NGOLU NA DIPASUPASU TUHAN (JEREMIA 17 : 5 - 10)

PANURATAN JAMITA MINGGU SEPTUAGESIMA

(70 Ari Andorang So Haheheon Tuhan Jesus)

HKBP Lembak Ressort Palembang

Minggu, 13 Februari 2022

Evangelium: JEREMIA  17 : 5 – 10

 

Angka dongan na hinaholongan di bagasan Tuhan Jesus Kristus..!!

I.      PAMUHAI

Didok Topik ni Minggunta do tu hita sadari on “Tarpasupasu Do Angka Na Marhaposan Tu Debata” (Diberkatilah Orang Yang Mengandalkan TUHAN). Topik ni Minggu on hira na mangalo “judul” ni turpuk na tarsurat di Bibelta (Bahasa Batak) na tarsurat disi “Marjea Do Na Marhaposan Tu Jolma.” Lapatanna disi: Adong do dua hata na “marsiadopan bohi” jala boi do gabe sipilliton ni bangso ni TUHAN i di ngoluna. “Tarpasupasu” dohot “Marjea do...” Molo ingkon pilliton sian na dua i, na dia ma sipillitonta: “Tarpasupasu” manang “Marjea.”

Ndang na pajolohu molo hudok, sude do hita mamillit hata na parjolo, i ma “Tarpasupasu.” So adong sian hita na olo dapotan “jea” manang “marjea.” I do tahe? Manang sala do na hudokhon i??

Sada sihasiholan ni jolma na mangolu di portibi on, i ma asa tongtong dapotan pasupasu!! Sude do manghirim asa tongtong dipasupasu ngoluna, lumobi pasupasu na sian TUHAN i:

a.Tu dia pe hita laho mangalangka, na tubu di pingkiranta i ma pasupasu!

b.Di na pasahathon pelean manang hamauliateon ni rohanta, tong do manghirim hita pasupasu na sian TUHAN i.

c. Molo marhobas hita di huria, manghirim do hita asa dipasupasu ngolunta rap dohot angka na hinaholongan ni roha.

d.     Di na martangiang pe hita, sada na so boi tading, i ma na mangido pasupasu!

Alai boasa ma hita ndang “mar na bosan” mangido pasupasu na sian Tuhan i?? Tartuju do i asa tung “las rohanta” mandalani parngoluanta di hasiangan on.

a.     Ise ma na las rohana molo marsahit ibana?? Alani i dipangido ma pasupasu marhite hahipason.

b.     Ise ma na las rohana molo tongtong marungkil ibana di ngoluna?? Alani i dipangido ma pasupasu marhite haluaon.

c.      Ise ma na las rohana molo marsirang ibana dohot na hinaholongan ni rohana alani hamatean? Alani i dipangido ma pasupasu marhite ganjang ni umur.

d.     Ise ma na las rohana marbada, masihosoman, masilatean ni roha dohot donganna sabagas nang tu angka alealena?? Alani i dipangido ma pasupasu marhite hadameon.

 

Sude pasupasu i tapangido asa tung las rohanta mandalani ngolunta on.

Angka dongan na hinaholongan di bagasan Tuhan Jesus Kristus..!!

II.    POINTER  JAMITA

Hea ahu berdiskusi tu sahalak parhalado naung matua, didok nasida do songon on tu ahu,“Sai pinarohahon do halak Kristen di partingkian on. Sai jumotjot do nasida mangido pasupasu na sian Tuhanta, hape ndang binoto sian dia do dalanna ibana manjalo pasupasu i.”

Gabe sada renungan secara pribadi ma tu ahu, atik na songon i do hita saleleng mangolu hita di portibi on. “Holan na manjalo pasupasu, so tinanda ise na mangalehon pasupasu i.”

Umbahen i, tangkas dipaandar turpuk jamita di Minggunta sadari on, songon dia do jolma na tarpasupasu, jala songon dia do jolma na marjea!!

Taida ma 2 point sian jamita sadari on:

 

1.UNANG NIOLOAN GABE MARJEA !!

“Ai na boha do amang Pandita on, ise ma sian hami na olo marjea. Sai na binahenbahen do!!” Ra, i do hatanta molo hudok point na parjolo on. Alai, boasa ma hudok i judul point na parjolo, ala olo jonok do i di ngolunta. Umbahen i, sai tapadao ma sian ngolunta on!

