GABE PARTOGI NA SINTONG ( JEREMIA 22 : 1 - 9 )

SERMON EVANGELIUM  MINGGU X NDUNG TRINITATIS

HKBP RESSORT KUTACANE                                                                       

Di Ari Sabtu, 07  Agustus 2021

Turpuk : Jeremia 22 : 1 – 9

Topik : Ulahon  Ma  Uhum  Dohot  Hasintongan (Lakukanlah  Keadilan  Dan  Kebenaran)

 

I.      PATUJOLO

“Ndang dao tubis sian bonana!” (Rebung yang tumbuh tidak jauh dari pohonnya!). Tudos do i songon “Pepatah Indonesia” na mandok: “Buah yang jatuh tidak jauh dari pohonnya.” Dua pandohan na mangalehon pangantusion taringot tu pangalaho ni ianangkhon na so dao sian pangalaho ni natorasna. Sada gombaran na gumodang idaonta di angka pangalaho ni angka ianangkhon na manuman tu pangalaho ni amongna manang inongna. Sude do tahe songon i? Ndang sude hape na sisongon i masa di portibi on.

Songon di turpuk Evangelium on, na manggombarhon pangalaho anak dohot pomparan ni Raja Josia, na dao pangalahona sian ibana. Targoar do si Josia, i ma raja na mangulahon “Reformasi” parugamoon, na paulakhon halak Israel gabe marsomba muse tu Debata Israel marhite na mangondolhon Patik di parugamoon nasida. Israel (Juda) naung mangulahon parsombaon tu debata ganaganaan, nunga mulak muse marsomba tu YHWH. Jala didok si Jeremia do ianggo si Josia, i ma sahalak raja na mangulahon hatigoran dohot hasintongan (Jer.22:15,16).

Alai, marongso ma harajaon ni Juda mamungka sian hataluon nasida mangadopi Misir. Misir na niuluhon raja Parao Neko II (609-593 sM) monang mangalo Juda, jala mate do si Josia di parporangan i (2 Raja 23:29). Dung monang Misir, dipabangkit si Neko ma Eliakim, anak ni si Josia, bahen raja manguluhon Juda, laos dipaimbar ma goarna gabe Joyakim (2 Raja 23:31-35). Ndung mamungka si Joyakim bangkit gabe raja, mulak ma pangalaho bangso i laho marsomba tu debata ganaganaan laos dilaosi nasida ma uhum dohot hatigoran. Diulahon nasida do sogo ni roha ni Jahowa, sandok songon na binahen ni angka ompuna (2 Raja 23:37). I ma panghorhon ni bangso Misir na manggomgomi nasida dohot bangso Babil na niuluhon raja Nebukadnezar na monang maralohon Misir, bangkit ma nasida manggomgomi bangso Juda.

Ala marbalik muse nasida sian Jahowa, disuru ma panurirang Jeremia di na laho manurirangi bangso i huhut paboahon uhum na naeng dipasahat Jahowa tu nasida molo ndang mulak nasida marsomba tu Jahowa. I ma hataridaan pangalaho ni angka pinompar ni raja Josia na gabe “dao tubis sian bonana.” Ndang ditiru nasida pangalaho ni amana dohot ompuna si Josia dohot si Hiskia. Ala balik pangalaho nasida sian na hinalomohon ni Jahowa, gabe dipasahat Jeremia ma hata ni Jahowa na marsuru nasida asa mulak nasida marsomba tu Ibana jala diulahon ma uhum dohot hatigoran. Asa unang dijalo nasida uhum alani rimas ni Jahowa. I ma na naeng diondolhon sermon naung huparade hami di turpuk Evangelium di Minggunta sadari on.

 

 

II.    HATORANGAN  NI  TURPUK

Ayat 1-3: Radoti Uhum Dohot Hatigoran Une Manang So Une Tingkina

Jeremia ima sahalak na tarjou gabe panurirang di taon 626 sM. Mangula do ibana di pangujungi partingkian harajaon Asyur sahat tu harajaon Babel na manggomgomi Juda, sahat tu hinamago ni Jerusalem taon 586 sM. Dipillit jala dipabangkit do panurirang Jeremia laho manurirangi di tongatonga ni bangso Juda na tongon hona rimasan ni Jahowa. Ganjang do panurirangon ni si Jeremia di bangso i pola mamolus partingkian ni pigapiga raja na manggomgomi bangso i. Jala mansai dokdok do ulaon na pinasahat tu panurirang Jeremia, ai nunga sandok bangso i manundalhon Debata ni Israel.

Mangalehon panurirangion ma si Jeremia dungkon na masa i, asa unduk bangsona tu panggomgomi ni Babilon ala i do na hinalomohon ni Debata (27:1-11).  Alai, dung ditariashon panurirang Jeremia Hata ni Jahowa tu bangso i, gabe dihasogohon bangso i do si Jeremia, termasuk ma horong ni angka sintua ni bangso i songon i nang angka malim.

