BORHAT MA HO JALA BARITAHON MA HATA NI TUHAN I ( MARKUS 6: 6b - 13 )
SERMON EVANGELIUM MINGGU V DUNG TRINITATIS
HKBP RESSORT KUTACANE
Di
Ari Sabtu, 03 Juli 2021
Turpuk
: Markus 6 : 6b – 13
Topik
: Borhat Ma Ho Jala Baritahon Ma Hata Ni Tuhan I (Pergi Dan Beritakanlah Firman
Allah)
I. PATUJOLO
Di partingkian nuaeng on, ndang apala maol be hita manangihon jamita. Nuaeng, holan pinangke smartphone jala diisi paket-na, nunga boi hita manangihon jamita na berbentuk video sian Youtube manang berbentuk tulisan sian WhatsApp, Facebook manang Blog. Lam marsaringar ma Barita na Uli di liat portibi on alani hamajuon ni zaman on. Alai, sian na masa sisaonari on, sude do tahe marpanghorhon tu na denggan? Manang sian hamajuon ni zaman on gabe mambahen lam maol hita manjalo pangantusion na polin sian Barita na Uli i? Hubahen ma pamingkirion songon patujolo di bahan sermon naung huparade hami.
Ndang na bahenonhu sisi positif dohot sisi negatif taringot tu na pararathon Barita na Uli di hamajuon zaman on, alai pangkeonhu ma hata “Marpanghorhon Tu Na Denggan” dohot “Marpanghorhon Tu Hamaolon.” Alani i, idaonta ma:
1. Marpanghorhon Tu Na Denggan
Ganup ari, ganup tingki nunga lam mura hita
manangihon jamita. Jala jamita di partingkian nuaeng on, nunga gabe konsumsi publik (ndang holan halak Kristen
na boi manangihon). Las ma rohanta, lumobi di masa pandemi nuaeng on, torop do angka ruas na so boi ro tu Gareja laho manangihon
jamita, alai boi do nasida manangihon jamita sian media sosial, gabe ndang tading nasida di na manangihon Barita na Uli
i.
2. Marpanghorhon Tu Hamaolon
Idaonta do haduan ndung salpu pandemi Covid-19 on, boi do naung gabe hasomalan
di halak Kristen na so marpungu tu bagas joro ala teknologi nuaeng. Boi do lam moru parsaoran di tongatonga ni huria,
boi do muse lam maol pembangunan ni gareja,
ala nunga somal marsasahalak jolma di bagasna laho patupahon parmingguan via online. I do hamaolon na ingkon diadopi
huria di partingkian na naeng ro.
Sian
dua pamingkirion i, denggan ma nian hita marningot sejarah pamaritahonon Barita na Uli uju ro Tuhan Jesus tu portibi on,
asa unang mago pangantusion na polin taringot tu na mamaritahon dohot na manjangkhon
Barita na Uli. Asa idaonta ma prinsip-prinsip
di na laho mamaritahon Barita Haluaon jala di na manjangkhon Barita Haluaon i marhite
bahan sermon naung huparade hami.
II. EVANGELIUM MARKUS
Buku evangelium Markus, i ma sastra Kristen parjolo na didok Evangelium. Evangelium Markus i ma pardomuan ni “memori/ingatan” panghataion ni Tuhan Jesus dohot “pengalaman” halak Kristen na parjolo jala dipadomu tu pingkiran teologis sian na manurat buku on (anonim). Goar “Markus” dilehon Gareja di parsitongaan abad na paduahon. Situasi di tingki manurathon Markus on i ma di masa parporangan ni halak Romawi dohot Jahudi, tarlumobi di tingki marongso bagas joro di Jerusalem (parsitongaan taon 70M). Situasi i ma na mambahen secara umum evangelium Markus mangondolhon panghirimon halak Kristen di na maimaimahon haluaon na pinarbaga ni TUHAN i.
Di
bagasan hamaolon na niadopan ni halak Kristen hatiha i, ro ma angka pangajarion
na boi mambahen lilu haporseaon nasida. Alani i ma tegas diondolhon di buku on taringot tu na marpargogoihon
haporseaon nasida asa manahan di angka hamaolon jala maniop gomos pangajarion
ni Tuhan Jesus na ingkon ro muse di na paluahon nasida. Di bagian-bagian besar evangelium Markus diujungi angka catatan na
patuduhon angka haporsuhon (3:6, 6:6a, 8:21, 10:45, 12:44).