Taida ma pandohan di ayat 5 i, Hata ni Tuhanta do na mandok:

a.Marjea ma baoa!!

1. Tubu ma sungkunsungkun:

-   Boasa ma ingkon “baoa”??

-   Hape molo di Alkitab bahasa Indonesia didok do “orang”??

-   Na holan baoa i do jolma??

-   Songon dia do angka horong ni parompuan??

2. Molo takira ma parminggu di deba huria, ndang binoto di huria on, ndang sanga dope ahu markira: “Dia do gumodang na ro: Baoa do manang Borua??”

3. Baoa i do na gabe simbol!! Molo di ulaon pamasumasuon pardongansaripeon, sai diondolhon “ai baoa i do ulu ni pardihutana songon Kristus Ulu ni huria i!!” Molo baoa i pe ndang diulahon songon tugas dohot tanggung jawab di tongatonga ni keluarga, songon dia ma keluarga i??

4. Molo ndang pinatuduhon ni jolma, lumobi angka uluan di keluarga, parsahutaon, marga dohot huria tiruan na denggan, dapotan jea ma nasida!

 

b.Alani aha marjea? Alani:

Ala marhaposan tu jolma (mengandalkan manusia) dohot tu bolon ni botohonna (kekuatannya)

-   Ai na sala do marhaposan tu jolma?

-   Prinsipna songon on: “Saburjuburjuna jolma ingkon hea mangulahon sala! Baliksa, parjahat na sumalin i pe hea do mangulahon na denggan!”

-   Lapatanna: So na manontong jolma i!

a.      Na boi do ibana lam matua

b.     Na boi do ibana adong kepentingan

c.      Na boi do ibana hapit alani keadaan, dna.

 

c. Jala dia ma PANGHORHONNA jolma na marjea alani marhaposan tu jolma dohot tu bolon ni botohonna? GABE DIPASURUT ROHANA SIAN TUHAN I !! Dipatudos ma i:

1. Songon halak parbahudung di tano na mahiang do ibana, ndang tagamon idaonna ro na denggan i! (Seperti semak bulus di padang belantara, ia tidak akan mengalami datangnya keadaan baik).

-   Paholanghon diri sian parpunguan na badia! Gabe koring ma ma partondionna. Ujungna: jotjot ma on marungutungut, ndang adong semangat ni ngolu ala holan mamingkiri dirina sambing! Marisuang do saluhutna angka naung binahenna saleleng on!!

 

2. Songon halak na maringan di tano bangkalbangkal di halongonan, di tano na ansim na so hinundulan ni halak (Seperti tinggal di tanah angus di padang gurun, di negeri padang asin yang tidak berpenduduk).

-   Gabe jolma naung moru jala olo naung mate panghirimon ni ngoluna!! Mangolu do ibana, alai hira ndang mangolu!! Dia tidak menikmati hidupnya dan hidupnya tidak memberi kehidupan bagi sesama! Ujungna marisuang do saluhutna na adong di ibana.

 

On, ma jolma naung marjea ala dipaholang dirina sian TUHAN i. Dirimpu boi ibana mangolu ndang pola ringkot marminggu, ndang pola ringkot partangiangan, ndang pola ringkot mangido hasesaan ni dosa, ndang pola ringkot martangiang!! Dirimpu ibana boi do ibana mangolu holan alani gogona sambing dohot na adong di ibana. Dirimpu ibana boi mangolu ala nangkok arga ni karet. Dirimpu ibana boi mangolu alani malona. 

Manat! Padao roha na sisongon i asa unang dapotan jea hita!

 

Angka dongan na hinaholongan di bagasan Tuhan Jesus Kristus..!!

2.MARTUA DO NA MARHAPOSAN TU TUHAN !!

On ma hata sipalambok roha sian turpukta on! Jala ngolu ni halak Juda, na mangasahon pingkiranna dohot hagogoon sian hala Assur dohot Misir gabe parsiajaran na mansai arga ma di hita na pungu dison!!

Boasa?? Ala halak Assur dohot Misir, tung diurupi pe halak Juda mangalo bangso Babel, na adong do na tinuju ni nasida, i ma asa boi diparhatoban halak Juda di toru ni huaso nasida!! Olo do hita songon i? Unang nioloan na boi mambahen hita kecewa!!

