan Jesus, dilehon do Tondi Hangoluan marhite Tondi Parbadia asa dapotan hangoluan naimbaru jala gabe badia di adopan ni Debata. Gabe dapotan hangoluan sisalenglelengna ma jolma i, angka na porsea di bagasan Tuhan Jesus Kristus. Baliksa, nasa jolma na so porsea di Jesus Kristus, ndang tama jaloonna hangoluan saleleng ni lelengna, alai rimas ni Debata ma di ibana.

 

III.     Usul Pointer Jamita

 

1.        Unang Adong Be Na Ganggu Haporseaonna Tu Debata Sitolu Sada I

Di Minggu Trinitatis on, jumolo ma ingkon tangkas pangantusionta di Debata Ama, Anak dohot Tondi Parbadia. Ama: Sitompa langit dohot tano on dohot nasa isina, ro dibagasan daging marhite Jesus Kristus, Tuhanta na paluahon jolma na porsea sian hamatean alani dosa, na paradehon inganan naimbaru (Paradeso) tu angka na porsea di Ibana, jala Tondi Parbadia na mangajari angka jolma asa lam bagas panandaion di haporseaon jala pungu dibagasan parsaoran na badia marhite huriaNa.

 

2.        Tahantindanghon Haporseaonta Di Bagasan Teknologi Virtual

Lam marragam do cara berfikir ni jolma di partingkian nuaeng on. Lumobi di cara berfikir instan dohot teknologi naung rarat nuaeng. Idaonta ma nuaeng teknologi virtual. Boi do i gabe sada alternatif di partingkian di masa pandemi Covid-19 on jala tu partingkian na naeng ro laho tongtong maniop haporseaonta. Ndang na patibuhu hita manghatahon taringot tu teknologi virtual, alai boha do hita mamangke cara berfikir sian banua ginjang laho mamangke teknologi virtual nuaeng.

 

Tutu hira na maol dope sijamitahon di partingkian nuaeng on taringot tusi, alai secara umum huria ingkon mangarade diri asa rade bongot tu dunia virtual na so pola leleng nari gabe hasomalan di hita. Boha do pangaradaeonta taringot tusi?

a.    Tangkas ma taantusi ia teknologi virtual, boi gabe sada dalan laho pararathon barita na uli di portibi on. Tondi Parbadia do na mangajari angka jolma asa mamangke teknologi virtual laho mamaritahon barita haluaon di bagasan Tuhan Jesus Kristus.

b.      Unang gabe mar-tuhan-hon teknologi virtual.

 

3.        Jadikan Iman Yang Selalu Menuntun Bukan Menonton

Godang do angka natuatua na marsarito tingki haetehon ni nasida na jolo. Didok do angka natuatua na jolo dipasomal rap marsipanganon di jabu. Ndung sae marsipanganon, disungkun natoras do songon dia kegiatan ni ianangkhonna di singkola jala dilehon natoras ma poda tu ianangkhonna. Sada hasomalan na mansai uli do na jolo jala lam uli molo idaonta dope masa na sisongon i di partingkian nuaeng on.

 

Secara nyata nunga lam mago be tradisi na sisongon i, gabe hira holan na paidaida (menonton) do natoras di pangalaho ni angka ianangkhonna. Nunga lam moru be angka natoras na rap mangan, rap hundul jala na mangalehon poda tu angka ianangkhonna. Nunga lam moru tingki ni angka natoras laho mangarahon angka ianangkhonna.

 

Uli do molo tradisi na mamodai sian natoras tu ianangkhonna gabe dalanta patuduhon parbue ni haporseaonta jala panindangion ni haporseaonta tu angka ianangkhonta. Unang gabe dipasombu angka ianangkhon laho manuntun lomona. Haporseaonta di Tuhanta i naeng ma gabe manogihon (menuntun) angka sundut naumposo tu dalan na sintong, lumobi tu dalan na hinalomohon ni Tuhanta i. Amen.

Syalom..!!

Selamat mangarade ma di hita saluhutna..!!

Tuhan Jesus mamasumasu..!!

 

Pdt. Ferdinand Fernando Silaen