MALUA SITUTU DI BAGASAN JESUS KRISTUS ( JOHANNES 8 : 30 - 36 )

PANURATAN JAMITA MINGGU XI DUNG TRINITATIS

HKBP Maranatha Ressort Kutacane

Minggu, 15 Agustus 2021

Evangelium : JOHANNES  8 : 30 - 36

Topik : Debata Na Paluahon (Allah Yang Memerdekakan)

Angka dongan na hinaholongan di bagasan Tuhan Jesus Kristus..!!

I.      PAMUHAI 

Hirahira tolu Minggu na salpu, godang ma barita taringot tu “Susu Beruang” (Bear Brand). Nidok: boi do “Susu Beruang” i laho pamalumhon, pinomat paneanghon hinahansit panghorhon ni sahit Covid-19, jala boi do mangalo sahit i molo ganup ari niinum.

Alani barita i, na somal argana Rp 9.000/kaleng, gabe nangkok ma: Rp 12.500 – Rp 50.000 per kaleng. Gabe godang ma jolma na “Panic Buying” di pigapiga kota. Maol ma niluluan siinumon i jala molo tung dapot, nunga nangkok argana sian na somal.

Godang do na PORSEA alani HATA dohot BARITA na VIRAL hatiha i!

Hape, molo angka na malo patoranghon, so pola godang panghorhon ni “Susu Beruang” i tu sorimago Covid-19. Holan di na laho panangkokhon imun tubuh do panghorhon na siinumon i. 

I ma fenomena na jotjot masa di negaranta!!

 

Muramura do mangihuthon na masa, na so jumolo pinatangkas jala sinulingkitan: TUTU DO manang DANG!! Hape gabe mangihuthon na masa i ma torop jolma.

 

Angka dongan na hinaholongan di bagasan Tuhan Jesus Kristus..!!

Songon i do tahe na nidok ni ayat 30, songon pamuhai ni turpuk jamita sadari on, na nidokna: “Asa di na manghatahon i Ibana, torop ma gabe porsea di Ibana” (Setelah Yesus mengatakan semuanya itu, banyak orang percaya kepada-Nya)??

 

Dohononta ma: “MARHUASO DO HATA!!”

1.        Godang do jolma lam mamora ala na malo manghatai!! Baliksa, godang do jolma lam maol mangalului sumihisik ala ndang malo manghatai!!

 

2.        Marpanghorhon tu pangalaho na denggan do molo somal manangihon hata na denggan. Baliksa, marpanghorhon tu pangalaho na so denggan do molo somal manangihon hata na so denggan!!

 

3.        Gabe jolma na lambok do halak na pasomalsomal marhata na lambok jala gumodang mambege hata na lambok. Baliksa gabe jolma na horas/tempramental do halak na pasomalsomal marhata na horas jala gumodang mambege hata na horas!!

4.        Balga do panghorhon ni hata di ngolu ni jolma: boi do mambahen lungun, tumatangis, mengkel, semangat, lumobi ma membentuk KARAKTER ni SASAHALAK jolma!!

Jadi, dia do panghorhon ni hata ni Tuhan Jesus di ngolu ni jolma? Marpanghorhon tu na denggan do manang na so denggan?? Tarida do di ngolu ni halak Kristen nuaeng on manang dang? 

Sungkunsungkun i ma na mamboan hita marnida na masa, di na mangantusi jala manghangoluhon jamita on di ngolu ni Hakristenonta di partingkian nuaeng on.

 

Angka dongan na hinaholongan di bagasan Tuhan Jesus Kristus..!!

II.         HATORANGAN  NI  TURPUK

 

1.        MIAN MA DI HATA NI TUHAN JESUS!!

Dang boi hape intap ni na porsea angka siihuthon ni Kristus!! I do na nidok ni Tuhan Jesus di ayat 31-32, “Molo MIAN hamu di bagasan hatangKu, sintong ma hamu siseanHu. Dung i tandaonmuna ma na singtong i, jala paluaon ni na sintong i ma hamu.” (Jikalau kamu tetap dalam firman-Ku, kamu benar-benar adalah murid-Ku dan kamu akan mengetahui kebenaran, dan kebenaran itu akan memerdekakan kamu).

Alani hata ni Tuhan Jesus i do na mangalehon pangantusion tu hita, asa unang holan nidok hita “halak na PORSEA,” alai ihut ma muse na manontong MIAN di hataNa. Ndang dilaosi jala ingkon dihangoluhon.

Ala dirimpu na torop i sae do intap ni na porsea, didok nasida ma tu Tuhan Jesus di ayat 33, “Pinompar ni si Abraham do hami; ndang dung hami mangadop tu halak. Boasa dohononmu: Paluaon ma hamu?” (Kami adalah keturunan Abraham dan tidak pernah menjadi hamba siapa pun. Bagaimanakah Engkau dapat berkata: Kamu akan merdeka?).

