HALELUYA !! ( PSALMEN 150 : 1 - 6 )

SERMON EVANGELIUM

MINGGU KANTATE

Minggu, 02 Mei 2021

Turpuk : Psalmen 150 : 1 – 6   

 "HALELUYA !!"

I.              Patujolo

“Dia do bonsirna saluhut jolma ingkon mamuji TUHAN i?” Sada sungkunsungkun na relevan di partingkianta nuaeng. Lumobi di na mangadopi sorimago Covid-19 na manghorhon tu “hamaolon ni perekenomian” dohot “keterbatasan mobilitas” ni jolma. Jala di deba huria pe nuaeng “marende” mamuji TUHAN di bagas joro, ingkon mamangke masker.

 

Turpuk Evangelium di Minggu Kantate on gabe alus ma di tongatonga ni na masa nuaeng. Umbuk do goar ni Minggu Kantate tu Topik Minggunta asa “Sude Na Marhosa Ingkon Mangendehon Ende Na Imbaru tu TUHAN i.” Alus sian na masa marhite Evangelium na sinoarahon ni turpuk on margogoihon hita asa tongtong mambahen ngolunta on gabe ende pamujian di TUHAN tung pe ragam na ingkon adopan ni angka jolma.

II.           Buku Psalmen

Judul Psalmen di Hata Heber i ma “Tehillim” na marlapatan pujipujian. Jala di Bibel Septuaginta (Padan na Robi na di bagasan hata Gorik, na dipauli di taon 200 sM) judul ni Psalmen on didok ma “Psalmoi” na marlapatan ende na diiringi alat musik gesek dohot petik. Songon di bindu 150 on, “musik” i ma sada na ringkot di angka ende pujipujian tu TUHAN ni Israel (YHWH).

 

150 bindu na adong di Buku Psalmen on patuduhon gombaran ngolu ni bangsoNa na marsigantung tu TUHAN. Alani i, ndang holan pujipujian marumang ende na tarsurat di Psalmen on, alai dohot do marumanghon tangiang. Gombaran na adong di 150 bindu di buku Psalmen on, i ma:

 

1.      Tangiang tu adopan ni TUHAN (Heber: YHWH) na paandarhon:

a.  Haporseaon, holong, parsombaon, hamauliateon, pujipujian dohot sihol ni roha di parpunguan na badia.

b. Ganggu ni roha, hamaolon, haporsuhon, biar ni roha jala panghirimon laho dipatigor, dipalua dohot dipamalum.

2.      Na asing nari disurathon songon ende na marisihon pujipujian, hamauliateon dohot parsombaon tu TUHAN i songon Raja na pamonanghon bangsoNa.

3.      Deba sian bindu na adong di buku Psalmen marisihon bagabaga di haroro ni Sipalua.

 

Sian sude bindu na adong di Buku Psalmen dapot ma sada gombaran: na ingkon mangihuthon “proses” do saluhut na naeng pasahathon pujipujian tu adopan ni TUHAN na marhuaso di ginjang ni saluhutna. Di proses i do tangkas pinatuduhon ragam ni dalan na binahenNa laho marmudumudu bangsoNa.

 

 

III.        Hatorangan Ni Turpuk Psalmen 150 : 1 - 6

Psalmen bindu 150 on gabe panimpuli sian sude buku Psalmen. Bindu 150 on do na gabe pangajarion na mansai tangkas di ngolu ni bangsoNa. Ndang pujipujian na satongasatonga manang na holan rutinitas manang formalitas sambing. Alai, pujipujian na nionjar panandaion na tangkas di pangaramotion ni Raja na marhuaso di ginjang ni saluhutna naung tatanda di bagasan Goar ni Tuhan Jesus Kristus.