III. HATORANGAN NI TURPUK
1. HATANA DO NA RO MANOPOT JOLMA (AYAT
6B-7)
Marhite perikop evangelium di ari Minggu on, dipungka do turpukta sian ayat 6b na patuduhon tiruan na binahen ni Tuhan Jesus, i ma na mangaliati angka huta di na saluat i laho mangajari. On ma sada sian tolu metode ni panghobasion ni Tuhan Jesus tagan Jolma dope Ibana, i ma marjamita, pamalum angka na marsahit dohot na mangajari. Jala tolu metode on muse na ditonahon Tuhan Jesus asa diulahon angka siseanNa laho manguduti panghobasion ni Tuhan Jesus tu torop halak.
Songon na tarsurat di turpuk on, dijou Tuhan Jesus ma na sampulu dua i laho marsuru nasida marduadua jala dilehon tu nasida huaso mamaksa angka tondi na hodar. Panjouon jala parsuruon ni Tuhan Jesus tu angka sisean borhat do sian pangantusion na masa hatiha i. Hombar tu na tarsurat di 5 Musa 19:15, “Ndang masuk anggo holan sahalak hehe sitindangi mangalo manang ise taringot tu manang aha hajahaton manang dosa angka naung binahenna, ingkon tinindanghon ni dua manang tolu halak sitindangi asa hot hata i.” Lapatanna, molo adong 2 halak sitindangi (saksi) di sada parkaro, sah ma panindangion (kesaksian) i. Molo dua halak sisean i manghatindanghon barita na uli i, sah ma i jaloon ni jolma.
Alai na umbalga lapatan ni pandohan “marduadua” i: Asa somal angka sisean i marsiurupan jala marsitungkolan ala godang parungkilon na naeng diadopi halak i di ulaon i. Marhite parsagian tu angka sisean naung binahen ni Tuhan Jesus, gabe humatop ma tarbarita barita na uli tu luat i. Jala parsuruon ni Tuhan Jesus tu angka sisean on laho paradehon nasida di ulaon na naeng pinasahat tu nasida ndung manaek Ibana tu banua ginjang.
Huaso na pinasahat ni Tuhan Jesus tu angka sisean gabe pangondolon na mansai bagas do na pinaandar ni evangelium Markus. Marhite huaso na pinasahat ni Tuhan Jesus, naeng pinabotohon do tu angka panjaha evangelium on, na marhuaso do Tuhan Jesus dohot angka na sinuruNa laho mangalo angka huaso ni sibolis. Laos disi ma pinataridahon na gumogo do huaso ni Tuhan Jesus sian huaso ni sibolis manang huaso ni portibi on na gabe parungkilon bolon na masa hatiha i (panggomgomion ni halak Rom dohot tradisi kuno na manghaporseai gogo ni tondi na hodar na boi manusai jolma).
Ro do HataNa (Firman Tuhan) na mangapuli jala na manghamonanghon jolma na
marungkil. Ndang na dipasombu Tuhan i angka jolma mangadopi parungkilon nang
hasusaan, alai ro do Ibana paluahon jolma sian nasa ragam ni hamaolon dohot
parungkilon na niadopanna.
2.
HEHE
MANGULAHON PARSURUON NI TUHAN JESUS (AYAT 8-11)
On ma siulahonon ni angka sisean marhite
pamilliton ni Tuhan Jesus tu nasida: tarjou nasida gabe sisean, diiuhuthon ma
pangajarion ni Tuhan Jesus, diparade jala diparbadia huhut dilehon huaso tu
nasida, ndung i borhat ma nasida mamaritahon barita na uli hombar tu asi ni
roha naung jinalona. Di na mangulahon parsuruon ni Tuhan Jesus angka sisean i,
dipatuduhon Ibana do aha na ingkon siulahonon ni nasida, i ma:
a.
Aha Do
Na Gabe Siboanon Parbarita Na Uli? (Ayat 8-9)
Somal
do hita mambege tangiang angka naung manangihon jamita na mandok, “Bahen
ma hataMi gabe tungkot di na landit...” Molo di bagasan parsitutuon
di na mandok hata di tangiang i (“unang
ma nian holan alani hasomalan”), umbuk do hata di tangiang i dohot na nidok
ni Tuhan Jesus tu angka sisean di turpuk on. Sada pangantusion, asa holan
pangaramotion ni Tondi Parbadia marhite HataNa do na gabe sinjata di na laho manghangoluhon
Barita na Uli.