Porsea do nasida ala pinompar ni si Abraham, gabe marlomolomo marpangalaho mangihuthon pingkiran nasida sambing!!

Dihaporseai nasida pe Tuhan Jesus holan alani HataNa marhite angka pangajarion, jamita dohot tanda halongangan na binahenNa. Jolma na porsea tu Tuhan Jesus do nasida? Porsea!! Alai...........NDANG MIAN NASIDA DI HATANA I!

Alani i, sungkunonhu ma tu hamu:

1.          Porsea do hamu amang/inang di Tuhan Jesus?? Adong dope na so marsiantoan tu donganna manang tu keluargana??

2.          Porsea do hamu amang/inang di Tuhan Jesus?? Adong dope na so olo mardenggan tu donganna manang tu keluargana?

3.          Porsea do hamu amang/inang di Tuhan Jesus?? Adong dope na menyimpan dendam tu donganna manang tu keluargana?

4.          Porsea do hamu amang/inang di Tuhan Jesus?? Adong dope na menyimpan sakit hati tu donganna manang tu keluargana?

5.          Porsea do hamu amang/inang di Tuhan Jesus?? Adong dope na so olo maninggalhon dosa hasianna, naung somal diulahon??

Ndang boi hape intap ni na porsea. Kalau hanya sekedar PERCAYA, itulah yang sering mengundang KEKECEWAAN hadir di dalam hidupnya. Itulah alasan mengapa masih banyak orang Kristen yang merasa KECEWA dengan pengharapannya, doanya dan permintaannya kepada Tuhan Yesus.

Alai, molo dihangoluhon tangiangna, dihangoluhon na nidok ni Tuhan Jesus, dihangoluhon holong na masihaholongan, dihangoluhon roha na masiurupan.....

Gabe dihilala rohana do DAME na PALUAHON  sian kekecewaan, arsak ni roha, biar ni roha dohot hansit ni roha!!

Alani i, asa jaloonta saluhutna jala tardok hita sisean ni Tuhan Jesus, hangoluhon ma haporseaonta jala hangoluhon ma hata ni Tuhan Jesus di ngolunta, asa didok ma hita halak na MALUA manang MERDEKA!!

 

Angka dongan na hinaholongan di bagasan Tuhan Jesus Kristus..!!

Dung tardok hita gabe halak na MALUA manang na MERDEKA, naeng ma hita:

 

2.        MANGHANGOLUHON HALUAON NA SIAN TUHAN JESUS!!

Dua ari nari, sahat ma hita tu Ari na Bersejarah di tongatonga ni bangsonta. Tanggal 17 Agustus 2021, gabe parningotan di hita, di naung 76 taon negaranta Republik Indonesia naung gabe “Negara na MERDEKA”!!

Hibul do hita sude masyarakat ni Indonesia mandok naung “MERDEKA” hita? Manang piga hali di ganup taon, begeonhu do hata sipalesem na haruar sian pamangan ni jolma na mandok songon on:

 

a.             Hamu ma na Merdeka, ahu ndang dope!! Ai pogos dope ahu!!

 

b.               Hamu ma na Merdeka, ahu ndang dope!! Ai marsewa tano dope ahu!!

 

c.               Hamu ma na Merdeka, ahu ndang dope!! Ai mangontrak jabu dope ahu!!

 

d.               Hamu ma na Merdeka, ahu ndang dope!! Ai dipecat do ahu sian parkarejoanhu!!

 

e.               Hamu ma na Merdeka, ahu ndang dope!! Ai godang dope panangko di hutanami!!

 

f.                Hamu ma na Merdeka, ahu ndang dope!! Ai so marhasohotan dope ahu!!

 

g.               Hamu ma na Merdeka, ahu ndang dope!! Ai so sae dope Covid-19 on!! Dna..

 

Borhat sian na masa i, ndang boi taparsoada na masa di negaranta nuaeng on.

Lapatanna: Tongon godang dope parungkilon siadopanta di partingkian nuaeng on, lumobi pangontak ni pandemi Covid-19 on!!

Alai, alani na masa i dohononta do “na so MERDEKA dope hita”???? Tapasada ma jolo pangantusionta!!

Molo di Kamus Besar Bahasa Indonesia didok do lapatan ni “MERDEKA” i ma “BEBAS!!” Bebas na songon dia do lapatan ni i?? Molo di hata Batak, tudos do hata Merdeka tu hata “Malua!!” Molo didok Malua, na adong hinan do na MANGARANTE ibana. “Ise do” manang “aha do” na mangarante i?? I ma na so MAMBOAN TU HAULION NI NGOLU!!!

Lapatanna disi, halak na MERDEKA manang na MALUA, ndang na gabe JOLMA NA BEBAS NA SO MARATURAN.

Alai ingkon adong do na Mangarajai manang Mengendalikan ngoluna.