Ala panimpuli sian sude Buku Psalmen taida do di pamuhai nang di pangujungi ni bindu on disurathon do hata “Halleluya.” Halleluya borhat do sian hata Heber (halleluyah) na marlapatan “Puji ma TUHAN!” Sian mulana sahat ro di ujungna Pujipujian do na tama dipasahat saluhut angka na marhosa tu TUHAN i.  Alani i, tapaihutihut ma na naeng dipaandar sian buku Psalmen 150:1-6 on:

1.      Tudia Do Pamujian I Diarahon ? (Ayat 1)

Di ayat on dibuhai sian hata “Halleluya,” na naeng mangarahon pujipujian i tu TUHAN na marhuaso. Panandaion ni bangso Israel tu “YHWH” (dijaha: Adonai) nienet sian pardalanan ni bangso i sian na maisolat sahat tu bangso naung maringanan di Israel. Ala pangaramotionNa do umbahen dihaporseai nasida na holong do TUHAN i di ngolu nasida sian angka ompunasida sahat tu angka pomparanna.

Ala habadiaon ni TUHAN i di ngolu nasida, digombarhon panurat ni buku Psalmen on do didia maringanan TUHAN na Badia i, i ma na nidokna maringanan do Ibana:

-          Di “HabadiaonNa” (Tempat kudusNya). Ndang tuk pingkiran ni nasida manggombarhon inganan ni TUHAN na sinomba ni nasida. I do umbahen didok nasida hata “HabadiaonNa” na marlapatan inganan na badia na so tardungdung pingkiran ni jolma.

-          Di “Hajanghajang ni HagogoonNa” (Cakrawala yang kuat). Na naeng mangarahon pangantusion ni jolma tu sada inganan di banua ginjang, na gabe inganan ni TUHAN i patuduhon huasoNa tu angka na tinompa.

I do sialana dipauli nasida do inganan parsombaon na ginoaran di hata Heber “Beit Adonai” manang Kenisah (Rumah TUHAN atau Bait Suci). Dipauli nasida do inganan on di Jerusalem (secara letak geografis berada di dataran tinggi) laho patuduhon inganan ni TUHAN i di ginjang ni saluhutna na adong. Dison ma diarahon pujipujian i: di habadiaonNa, di hajanghajang ni hagogoonNa jala di ginjang ni saluhutna na marhuaso di portibi on.

2.      Dia Do Bonsirna Dipasahat Pujian I? (Ayat 2)

Alani hagogoon na sumurung dohot ala hinagodang ni hatimbulon ni TUHAN i do umbahen dipasahat bangso i pamujionNa. Tudos do songon “Panglima Porang” TUHAN na sinomba ni bangso Israel. Borhat do i sian pardalanan ni ngolu ni bangso i na maisolat sahat tu na tolhas nasida tu inganan laho manguduti parngoluon nasida. Jala digombarhon bangso i do ngolu nasida songon na marporang jala sai diparmonang TUHAN i do nasida.

3.      Aha Do Na Pinangke Laho Pasahathon Pujian I? (Ayat 3-5)

Dibahen do di ayat 3-5 alus ni sungkunsungkun i, i ma marhite: Sarune (Sangkakala), Arbap (Gambus), Sordam (Kecapi), Tali Sayak (Rebana), Panortoron na Marliat (Tari-tarian), Hasapi (Kecapi), Tulila (Seruling), Ogung Panggora (Ceracap yang Berdenting) dohot Ogung Panonggahi (Ceracap yang Berdentang). Sia (9) gombaran parhitean di na laho mamuji TUHAN di pangantusion ni bangso i.

Adong do pigapiga pamingkirion di na laho mangantusi ayat on:

a.       Sia (9) na gabe gombaran i do na patuduhon “kualitas” di na laho mamuji TUHAN. Sude “alat musik” nang ragam cara na binahen di ayat 3-5 di na laho mamuji TUHAN: ringkot do pangaradeon na marsitutu. Ndang na mura mamparsiajari saluhutna i. Alani i do, molo di zaman kuno, sia (9) gombaran na binahen di ayat on, holan dipatuduhon tu angka raja. Isarana: Si David na malo mamangke hasapi, dijou Raja Saul do nasida laho mambahen las roha ni raja i.

b.      Sia (9) na gabe gombaran i do na “mewakili” saluhut “harmoni kehidupan.” Tontu sahali asa marsoara saluhut alat musik na adong di ayat on, ragam do cara na pinatupa (dipukul, dipetik, ditiup, dna). Jala alat musik i dibahen do sian “kulit binatang” dohot “tumbuh-tumbuhan.” Lapatanna: Patuduhon “harmoni kehidupan,” na so boi do holan alani jolma asa tupa pamujian i, na parsidohot do angka na tinompa na asing (binatang dohot tumbuh-tumbuhan).  