Tungkot
na gabe pangurupi di angka jolma di na mandalani sidalananna gabe mamboan hita
tu pangantusion: tungkot manang pangaramotion ni Tondi Parbadia do na gabe
sitiopon ni jolma (simbol) asa unang
tartuktuk di na laho pararathon dohot na manjangkhon Barita na Uli jala gabe
sinjata molo mangadopi hamaolon di jolona. Ndang roti nang hajut, manang hepeng
di hohos pe, nda holan tungkot, lapatanna: so boi portibi on mambahen pos ni
roha angka parbarita na uli so holan Tuhan i sandiri na mandongani jala na
mangaramoti.
“Alai denggan do marsipatu hamu jala ndang
jadi pangkeonmuna bajubaju dua,” na mamboan hita tu pangantusion asa tung
diparohahon ma simanjojak nang langka ni angka na laho mamaritahon na uli. Pardalanan
ni parbarita na uli i do na jumolo pinarade jala hobas, ndang na rupa manang na
adong di dirina laho sipatuduhononna (penampilan).
“Tampillah dengan apa adanya, bukan
dengan ada apanya.” Baritahon ma barita na uli jala sai dijaga ma
pardalananna asa unang tartuktuk.
b.
Aha Do
Na Gabe Siulahonon Parbarita Na Uli? (Ayat 10-11)
Ndang adong siulahonon ni angka parbarita na uli so holan mamaritahon barita haluaon na sian Tuhan Jesus hombar tu asi ni roha naung pinasahat tu nasida. Baritahon ma barita na uli hombar tu parsuruon naung sahat jala naung jinalo. Molo jinalo angka jolma do barita na uli naung binaritahon i, gabe mian ma Hata i di ngolu nasida laho mangajari huhut mangaramoti pardalanan ni ngolu nasida.
Baliksa, molo so dijalo nasida manang so ditangihon Barita na Uli i, so mian Tondi Parbadia di nasida, tading ma nasida di “tongandalan” i, so jumpang haluaon na nilehon Tuhan Jesus. Molo didok di ayat 11 “pirpirhon hamu ma nang orbuk na lohot di totmuna, bahen panindangion tu nasida,” lapatanna: gabe tanda do i naung digotap partalian (hubungan) tu nasida.
Di parugamoon Jahudi, molo mulak angka rabi ni Jahudi tu hutana ndung laho sian huta na so mananda TUHAN, diulahon nasida do na mamirpirhon totna asa unang pasidohot orbuk na lohot di sipatu nasida masuk tu hutana, asa unang mago habadiaon ni huta nasida i (menjadi najis).
Marhite ulaon i, ndang na gabe adong “pemaksaan” manang “paraloon” asa dijangkhon angka jolma Barita na Uli. Alai, intap ni na mamaritahon do na niula angka parbarita na uli. Molo ndang dijangkhon nasida, bahen ma tanda asa unang tungguon ni TUHAN i mudar nasida na so olo manjalo haluaon i (Hesekiel 33:9).
3.
SIJALOON
ANGKA NA MANJALO BARITA NA ULI (Ayat 12-13)
Haroro ni Barita na Uli na binoan ni Tuhan Jesus dohot angka na sinuruNa i ma na mangalehon hangoluan na imbaru. Nunga ro TUHAN i dibagasan Tuhan Jesus Kristus na padamehon jolma dohot Debata. Barita na Uli i do na mamboan jolma tu haluaon sian nasa ragam parungkilon nang hasusaan alani dosa. Barita na Uli i do hapapatar ni hasesaan ni dosa asa unang mate jolma i di bagasan dosa.
Alani i, sijaloon ni angka naung manjangkhon Barita na Uli i ma hangoluan naimbaru. Nunga dipaimbaru diri nasida marhite na olo paubahon rohana tu na hinalomohon ni Tuhan Jesus. Angka tanda halongangan na binahen ni sisean hatiha i gabe alus tu angka jolma na manghirim haluaon di ngolu nasida.