Dihara angka malim do saluhut bangso Juda asa marmusu dompak si Jeremia ala hata panurirangon napinasahatna. Jotjot do ibana dipaburuburu, diancam jala sahat tu na dihurungkon jala pola do martahi bangso i naeng mangonggop hosanna. Sandok tung sireherehean do si Jeremia dibahen bangso i ala hata panurirangonna tu nasida.

Alai, tongtong do dipataridahon si Jeremia dirina songon halak na pinillit ni Jahowa. Nang pe songon i na masa, ndang gabe sumurut Jeremia laho manghatindanghon Hata ni Jahowa. Diulahon ibana do parsuruon i di bagasan unduk ni roha dohot pangoloion na tangkas. Diarahon si Jeremia tu bangso i dohot tu angka raja ni Juda asa mangantusi dalan ni Debata marhite na ingkon mangundukhon diri tu Babilon. Sada dalan do i asa unang mangasahon diri bangso i tu gogona, alai ingkon unduk ma tu nasa na sinangkapan ni Debata tu ngolu ni bangso i.

Songon i nang di hita angka siihuthon ni Kristus. Taboto jala tahilala do parngoluan na itabolus sahat tu tingki on. Ragam ni angka na masa, lumobi pandemi Covid-19 na so marnasalpu sahat tu sadari on. Maol, parir jala dokdok do na tataon nuaeng. Jala sahat tu nuaeng, adong dope deba halak Kristen na patupahon parmingguan di tongatonga ni bagasna be. So holan i, na dohot do marhorhon tu angka ngolu perekonomian ni bangsonta sahat tu hita. Ditamba muse angka cuaca ekstrem na mambahen angka pangula tumatangis mangadopi angka arga ni suansuanan na so songon na somal jala hasil na so songon angka taontaon na salpu.

Alani i ma, ro hata ni Tuhanta on na laho paingothon hita asa tongong hot di na mangulahon na hinalomohon ni rohaNa. So holan hita nuaeng na mangadopi dokdok ni sitaonon nuaeng, alai dohot do angka donganta na asing na adong di huta on dohot na dao sian huta on. Ringkot tahangoluhon, ndang adong sangkap ni Tuhan i laho manadinghon hita. Unang adong sian hita na “terpengaruh” alani na masa nuaeng,  gabe holan manait tu dirinta sandiri jala holan mangalului pangomonan tu dirinta sandiri, ndang peduli tu angka dongan na asing.

Mangulahon uhum dohot hatigoran i do parbue ni na mangulahon hata ni TUHAN i. Mamungka sian keluarga, lam ditambai ma partingkian di na laho mangajari nasida marhite hata ni Tuhanta. Ala boi do nasida gabe marbalik sian hata ni TUHAN i alani pengaruh lingkungan. Sinjata na gumogo, i ma marhite na manangianghon nasida huhut paingothon nasida asa tongtong manghangoluhon roha na pangoluhon.

Ayat 4-5: Panghorhon Di Na Mangulahon Manang So Mangulahon Hata Ni TUHAN      

Sada lumbalumba na pinasahat ni Jahowa tu bangsoNa hatiha i. Sian hata on, dipataridahon panghorhon ni halak na satia dohot na so satia mangulahon di parngoluon na hinalomohon ni TUHAN i. Tangkas do hata on borhat sian parungkilon na diadopi nasida, i ma di angka panggomgomi na mamboan nasida tu hapariron ni ngolu. Nunga mauas nasida tu raja na hot di parsombaon tu TUHAN i.

Alani i, molo dioloi nasida laho mangaradoti patik dohot na nidok ni Jahowa, dipabangkit ma di nasida panggomgomi na mamboan nasida tu haluaon dohot tu ngolu na dumenggan tu joloan ni ari. Gabe hundul muse angka raja ni habangsa ni David na tongtong mangharingkothon parsombaon tu Jahowa dohot na mamboan nasida tu ngolu na tarpasupasu.

Baliksa, molo ndang marbalik nasida manadinghon pangalaho na so dihalomohon ni Jahowa, ingkon gabe halongonan do nasida. Lapatanna: Gabe marserak ma nasida hira na so adong Debata di nasida jala dokdok dope taonon ni nasida angka hamaolon dohot hapariron ni ngolu sahat tu pinompar nasida sogot.

Songon i nang hita na manghilala dope pangaramotion ni Tuhanta di ngolunta. Molo hot hita di hataNa jala mangolu di bagasan panghirimon tu Ibana, sai pasupasuonNa do nasa na taula. Gabe mangalehon parbue na denggan ma i di ngolunta.