4.      Ise Do Na Mamuji TUHAN I? (Ayat 6)

Tangkas didok di ayat on, “Sude na marhosa!” Saleleng marhosa dope angka na tinompa i, laos disi do ngoluna dipatuduhon marhite ngolu na mamuji TUHAN. Ngolu na mamuji TUHAN, i ma ngolu naung manghilala jala ngolu na mandok mauliate di pangaramotian ni TUHAN na marhuaso i.

 

IV.         Pointer Jamita

“Tangkas ma jumolo panandaionta di pangaramotion Tuhan Jesus di ngolunta asa tau hita pasangaphon Ibana di bagasan pamujionta.”

a.      Di huria:

“Langsung ma hatahatana, ndang pola mar-not hita! Ai ende na somal do on!” Ndang sahali manang dua hali be begeonta pandohan on di na mandohoti angka na marguru ende. Jala adong do deba, na so pola ringgas mandohoti parguruan, hape di ari Minggu dohot do jongjong laho mar-koor. Adong na sepele, adong na losok jala adong na so marsitutu mangarade parendeon di tingki ari Minggu.  

 

Na dumenggan jala na ummuli do pasahathonta tu Tuhan Jesus, ala na dumenggan jala na ummuli do na dilehon Ibana tu hita. Aut sura didok Tuhan Jesus tu hita: “Ala satongasatonga do dipasahat tu Ahu, hahipason nasida pe satongasatonga ma Hulehon jala dame i pe satongasatonga Hulehon.” Tontu ndang adong sian hita na mangoloi. Alani i,  ala tangkas hita manghilala pasupasu dohot pangaramotion ni Tuhan Jesus di ngolunta, na ummuli jala na dumenggan i do sipasahathonta tu Tuhanta marhite huriaNa.

 

b.      Di keluarga:

Ringkot ni angka dakdanak na mananda “ise do Tuhan-na!” Boasa ringkot di angka dakdanak? Ala di haetehon i do boi disuanhon dasor manang ojahan ni haporseaon ni nasida. Ndang tarpatupa angka natoras i molo so disosohon ianangkhonna mandohoti Parmingguan Singkola Minggu jala na so haru tangkas dope panandaion ni natoras tu Tuhan Jesus.

 

Alani i, di angka natoras patuduhon ma ngolu partangiangon jala ngolu pamujian di bagasna be. Tapasomalsomal ma patupahon “Doa Bersama” dan “Kebaktian Keluarga” di tongatonga ni bagasta. Laos disi do dipatuduhon Tuhan Jesus dameNa di tongatonga ni keluarganta.

 

c.       Di Masyarakat:

Idaonta do na masa nuaeng di pandemi Covid-19 na so marnasalpu on. Manghorhon  tu angka ngolu ni parhuriaon, perekonomian nang pendidikan. Alai, tung songon dia pe dokdokna na ingkon adopanta nuaeng, sai torus do idaonta pambahenan ni Tuhan Jesus di ngolunta.

 

Ndang gabe mansohot saluhutna alani na masa on. Alai, lam dibungka do pamingkirion ni jolma laho mangadopi on. “Secara tidak langsung, pandemi ini membawa kita kepada dunia yang jauh lebih maju, yang kita kenal dengan dunia virtual.” Adong do Tuhan Jesus di “dunia virtual” on? Adong, alai cara do na gabe marasing. Tongtong do marsaringar pujipujian dohot hata ni Tuhan i di ngolunta nuaeng. Jala na rumingkot, ndang tadinghononNa angka na porsea na tongtong mambahen ngoluna gabe pujipujian di goarNa. Lam dipatau Tuhan Jesus ma hita di na pasahathon pujipujian di goarNa na badia i. Amen.

 

Syalom..!!

 

Selamat ari Minggu ma di hita saluhutna..!!

 

Tuhan Jesus mamasumasu..!!

 

Pdt. Ferdinand Fernando Silaen