Di partingkian nuaeng, ndang na gabe ingkon tanda halongangan songon na tarsurat di ayat 13 on siboanon parbarita na uli. Alai, nunga lobi sian na tarsurat i tanda halongangan naung masa di ngolu ni angka naung manjangkhon Barita na Uli. Idaonta ma nuaeng di pandemi Covid-19 on, ndang na gabe mansohot tanda halongangan i. Sai mangalehon gogo dohot panghirimon na imbaru do Barita na Uli tu jolma asa ndang mintop haporseaon ni angka naung manjalo Barita na Uli.
Idaonta ma di partingkian nuaeng, lam
torop do rumatangga gabe bagas joro,
inganan ni keluarga laho martangiang
dohot na patupahon ibadah. Idaonta ma
muse di partingkian nuaeng, lam torop do jolma na marpangunsandean holan tu
Tuhanta Jesus na gabe gogo di nasida mangadopi hinamaol ni ngolu sian
panghorhon ni pandemi on, dna.
Lapatanna: bali do sibolis na naeng paagohon haporseaon ni jolma jala malum do
panghilalaan na hansitan alani pandemi on
marhite gogo na sian Hata ni Tuhanta.
IV. Usul Pointer Jamita
Nuaeng, pahembangonta ma jamita on
hombar tu na masa di tongatonga ni hurianta. Alani, hubahen hami ma
pamingkirion laho mangurupi hita pahembanghon jamita on:
1. Baritahon Ma Barita Na Uli Jumolo Tu Keluarga-ta
Ndang baritahononhon Barita na Uli
jumolo tu na dao sian hita. Keluarga
songon angka na jumonok tu hita, nasida ma parjolo manangihon Barita na Uli i,
asa jumolo nasida manjangkhon jala manjalo haluaon na sian Tuhan Jesus. Dung i,
pasidohot ma nasida laho mamaritahon Barita na Uli marhite angka ulaon nasida
siganup ari. Songon Tuhan Jesus na paborhathon angka sisean na jumonok tu
Ibana, songon i do hita na paradehon angka ianangkhonta gabe parbarita na uli
di ngolu nasida, patuduhon ngolu na imbaru na gabe tiruan di gulmit ni ngoluna.
2. Baritahon Ma Barita Na Uli Hombar Tu Asi
Ni Roha Naung Tajalo
Ragam profesi do na taulahon ganup ari. Marhite sian profesi na taulahon i boi pinatuduhon angka tiruan na mangalehon
hangoluan naimbaru tu na di humaliangta. Isarana: Molo adong hita na berprofesi songon Guru, borhat ma hita
mangajari angka anak didik asa unang
unang holan mangalului parbinotoan, alai naeng ma diajari ma asa pro tu hangoluan (berempati kepada sesama, tidak egois, dll). Molo adong sian hita na
berprofesi songon partigatiga, borhat
ma hita patuduhon pangalaho na jujur,
asa tarpasupasu angka jolma na manuhor tigatiganta. Molo adong sian hita na berprofesi songon partani, denggan ma
nian hita mamparrohahon suansuanan i mardongan tangiang, asa na manganhon
parbue suansuanan i dapotan hahipason, dohot sude angka ragam ni profesi dohot talenta naung tajalo.
3. Baritahon Ma Barita Na Uli Na Mamboan Pos Ni Roha Tu Angka Na Marungkil
Ndang na holan marhite panghataion (lips service) laho mamaritahon Barita na
Uli. Ngolu na olo mangurupi angka dongan na tongon di bagasan hasusaan,
pangapulion tu angka na marsak roha jala mangalehon motivasi tu angka dongan na gale alani hamaolon na niadopanna, boi do
i mamboan semangat naimbaru tu nasida
asa unang mate panghirimonna. Ndang pola ingkon boanonta Bibel tu jolo ni angka
dongan na mangadopi hasusaan i, haroronta laho mangapuli dohot na mangurupi
nasida, idaon nasida do songon dalan ni Tuhan i laho paheheon semangat nasida mangadopi hamaolon di
ngoluna. Jala boanonta ma angka donganta na mangadopi hasusaan di bagasan
tangiangta, asa dipatuduhon Tuhan i dalan laho mampargogoihon nasida jala
mamboan nasida tu ngolu na lam pasolhothon diri tu Tuhanta Jesus.
Syalom..!!
Tuhan
Jesus mamasumasu..!!
Pdt. Ferdinand Fernando Silaen
Komentar
Posting Komentar