Unang sanga lupa hita di na mandok mauliate tu Ibana di sude pangaramotionNa. Lumobi di luatta molo naung sidung hita manggotil angka na niula ni tangan manang parkarejoanta. Saluhutna na sian Ibana do i. Molo boi dope hita manggotil sian tano na pinasahatNa laho taula, disi do dipatangkas Tuhanta, na holong do Ibana tu hita jala disarihon do ngolunta. Unang lupa hita tu Ibana.

Haundukhon tu na Manompa hita, i do na parjolo ingkon peoponta di nasa ni ngolunta songon halak na porsea. Naeng ma saluhut na taula i hombar tu lomo ni rohaNa sambing. Olo do nian hira na maralo na sinangkapan ni rohanta sian na sinangkapan ni Tuhanta. Alai, sian i do sasintongna naeng dipatuduhon Tuhanta tu hita, so adong na boi mangalo na piningkiran ni TUHAN i. Jala saluhut na sinangkapanNa, ingkon marujung do tu haulion, lumobi gabe pasangaphon Ibana di tongatonga ni portibi on. I do na patuduhon holong ni rohaNa tu hita angka jolma.

 

Ayat 6-9: Mangolu Di Bagasan Hamubaon Ni Roha

Sada gombaran ma mansai dokdok ingkon taonon ni bangso na mangalaosi hata ni TUHAN i. Luat Gilead nang Libanon na nidok di ayat 6 on manggombarhon inganan na gok las ni roha ala marparbuehon na ringkot di ngolu ni bangso Juda. Hape ala ditadinghon nasida padanna dohot Jahowa, gabe halongonan ma huta nasida. On ma gombaran ni nasida na tarbuang tu Babil, jala halak na tading di huta i, mangadopi parungkilon ala so adong be Bagas Joro ni Debata inganan parsombaon nasida tu Debata jala nunga marongso be harajaon nasida, tartaban ma nasida tu bangso parbegu. Gok parungkilon nama ngolu nasida.

Songon i nang di hita nuaeng, ndang lomo roha ni Tuhan Jesus asa mate hita di bagasan dosanta. Alai, na lomo do rohaNa tung lam dipaimbaru dirinta raphon dohot angka keluarga. So adong sian hita na so “dielaela” dosa asa taulahon. Alai, marhite ngolu na tongtong olo paimbaru diri, diurupi Tuhanta ma hita mulak tu ngolu na tigor hombar tu lomo ni rohaNa, ndang sahat tu hita rimasNa.

 

 

III.  PANUTUP

Hata ni Tuhanta na itabege ingkon patubu panolsolion. Muba sian na ganggu di huaso ni Tuhan Jesus tu pos ni roha di hagogoonNa jala marhataridaan di parange na denggan. Parange na denggan i do pataridahon halak porsea jala olo manangihon Hata ni Tuhan i. Unang gabe olo hita mangihuthon pangalaho ni jolma na maralo tu hata ni Tuhanta.

Na mangula do hataNa paingothon hita asa marhamubaon marhite ragam ni na masa. Molo masa angka na masa, ndang sae holan arsakhonon, alai ingkon pangkeon i laho pasolhot diri tu Tuhan i. Nasa peristiwa na terjadi ingkon hilalaonta i songon tanda-tanda na paingothon hita mangulahon lomo ni rohaNa. Holan marhite na pasolhot dirinta tu Tuhan i do boi botoonta lomo ni roha ni Tuhan Jesus.

So holan i! Dohot do hita tarjou asa parsidohot di pajongjonghon hatigoran dohot uhum di portibi on. Songon na viral di partingkian nuaeng, i ma “TIM 11” na mardalan pat nasida sian Toba sahat tu Istana Negara di na mansoarahon “Peduli Lingkungan.” Asa dipaso pamarenta perusahaan Toba Pulp Lestari (TPL) na manegai alam di bonapasogit an. Dilehon nasida do rohana asa manjaga lingkungan inganan ni jolma na mangolu.

Ndang pola ingkon songon i nian na taulahon, alai dimulai ma sian ulaon na metmet. Isarana: Taihuthon ma Protokoler Kesehatan asa pasidohot hita pasohon hararat ni sorimago Covid-19. Ihut ma muse tu ulaon na manjaga lingkungan, marhite na manuan hau di inganan na boi gabe panuanan ni hau huhut na manjaga lingkungan. Jala tapadao ma roha na tamak dohot roha na holan manait tu diri, alai tahaholongi ma angka donganta jolma songon dirinta sandiri. Uhum dohot hasintongan boi tarula jolma molo dilopokhon di rohana ngolu na manghaholongi hangoluan (pro kehidupan), so holan na martangiang! I do joujou tu angka na manangihon soaraNa. Amen.  

 

Syalom..!!

Tuhan Jesus Mamasumasu.!!

Pdt. Ferdinand Fernando Silaen