Alani i, didok di turpukta:

a.Martua ma baoa!!

1. Tong ma “baoa” na gabe ondolanna! Ndang dia imbarna sian hatorangan na parjolo i! Alai, ndang na jea be na nidokna, martua ma!!

-        Ingkon pinatuduhon saluhutna jolma, lumobi angka uluan di keluarga, parsahutaon, marga dohot huria tiruan na denggan, ala ibana do na mangarahon angka na di humaliangna.

 

b.Alani aha martua??

Ala marhaposan (mengandalkan) dohot marhaporusan (berpengharapan)tu TUHAN i!!

1. On ma dasor ni ngolu angka siihuthon ni Kristus: Kristus i do ojahan di ngolunta!!

2. TUHAN tidak pernah mengecewakan hidup kita!!

-   Ndang ganggu be hita mandalani ngolunta on!

-   Denggan do ngolunta molo tapasahat tu Ibana!

-   Las ni roha dohot gogo do na jinalo molo hot hita di Kristus!!

 

c. Dia do tandana halak na martua??

1. Songon hau na sinuan di topi ni batang aek, jala manjarar uratna di lambung batang aek (Ia akan seperti pohon yang ditanam di tepi air, yang merambatkan akar-akarnya ke tepi batang air).

-   Marojahan do ibana tu Silehon Hangoluan, i ma Tuhan Jesus.

-   Ndang hurangan manang aha ibana di ngoluna.

-   Denggan do parngoluonna na tongtong mangolu di bagasan dame na sian Tuhanta.

-   Dao holso sian ibana, sai tongtong do ibana mandok mauliate tu Tuhan Jesus.

 

2. Ndang mabiar ibana molo ro hamohopon jala tongtong rata bulungna (Tidak mengalami datangnya panas terik, yang daunnya tetap hijau).

-   Ndang ganggu rohana pasahathon diri tu Tuhan Jesus molo masa parungkilon dohot hamaolon di ngoluna.

-   Ndang mintop haporseaonna ala tongtong digohi Tondi Parbadia.

-   Dapotan hangoluan dohot hamuliaon na sian Tuhan Jesus.

 

3. Ndang holsoan ibana di taon haraharon, jala ndang mansohot marparbue (Tidak kuatir dalam tahun kering, dan yang tidak berhenti menghasilkan buah).

-        Ngoluna gabe pasupasu di humaliangna.

-        Siboan dame do ibana di humaliangna.

-        Ndang mansohot mangulahon na denggan tung pe ro hamaolon di ngoluna!

 

Angka dongan na hinaholongan di bagasan Tuhan Jesus Kristus..!!

Jadi, on ma na nidokna PASUPASU i!! Pasupasu ndang na gabe objek, alai KEADAAN dohot KUALITAS!!

1.Di deba, hepeng boi do gabe pasupasu molo pinangke dohot denggan. Alai debanari, boi do gabe jea ala pinangke tu na so denggan.

2.Di deba, huaso boi do gabe pasupasu molo mamboan tu hangoluan. Alai debarani, boi do gabe jea ala pinangke laho pamatehon halak dohot lingkungan.

3.Di deba, parungkilon boi do gabe pasupasu molo lam pajonokhon dirinta tu Tuhan Jesus. Alai debanari, boi do gabe lam dipatangkang rohana jala lam dipadao rohana sian Tuhan Jesus, ujungna lam porsuk ma ngoluna!

Umbahen i, tangkas ma hita manghangoluhon Tuhanta Jesus di ngolunta, ai sidodo roha do Ibana. Diboto do arsak manang las ni roha di ngolunta on. Unang alani arsak dohot las ni roha, gabe tapaholang dirinta tu Ibana.

Tapahot ma haporseaonta tu Tuhanta Jesus. Ibana do na manontong, jala ibana do silehon hangoluan. Mangolu ma hita di bagasan Tuhan Jesus Kristus jala tahangoluhon ma pasupasuNa di ngolunta! Amen!

Syalom..!!

Selamat ari Minggu ma di hita saluhutna..!!

Tuhan Jesus Mamasumasu..!!

 

Pdt. Ferdinand Fernando Silaen