 

Angka dongan na hinaholongan di bagasan Tuhan Jesus Kristus..!!

Halak na bisuk sian ilmu Sosiologi mandok ingkon adong do di ngolu ni jolma “LOCUS OF CONTROL” (Pusat Kendali Hidup Manusia).

Gombaranna songon on:

a.           “Locus Of Control” (Pusat Kendali) ni sasahalak jolma i ma Dirina sandiri:

-          Ibana na marhuaso tu dirina sandiri.

-          Ibana na mambahen dirina sonang manang susa.

-          Ibana na mambahen dirina semangat manang gale.

 

b.          “Locus Of Control” (Pusat Kendali) ni sasahalak jolma i ma hepeng:

-          Hepeng na marhuaso jala mangarajai dirina.

-          Hepeng na mambahen dirina sonang manang susa.

-          Hepeng na mambahen dirina semangat manang gale.

 

c.           “Locus Of Control” (Pusat Kendali) ni sasahalak jolma i ma huaso:

-          Huaso i do na mangarajai dirina.

-          Huaso i do na mambahen dirina sonang manang susa.

-          Huaso i do na mambahen dirina semangat manang gale.

 

d.          “Locus Of Control” (Pusat Kendali) ni sasahalak jolma i ma berfoya-foya:

-          Hidup na berfoya-foya do na mangarajai dirina.

-          Hidup na berfoya-foya do na mambahen dirina sonang manang susa.

-          Hidup na berfoya-foya do na mambahen dirina semangat manang gale.

Singkop do molo na opat faktor i gabe “Pusat Kendali” manang “Locus Of Control” manang na “Mangarajai” diri ni sasahalak jolma?? Ndang boi singkop alani na opat i!!! Alani ukuran ni hadagingon dope dasor na mangarajai sasahalak jolma molo pinangke na opat i!!

Ala siopat nangkin, boi do mamboan hita mangulahon dosa:

a.           “Locus Of Control” ni sasahalak jolma i ma Dirina sandiri:

-          Mardosa ibana ala gabe so parduli tu donganna jolma, holan tu dirina do dipingkiri.

-          Mardosa ibana ala dirina do na dibahenna gabe dasor hasintongan, na asing sian ibana, sala do i!

-          Mardosa ibana ala tubu jala marurat ma di rohana roha holan patuduhon dirina jumago jala umpistar sian na asing.

 

b.          “Locus Of Control” ni sasahalak jolma i ma hepeng:

-          Mardosa ibana ala hepeng na mangatur ngoluna, ndang dirina na mangatur hepeng.

-          Mardosa ibana ala hepeng na dipangasahon di ngoluna. Tarbahenna na sintong songon di rohana ala boi dituhor ibana uhum.

-          Mardosa ibana ala hepeng do mambahen jarak dirina tu donganna. Adong kelas ni na mora dohot na pogos. Dileai angka jolma na pogos.

 

c.           “Locus Of Control” ni sasahalak jolma i ma huaso:

-          Mardosa ibana ala menghalalkan segala cara asa dapotna huaso.

-          Mardosa ibana ala huasona na dipangasahon. Na so sadalan tu ibana, dipangke ma huasona laho mambahen arsak tu nasida.

-          Mardosa ibana ala huasona na menindas jolma na gale.

 

d.          “Locus Of Control” ni sasahalak jolma i ma berfoya-foya:

-          Mardosa ibana ala diusahahon asa berfoya-foya torus ibana. Manangko dohot mamunu pe diulahon, asal ma saut na di rohana.

-          Mardosa ibana ala ndang dipingkiri be ngolu partondion, so holan ngolu pardagingonna.

 

Ujungna gabe hatoban dosa!!

Ala so boi singkop i jala gabe hatoban dosa do binahen ni i, dipatuduhon Tuhan Jesus do na boi mamboan jolma gabe MALUA SITUTU, i ma na nidok di ayat 36, “Molo dipalua Anak i hamu, na MALUA SITUTU ma hamu” (Jadi apabila Anak itu memerdekakan kamu, kamu pun BENAR-BENAR MERDEKA)!!

I ma alusna!!

 

a.          Loas ma Tuhan Jesus mangarajai dirinta!!

b.          Loas ma Ibana mamboan hita tu na sinangkapan ni rohaNa!!

c.           Loas ma Ibana patuduhon angka naummuli di ngolunta tung adopanta dope ragam ni hamaolon di gulmit ni ngolunta!!

Ala Tuhan Jesus do Sipalua na paluahon hita sian dosa jala na mamboan hita tu hangoluan naung pinaradeNa di harajaonNa, loas ma Ibana mian di dirinta jala hita mian di Ibana!! Amen.

Syalom..!!

Selamat Ari Minggu Di Hita Saluhutna..!!

Tuhan Jesus mamasumasu..!!

 

Pdt. Ferdinand Fernando Silaen